«Միկի Մաուսը» մրցուղում․ ինչպես է վերածնվել լեգենդար Porsche 645-ը

Ավտոմոբիլային պատմության մեջ կան նախագծեր, որոնք այդպես էլ սերիական չդարձան, բայց շարունակում են գրավել էնտուզիաստների ու պատմաբանների ուշադրությունը։ Դրանցից է Porsche 645-ը՝ 1950-ականների կեսերի մրցարշավային նախատիպը, որը ստեղծվել էր որպես հանրահայտ Porsche 550 Spyder-ի փորձնական փոխարինող և հետագայում ամբողջությամբ ոչնչացել վթարի հետևանքով, գրում է Motorious-ը։

Գրեթե յոթանասուն տարի անց ավստրալական Hardt Classics մասնագիտացված արհեստանոցը վերակառուցել է այս եզակի մեքենան՝ նոր կյանք տալով դրան։

Օրիգինալ Porsche 645-ը, որին թիմում անվանում էին «Միկի Մաուս» (Mickey Mouse)՝ փոքր չափերի և «աշխույժ» վարքի համար, 550-րդ մոդելն ավելի թեթև ու աերոդինամիկ դարձնելու փորձ էր։ Այն կառուցել էին տարածական շրջանակի և մագնեզիումի համաձուլվածքից թափքի կիրառմամբ, ինչի շնորհիվ մեքենայի ընդհանուր քաշը ընդամենը 550 կգ էր։

Չնայած աերոդինամիկայի և կառուցվածքի նորարարական գաղափարներին՝ 645-ը դժվար էր կառավարել։ 1956 թվականի մի քանի մրցումների ժամանակ (օրինակ՝ Solitude մրցարշավում, որտեղ այն զբաղեցրել է չորրորդ տեղը) մեքենան զարգացրել է մեծ արագություն, սակայն վարքագիծը մրցուղու վրա հեռու էր կատարյալ լինելուց։ Նախատիպի հիմնական վարորդ Ռիչարդ ֆոն Ֆրանկենբերգը մեքենան բնութագրում էր որպես դժվար կառավարելի, ինչը պայմանավորված էր մեծ արագությունների ժամանակ ղեկի նկատմամբ դրա բարձր զգայունությամբ։

Մեքենայի ճակատագիրը վճռվեց 1956 թվականին Բեռլինի հայտնի AVUS մրցուղու վրա տեղի ունեցած վթարով։ Արագընթաց ուղիղ հատվածներից մեկում ֆոն Ֆրանկենբերգը կորցրել է մեքենայի կառավարումը, ինչից հետո այն դուրս է թռել մրցուղուց և ամբողջությամբ այրվել։ Վարորդը, բարեբախտաբար, ողջ է մնացել, սակայն նախատիպի միակ օրինակը ոչնչացել է։

Hardt Classics-ի ժամանակակից վերակազմությունը կատարվել է առավելագույնս նույնական․ այն կառուցել են օրիգինալ գծագրերով՝ կիրառելով տարածական շրջանակ, ալյումինե թափք, Porsche 356 Carrera GT-ի արգելակներ և տվյալ ժամանակաշրջանին բնորոշ այլ բաղադրիչներ։

Այս պահին նախագծում բացակայում է օրիգինալ Type 547 շարժիչը՝ դրա հազվագյուտ լինելու և բարձր արժեքի պատճառով, բայց ընդհանուր առմամբ մեքենան փոխանցում է 1950-ականների Porsche մրցարշավային թիմի ոգին ու ինժեներական մոտեցումը։ Մեքենան վաճառվում է Ավստրալիայի Վիկտորիա նահանգում և դիտարկվում է որպես հարգանքի տուրք ապրանքանիշի պատմության կորսված էջին։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝