Այ քեզ խայտառակ արդարադատություն. ԶԱՐՄԱՆՔ

Քաղակտիվիստ Արթուր Չախոյանն այսօր պատրաստվում է Գլխավոր դատախազության մուտքի մոտ հրապարակային կարգով հաղորդում ներկայացնել Երեւանի քաղաքապետ ՏԻԳՐԱՆ ԱՎԻՆՅԱՆԻ կողմից ցուցաբերված անգործության արդյունքում՝ Երեւան քաղաքից շուրջ 700 հազար ԱՄՆ դոլարի գույք հափշտակելու վերաբերյալ: Ըստ Չախոյանի` հաղորդումը վերաբերում է ՀՀ քրեական օրենսգրքի՝ 441-րդ, 445-րդ, 447-րդ եւ 448-րդ հոդվածներով նախատեսված՝ արարքների հատկանիշների առկայությանը։ «Եթե «արդարադատությունը» գործի օրենքի պահանջներին համապատասխան, ապա իմ հրապարակային հաղորդումից հետո մի խումբ անձինք, այդ թվում՝ Տիգրան Ավինյանը, պետք է ձերբակալվեն, սակայն բոլորս էլ գիտակցում ենք, որ դա տեղի չի ունենա», - ընդգծում է քաղակտիվիստը։ Եվ, իրոք, Ավինյան Տիգրանը հո հոգեւորական չէ, որ նախ կալանավորեն, հետո գցեն-բռնեն՝ մեղավո՞ր է, թե՝ ոչ: Համենայնդեպս, չի էլ բացառվում, որ Նիկոլ Փաշինյանի սպասումները մի շարք հարցերում չարդարացրած Ավինյանը ուշ, թե շուտ կհայտնվի ճաղերի հետեւում, ընդ որում՝ ոչ Չախոյանի ներկայացրած հաղորդման հիմքով:

Ի դեպ, արդարադատության մասին. Մասիսի կալանավորված քաղաքապետ Դավիթ Համբարձումյանի պաշտպան Գայանե Պապոյանը ներկայացրել է դատավոր ԺՈՐԱ ՉԻՉՈՅԱՆԻ «արդարադատությունների» շարքից թարմ դատական ակտ: «Օրեր առաջ կայացվել է մի դատավճիռ, որի համաձայն՝ կես կգ-ից ավել, այն է՝ 570,81 գրամ «մեթամֆետամին» իրացնելու մեջ մեղադրվող անձի նկատմամբ նշանակել է պատիժ 6 տարի 6 ամիս ժամկետով՝ այն դեպքում, երբ ՔՕ 393-րդ հոդվածի 3-րդ մասը նախատեսում է 6-12 տարի ժամկետով ազատազրկում։ Նույն դատավորը որեւէ հանցանք չգործած Դավիթ Համբարձումյանի նկատմամբ նշանակեց 6 տարի 3 ամիս ժամկետով ազատազրկում՝ այն դեպքում, երբ տվյալ հանցակազմի մինիմալ շեմը սկսվում էր 4-ից (2003թ. ՔՕ 258-րդ հոդվածի 4-րդ մաս՝ 4-7 տարի ազատազրկում)», - նկատում է փաստաբանը: Նրա գնահատմամբ՝ բացատրության կարիք չունի այն, որ Համբարձումյանի նկատմամբ այդչափ պատիժ նշանակելը հետապնդում էր մեկ նպատակ. համաներման ակտից օգտվելու անհնարինություն եւ ազատազրկում (հիշեցնենք, որ մինչեւ 6 տարվա պատժի դեպքում կիրառելի կլիներ համաներման մասին օրենքը)։ «Վերոգրյալի պայմաններում, հետաքրքիր է, դատավոր Չիչոյանն ինչպե՞ս է ինքն իրեն համոզում, որ հավատարիմ է մնացել իր կողմից տրված երդմանը», - հարց է բարձրացնում Գայանե Պապոյանը:

Ոչ պակաս զարմանալի է վերջերս համացանցը ցնցած դեպքին հաջորդած իրավական զարգացումները: ՀՀ քննչական կոմիտեի Երեւանի քննչական վարչության Ճանապարհատրանսպորտային հանցագործությունների քննության բաժնի ավագ քննիչ Նարեկ Պետրոսյանը միջնորդություն է ներկայացրել Երեւանի ընդհանուր իրավասության քրեական դատարան, որպեսզի դատարանը որպես խափանման միջոց երկամսյա կալանքի որոշում կայացնի 29-ամյա Գոհար Մանուկյանի նկատմամբ, ով ձերբակալվել էր դեկտեմբերի 5-ին՝ Երեւանի Պռոշյան փողոցում 7 ավտոմեքենայի մասնակցությամբ տեղի ունեցած ողբերգական ավտովթարի փաստով: Հիշեցնենք, որ Գ. Մանուկյանը եղել էր ոչ սթափ, չէր ունեցել հայկական վարորդական վկայական, իսկ վթարի հետեւանքով կար մեկ զոհ: Բայց ահա Միքայել սրբազանին երկու տարով ազատազրկելու վճիռ կայացրած դատավոր ԱՐՄԻՆԵ ՄԵԼԻՔՍԵԹՅԱՆԸ որոշում է կայացրել մերժել քննիչի միջնորդությունը եւ Գ. Մանուկյանի նկատամբ կիրառել ընդամենը գրավ՝ 10 միլիոն դրամի չափով եւ տնային կալանք: Փաստորեն, Միքայել սրբազանի մի արտահայտություն ավելի մեծ հանցագործությո՞ւն է, քան հարբած, առանց վկայական մեքենա վարելն ու մի այլ վարորդի կյանքից զրկե՞լը:

ԶԱՐՄԱՑԱԾ Է «ԻՐԱՎՈՒՆՔ»-Ը 

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝