Մենք խաղաղություն ենք կառուցում ոչ միայն Հայաստանի կառավարության, այլև նրա ժողովրդի հետ. Ալիևի օգնական

Մենք խաղաղություն ենք կառուցում ոչ միայն Հայաստանի կառավարության, այլև նրա ժողովրդի հետ: Այս մասին The Washington Times-ին տված հարցազրույցում հայտարարել է Ադրբեջանի նախագահի օգնական Հիքմեթ Հաջիևը։

Նա նշել է, որ ԱՄՆ նախագահ Դոնալդ Թրամփի վարչակազմը ցուցաբերել է «խաղաղության օրակարգին բարձր նվիրվածություն» և ակտիվորեն աջակցել է ադրբեջանահայաստանյան կարգավորմանը։

«Դոնալդ Թրամփի արագ արձագանքը և գործընթացին նրա լիարժեք ներգրավվածությունը արժանի են բարձր գովասանքի»,-ասել է Հաջիև:

Նա նաև հավելել է, որ 907-րդ բաժնի պահպանումը խոչընդոտում է Ադրբեջանի և Հայաստանի միջև խաղաղության ուղղությամբ առաջընթացին։ Հաջիևի խոսքով՝ երկու երկրներն էլ լուրջ ջանքեր են գործադրում խաղաղությունն ամրապնդելու համար, սակայն ԱՄՆ Կոնգրեսում որոշակի նախաձեռնություններ ավելորդ են և բաժանարար։

Ալիևի օգնականը նաև ընդգծել է, որ Բայդենի և պետքարտուղար Բլինքենի վարչակազմերի օրոք երկու կողմերի միջև առաջացել են բազմաթիվ թյուրըմբռնումներ, որոնք զգալիորեն վնասել են հարաբերությունները։

Հաջիևը նաև նշել է, որ Բաքուն հետևողականորեն ամրապնդում է իր տնտեսական փոխկախվածությունը Երևանի հետ՝ մատակարարելով նավթամթերք և նպաստելով հացահատիկի արտահանմանը հայկական շուկա։

«Սա կարող է խորհրդանշական թվալ, բայց այն ունի լուրջ աշխարհաքաղաքական հետևանքներ։ Մենք խաղաղություն ենք կառուցում ոչ միայն Հայաստանի կառավարության, այլև Հայաստանի ժողովրդի հետ»,-ասել է նա։

Հաջիևը նաև շեշտել է՝ Ադրբեջանի կրոնական բազմակարծության մոդելը երկիրը դարձնում է Արևմուտքի բնական գործընկեր անկայուն տարածաշրջանում:

«Հրեական և քրիստոնեական համայնքները դարեր շարունակ ապրել են այստեղ մուսուլմանների հետ կողք կողքի: Սա մեր ավանդույթն ու ինքնությունն է: Մենք վճռականորեն հավատարիմ ենք խաղաղության օրակարգին և զգում ենք Թրամփի վարչակազմի լիակատար աջակցությունը»,-ասել է Ադրբեջանի նախագահւ օգնականը:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝