«Աջափնյակ» մետրոյի կայարանի հատվածում բիզնես կենտրոն կկառուցվի

Աջափնյակ մետրոյի կայարանին հարող տարածքում քաղաքաշինական ներդրումային ծրագրի երկփուլ մրցույթը կայացել է. նախավորակավորման փուլի ընթացքում դիմել են թվով յոթ միջազգային և տեղական ընկերություններ, երկուսը որակավորվել են։ Այս մասին նշվեց այսօր՝ փետրվարի 23–ին, Երևանի քաղաքապետարանի հերթական գործակարգավարական խորհրդակցության ժամանակ։

Նշվեց, որ մարտի 3–ին առաջարկների ներկայացման վերջնաժամկետն է, ակնկալվում է, որ հունիսի կեսերից աշխատանքները կմեկնարկեն։

Քաղաքապետ Տիգրան Ավինյանը հետաքրքրվեց, թե որոնք են եղել քաղաքապետարանի նախնական պահանջները տեխառաջադրանքով, ինչին ի պատասխան նշվեց, որ առաջարկվելու են այդ տեղանքում որոշակի ռադիուսով հայեցակարգային լուծումներ, ինչպես քաղաքաշինական բովանդակությամբ, այնպես էլ ներդրումային ծրագրի, բիզնես քեյսի մշակում, որը թույլ կտա ներդրումային փաթեթ ձևավորել իր համապատասխան հաշվարկներով, վերլուծություններով, հողի արժեքով և ներդրումային մոդելով։

Ավինյանը նշեց. «Այսինքն, մենք ստանալու ենք և նախնական էսկիզային առաջարկ, և որոշակի տեխնիկատնտեսական հիմնավորում։ Ուզում եմ հիշեցնել այս հանձնարարականի ամբողջ տրամաբանությունը, որ Աջափնյակի կայարանի կառուցման հատվածում մենք ունենանք բիզնես կենտրոն կամ այն, ինչ որ այս ընկերություններից մեկը, որը կհաղթի, կառաջարկի, որը ֆինանսապես բիզնես տրամաբանությամբ հետաքրքիր կլինի և որոշակիորեն նաև կմեղմի այն ծախսերը, որոնք իրականացնելու են կայարանի կառուցման համար»։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝