«Որևէ բան ինձ մի՛ հարցրեք». ո՞վ է առաջիկա կիրակի «Փաշինյանի պատարագիչ քահանան»․ ի՞նչ կարծիք ունեն Կոտայքի թեմակալ առաջնորդն ու մարզպետը

Կառավարության այս տարվա վերջին նիստից հետո լրագրողներին տված ճեպազրույցի ժամանակ Նիկոլ Փաշինյանը հայտնեց, որ այս կիրակի ևս կմասնակցի պատարագի։ Կառավարության ղեկավարը պլանավորել է այս անգամ գնալ Կոտայքի մարզ՝ Գառնիի Սուրբ Աստվածածին եկեղեցի։

24News-ը փորձեց կապ հաստատել եկեղեցու քահանա Տեր Սմբատ Աբրահամյանի հետ, սակայն վերջինս չպատասխանեց մեր զանգերին։

Կապ հաստատեցինք նաև թեմի առաջնորդ Առաքել արքեպիսկոպոս Քարամյանի հետ, վերջինս լսելով, որ լրատվամիջոցի ներկայացուցիչ ենք, ասաց․

«Որևէ բան ինձ մի հարցրեք, Աստված պահապան»,- ինչից հետո միանգամից անջատեց հեռախոսազանգը։

Նշենք, որ Առաքել սրբազանն այն եպիսկոպոսներից է, որն անցել է Նիկոլ Փաշինյանի կողմը և պահանջում է Ամենայն հայոց կաթողիկոս Գարեգին Բ-ի հրաժարականը։ Նախորդ հինգշաբթի օրը Մայր Աթոռում տեղի ունեցած իրադարձությունների ժամանակ նա ևս ներկա էր արշավին։

Նշենք նաև, որ Առաքել արքեպիսկոպոս Քարամյանը չնայած միացել է Վեհափառին հեռացնելու իշխանությունների օրակարգին, բայց իր թեմում մատուցվող պատարագների ժամանակ, ինչպես Կեչառիսի վանական համալիրի հոգևոր հովիվն էր որոշ ժամանակ առաջ 24News-ին ասել․ «հենց թեմի առաջնորդն է հանձնարարել, որ հնչեցնեն Վեհափառի անունը պատարագի ընթացքում»։

24News-ը կապ հաստատեց նաև Կոտայքի մարզպետ Ահարոն Սահակյանի հետ․ վերջինս նշեց, որ մասնակցելու է պատարագին․

«Բնականաբար, մասնակցելու եմ, ասեմ ավելին՝ ես 2 տարի է՝ Գառնիի Սուրբ Աստվածածին եկեղեցու խաչքավորն եմ»։

Սահակյանից հետաքրքրվեցինք՝ իսկ ինչպե՞ս է վերաբերվում նախորդ հինգշաբթի օրը Մայր Աթոռում տեղի ունեցած իրադարձություններին, երբ իրենց կողմնակիցները տասը եպիսկոպոսների կոչով գնացել էին Մայր Տաճար՝ հայհոյել էին, բարձրացել խաչքարերի ու գերեզմանաքարերի վրա․

«Ես, ճիշտն ասած, այդտեղ չեմ եղել, չեմ տեսել, բայց էն, ինչը դուք ասում եք, եթե եղել է՝ դատապարտելի է»,- ասաց Կոտայքի մարզպետ Ահարոն Սահակյանը։

24 news

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝