Եվրոպական ինտեգրացիան վնասակար է. Գեորգի Իրեմաձե

Երեւանում օրերս տեղի ունեցած «Եվրասիական ինտեգրացիա եւ ՀՀ-ի տնտեսական զարգացման հեռանկարները» միջազգային կլոր սեղանին, որին մասնակցում էին ԵԱՏՄ բոլոր երկրների, ինչպես նաեւ Վրաստանի ու Մոլդովայի հայտնի փորձագետներ ու գիտնականներ, ելույթով հանդես եկավ Վրաստանի «Համերաշխություն հանուն խաղաղության» կուսակցության ներկայացուցիչ ԳԵՈՐԳԻ ԻՐԵՄԱՁԵՆ: Նա մասնավորապես զգուշացրեց, որ Եվրամիությունը խոստումներ է տալիս, այդ թվում՝ վիզայի ազատականացում, թեկնածուի կարգավիճակ եւ այլն, բայց իրականում խաղալով դրա վրա` փորձում են խաբել եւ շահագործել երկրներին իրենց շահերի համար՝ ի հակառակ այդ երկրների շահերի:

— Վրաստանը պետք է պատմական ընտրություն կատարի եւ միանա Եվրասիական տնտեսական միությանը։ Սա, անշուշտ, անհրաժեշտ է տնտեսական եւ, իհարկե, գաղափարախոսական տեսանկյունից. վրաց ժողովրդի համար ավանդական արժեքները գերակա են։ Կարծում եմ՝ ձեզ կհետաքրքրի Վրաստանի բացասական փորձը եվրաինտեգրման գործընթացում եւ այն, ինչի հետ բախվել է վրաց բնակչությունը, հատկապես այն բանից հետո, երբ Թբիլիսին Բրյուսելից ստացավ ԵՄ թեկնածուի կարգավիճակ։ Սկսենք նրանից, որ Եվրամիությունը սկսել է քայքայվել։ Մեծ Բրիտանիայի՝ ԵՄ-ից դուրս գալուց հետո, այլ եվրոպական երկրներ, ինչպիսիք են Ֆրանսիան, Գերմանիան, Հունգարիան եւ Լեհաստանը, նույնպես հրապարակավ քննարկում են կազմակերպությունից դուրս գալու հնարավորությունը: Հարկ է նշել, որ հիմնական պատճառներից մեկը գաղափարախոսական է. Բրյուսելը պահանջում է լիակատար ենթակայություն անդամ պետություններից եւ թեկնածու երկրներից, այդ թվում՝ ԼԳԲՏ քարոզչությունը եւ միասեռ ամուսնությունների օրինականացում, որը ոչնչացնում է ավանդական ընտանիքը եւ զրկում երկրներին պետականությունից: Այս պահանջները վերաբերում են նաեւ միգրանտների ընդունմանը, ինչին Լեհաստանը դեմ էր 2017 թվականին, որի համար Բրյուսելը սպառնաց պատժամիջոցներով: Սա ցույց է տալիս ԵՄ-ի ագրեսիվ՝ պարտադրանքի քաղաքականությունը, որը հակասում է անդամ պետությունների շահերին: Վրաստանը ԵՄ թեկնածուի կարգավիճակ ստացավ 2023 թվականի դեկտեմբերի 14-ին, ինչն ուղեկցվում էր Ռուսաստանի դեմ «երկրորդ ճակատ բացելու», ԼԳԲՏ քարոզչությանը չմիջամտելու եւ այլնի պահանջներով: Այսինքն՝ նրանք պահանջում էին մի բան, որը վրաց ժողովուրդը երբեք չէր ընդունի, եւ երբ Վրաստանը հրաժարվեց կատարել ԵՄ հրահանգը, արդեն 2024 թվականի սկզբին, Բրյուսելի կողմից հրահրված տեղական արմատական ​​ընդդիմությունը սկսեց ակտիվացնել պետական ​​հեղաշրջման սցենարը:

Չնայած երկրի պաշտոնական համաձայնությանը Բրյուսելի հետ, Վրաստանում եվրոպական ինտեգրացիան փաստացի կանգ է առել, ինչպես բացահայտ հայտարարել է մեր վարչապետը, դրա մեղավորը հենց եվրոպական բյուրոկրատիան է։ Եվ դրա պատճառները բացահայտորեն նշված են. Եվրամիությունը եւ Միացյալ Նահանգները ցանկանում են, որ Վրաստանը ներքաշվի ուկրաինական հակամարտության մեջ եւ «երկրորդ ճակատ» բացի, ինչը աղետալի կլինի մեր երկրի համար։ Արեւմտյան պատվիրակները գաղտնի կերպով սա են պահանջում Վրաստանի բարձրաստիճան պաշտոնյաներից, ինչը, իհարկե, անընդունելի է: Պետք է նաեւ նշել, որ վրացական կողմը հրաժարվել է մասնակցել հակառուսական պատժամիջոցներին: Հենց այդ պատճառով է Բրյուսելն այժմ շանտաժի ենթարկում՝ հայտարարելով, որ կչեղարկի Վրաստանի անվիզա ռեժիմը, եթե կառավարությունը չընդունի ԵՄ պահանջները: Հետաքրքիր է, որ Եվրախորհրդարանի անդամներն ու եվրոպական երկրների նախարարները անմիջականորեն մասնակցում են Թբիլիսիում տեղի ունեցող հակակառավարական ցույցերին, այդ թվում՝ վերջերս, երբ ԵԱՀԿ գործող նախագահը, գտնվելով Վրաստանում, մասնակցեց արմատական ​​ընդդիմության հանրահավաքին եւ տուգանվեց չարտոնված հանրահավաքին մասնակցելու եւ մայրուղին անօրինական փակելու համար: Այլ կերպ ասած, Վրաստանն այժմ բախվում է եվրոպական բյուրոկրատիային՝ գիտակցելով, թե որքան վնասակար է եվրոպական ինտեգրացիան:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝