Չախալյանը փաստացի խոշտանգման է ենթարկվում. պաշտպաններից Թումասյանն ահազանգում է

Ինչպես ավելի վաղ տեղեկացրել էինք, Ազգային արժեքների պաշտպանության «Կամք» հասարակական նախաձեռնության հիմնադիր-ղեկավար, քաղբանտարկյալ Վահագն Չախալյանը երեկվանից հայտնվել է հատուկ պատժախցում: Նրա պահման պայմանների վերաբերյալ մանրամասներ «Իրավունք»-ը ճշտել է Չախալյանի պաշտպաններից մեկի՝ փաստաբան ԱԼԵՔՍԱՆ ԹՈՒՄԱՍՅԱՆԻ հետ զրույցում։

«Վահագն Չախալյանին պահում են անմարդկային պայմաններում․ պատժախուցը ջեռուցում չունի, նրան տեղափոխել են ցուրտ տարածք։ Տպավորություն է, որ կա հստակ ուղղորդված մոտեցում՝ ցանկացած ձեւով նրան վնաս հասցնել։ Փաստացի նա խոշտանգման է ենթարկվում», - ասաց փաստաբանը:

Հարցին, թե արդյոք դիմել են Մարդու իրավունքների պաշտպանի գրասենյակ, Թումասյանն ընդգծեց, որ անձամբ է տեղեկացրել. «Սակայն մինչ օրս որեւէ այց չի իրականացվել։ Պահման պայմաններով չեն հետաքրքրվել անգամ։ Անձամբ դիմել եմ՝ պահանջելով պարզաբանել, թե ինչու է նա հայտնվել նման վիճակում»:

Հիշեցնենք, որ Վահագն Չախալյանը քրեակատարողական հիմնարկից դիմել էր հանրությանը եւ ասել, որ անազատության մեջ եղած այս 5 ամիսների ընթացքում մշտապես եղել են տարաբնույթ եւ տարատեսակ սադրանքներ եւ ապօրինություններ իր դեմ, որոնք ս.թ. դեկտեմբերի 4-ից հետո կրել են աննախադեպ բնույթ եւ «հանգուցալուծումը» եղավ իրեն պատժախուց տեղափոխելը:

«Ի գիտություն հանրությանը՝ ուզում եմ նշել, որ ապօրինությունների, սադրանքների եւ անմարդկային վերաբերմունքի՝ դրանցից բխող հետեւանքների պատասխանատվությունն ամբողջապես եւ լիովին ընկնում է ՀՀ արդարադատության նախարար Սրբուհի Գալյանի, ՀՀ ԱՆ քրեակատարողական ծառայության պետ Ծովինար Թադեւոսյանի եւ Մարդու իրավունքների պաշտպան Անահիտ Մանասյանի վրա», - զգուշացրել է Չախալյանը:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝