Ներդրվել է մի համակարգ, որի ռիսկերը չեն գնահատվել, ու որի լուրջ բարդությունների հետևանքները կրելու են բացառապես հիվանդները․ Առողջության համընդհանուր ապահովագրության համակարգի հետքերով

Ներդրվել է մի համակարգ, որին ոչ միայն պատրաստ չէին, այլ նաև մի համակարգ, որի ռիսկերը չեն գնահատվել, ու որի լուրջ բարդությունների հետևանքները կրելու են բացառապես հիվանդները: Այս խնդիրները, որոնց մասին ասացի, տեխնիկական են, բայց մի քանի ամիս հետո մենք ունենալու ենք լուրջ խնդիր՝ ֆինանսների պակաս, որովհետև այս պահին արդեն, որպեսզի բացասական արձագանքներ չլինեն, չհիմնավորված 3-4 տուփ դեղ են դուրս գրում, այդ դեղորայքը կուտակվում է քրոնիկ բուժում ստացող հիվանդների տանը, իսկ դեղատներում արդեն տվյալ դեղորայքի դեֆիցիտ է առաջանում,-անդրադառնալով  առողջության համընդհանուր ապահովագրության համակարգին, նման տեսակետ է հայտնում «Առողջության իրավունք» ՀԿ նախագահ Անուշ Պողոսյանը

-Ինձ տարակուսում է  նաև այն, որ երկրի վարչապետն առաջարկում է կամավորական խմբեր կազմել, գնալ դեղատներ, բուժհաստատություններ ու պարզել, թե ի՛նչ խնդիրներ կան համակարգում: Ես ավելի լուրջ խորհուրդ կտամ․ գուցե կամավորական խմբեր կազմեն ու գնան նախարարություն խորհուրդ տան, որ փորձեն գոնե պայմանագրերը կնքել բուժկենտրոնների հետ: Կամավորները չէ, որ պետք է զբաղվեն ու վեր հանեն այն խնդիրները, որոնք ոլորտում առաջացել են հենց գերատեսչության ղեկավարների բացթողումների պատճառով:  Կամավորները առողջապահական օրենսդրության կամ կազմակերպման հետ ի՞նչ կապ կարող են ունենալ, մասնագետնե՞ր են լինելու, եթե ոչ, ապա մի քաոս էլ այդտեղ է առաջանալու: 

Պետք է մասնագիտական խմբեր կազմել ու փորձել խնդիրները վեր հանել, լուծել դրանք մասնագիտորեն ու փրկել այս կարևոր ռեֆորմը՝ ի շահ պետության ու ժողովրդի: Կամավորական խմբեր կազմելն անլուրջ է, որովհետև ոչ մի կամավոր չի կարող գտնել ապահովագրության օրենքի ու ենթաօրենսդրական ակտերի խնդիրներն ու հետո ներկայացնել դրանք ըստ էության: 

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝