Իշխանություններն ամեն կերպ անտանելի պայմաններ եւ ճնշում են գործադրում քաղբանտարկյալների նկատմամբ. Գառնիկ Դանիելյան

ԱԺ «Հայաստան» խմբակցության պատգամավոր ԳԱՌՆԻԿ ԴԱՆԻԵԼՅԱՆԸ, ահազանգել էր, որ Ազգային արժեքների պաշտպանության «Կամք» հասարակական նախաձեռնության հիմնադիր-ղեկավար Վահագն Չախալյանը հայտնվել է պատժախցում՝ այն բանի համար, որ իբր, վերջինս ՔԿՀ աշխատակցի հետ խոսել է անունով։ Այս ամենի մասին առավել մանրամասն «Իրավունք»-ի հետ զրույցում ներկայացրեց պատգամավորը:

«ԻՆՉ ՏԵՂԻ Է ՈՒՆԵՆՈՒՄ, ԻՆՁ ՀԱՄԱՐ ԱՆԸՆԴՈՒՆԵԼԻ Է»

— Արդեն մի քանի օր է, ինչ Վահագն Չախալյանի պաշտպանները բարձրաձայնում են, որ իրենց պաշտպանյալի նկատմամբ փաստացի խոշտանգում է իրականացվում, ինչի մասին Դուք եւս բարձրաձայնել էիք: Ի վերջո, ի՞նչ է պատահել եւ ի՞նչ տեղեկություններ ունեք:

— Ես իմ ֆեյսբուքյան էջում կատարել էի գրառում, որտեղ գրել էի, որ ինձ հետ կապ է հաստատել Վահագն Չախալյանի փաստաբանն ու տղան եւ ահազանգել են, որ քրեակատարողական հիմնարկում առաջացել են խնդիրներ, ինչի հետեւանքով Չախալյանին տեղափոխել են պատժախուց: Այդ ողջ ընթացքում ես կապի մեջ եմ եղել ե՛ւ տղայի, ե՛ւ փաստաբանի հետ: Այնուհետ շատ ավելի ուշ, փաստաբանն ինձ հետ կապ է հաստատել եւ ասել, որ առկա խնդիրները ստացել են որոշակի լուծումներ: Անձամբ ես չեմ այցելել Վահագն Չախալյանին, քանի որ շաբաթ-կիրակի օրերին այցելությունների խնդիր կա եւ նրան տեսակցելու արգելքը նոր է բացվել: Առաջիկայում պլանավորում ենք նրան այցելել եւ տեղում ծանոթանալ խնդրի մանրամասներին:

— Պարոն Դանիելյան, իսկ խնդիրը որոշակի լուծում է ստացել ի՞նչ է նշանակում, նրան պատժախցից տեղափոխե՞լ են արդեն:

— Ծագած խնդրի որոշակի լուծման մասին ասաց փաստաբանը, որը այդ պահի դրությամբ կարգավորվել էր, սակայն կրկնում եմ՝ ես անձամբ պիտի այցելեմ, որ բոլոր մանրամասներից տեղեկանամ եւ կարողանամ Ձեզ պատասխանել: Մինչեւ իմ աչքերով նրան չտեսնեմ, ավելին ասել չեմ կարող:

— Իսկ առհասարակ ի՞նչ կասեք այն մասին, որ քաղբանտարկյալներին ամեն չնչին պատճառով կարող են տանել մեկուսարան, կտտանքների ենթարկել: Սա ինչքա՞ն պետք է շարունակվի:

— Ես այս ամենին շատ վատ եմ վերաբերում եւ այն, ինչ տեղի է ունենում ինձ համար անընդունելի է: Միանշանակ մենք մեր ձեռքի տակ եղած բոլոր հնարավորությունները օգտագործելու ենք, որպեսզի կարողանանք պարզել՝ ինչ է իրականում տեղի ունեցել: Այն, որ իշխանություններն ամեն կերպ անտանելի պայմաններ եւ ճնշում են գործադրում քաղբանտարկյալների նկատմամբ, ավելի քան ակնհայտ է: Իսկ մնացած մանրամասները կարող եմ նկերկայացնել Վահագն Չախալյանին տեսակցելուց հետո:

Այն, որ իշխանությունն ամեն բան անում է, որպեսզի քրեակատարողական հիմնարկներում գտնվող քաղբանտարկյալների վիճակը հնարավորինս դառնա անտանելի, անհերքելի է՝ սկսած իրենց առողջական խնդիրներից, վերջացրած այն պայմաններով, որոնք ստեղծվում են նրանց նկատմամբ քրեակատարողական հիմնարկներում:

Օրեր առաջ Ազգային ժողովի պետաիրավական հարցերի մշտական հանձնաժողովում, իմ նախաձեռնմամբ, քննարկում կազմակերպվեց, եւ ես մանրամասն ներկայացրեցի այն իրավիճակը, որը տիրում է ՔԿՀ-ներում՝ քաղբանտարկյալների եւ անազատության մեջ գտնվող այլ անձանց հետ կապված:

«ԱՆԱԶԱՏՈՒԹՅՈՒՆԸ ԿԻՐԱՌՈՒՄ ԵՆ ՈՐՊԵՍ ՊԱՏԺԻ ՄԵԽԱՆԻԶՄ»

— Կալանքի տակ գտնվող Շիրակի թեմի առաջնորդ Գերաշնորհ Տ. Միքայել արքեպիսկոպոս Աջապայանի առողջական վիճակը եւս վատացել է՝ հենց այդ նույն պայմանների պատճառով: Ի՞նչ կասեք Միքայել սրբազանի հետ կապված խնդրի մասին:

— Այո, նույնը Միքայել սրբազանի մասով է: Նրա առողջության հետ կապված նույնպես կար լրջագույն խնդիրներ: Այսինքն՝ իշխանությունները կրկին պրոբլեմներ էին ստեղծում՝ սրբազանի վիրահատության եւ հետվիրահատական շրջանի հետ կապված: Դա ցույց է տալիս, որ անազատությունը կիրառում են որպես պատժի մեխանիզմ: Այսինքն՝ մարդկանց պահելով անազատության մեջ, վատ պայմաններում, փորձում են նման կերպ ավելի ճնշում գոծադրելով՝ նրանց խեղճացնել:

— Վերադառնալով Վահագն Չախալյանի հետ կատարվածին՝ ըստ Ձեզ, հնարավո՞ր է, որ սա կապ ուներ վերջին դատական նիստին դահլիճից նրա հնչեցրած արտահատության հետ, որը ուղղված էր Նիկոլ Փաշինյանին:

— Ենթադրում եմ՝ այո, որովհետեւ Վահագն Չախալյանն այն մարդկանցից է, ով երբեք կոմպրոմիսի չի գնում: Այսինքն՝ երբեք չի տրվում այն ճնշումներին ու հալածանքներին, որը տրվում է իշխանության կողմից: Նա կամային բարձր հատկություններ է դրսեւորում եւ իր տեսակետն արտահայտում է թե՛ դատական նիստերի ընթացքում, եւ թե՛ իր բոլոր դրսեւորումներում: Չախալյանը եւ մնացած բոլոր 18 արդարներն այն մարդիկ են, որոնք իրենց սկզբունքային դիրքորոշումներն ունեն եւ տեղի չեն տալիս բոլոր այն ճնշումներին, հալածանքներին, որոնք կիրառվում են նրանց նկատմամբ: Այո՛, այդ սկզբունքային դիրքորոշումները կարող են պատճառ հանդիսանալ պահման պայմանների եւ այլ պատժիչ մեխանիզմների հետ կապված:

Հիշեցնենք, որ պատժախուց տեղափոխվելուց առաջ՝ Վահագն Չախալյանը փաստաբանի միջոցով հայտարարությամբ էր հանդես եկել եւ ի գիտություն հանրության տեղեկացրել, որ իր կալանքի ընթացքում իրեն պատանդ վերցրած ռեժիմի կողմից մշտապես եղել են բազմատեսակ սադրանքներ, սակայն դրանք աննախադեպ բնույթ են ձեռք բերել ս.թ. դեկտեմբերի 4-ին տեղի ունեցած դատական նիստից հետո:

ՆԱՆԱ ՍԱՐԳՍՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝