«ԱՅՍ ՀԱՂԹԱՆԱԿԸ ԻՆՁ ՀՆԱՐԱՎՈՐՈՒԹՅՈՒՆ ՏՎԵՑ ՊԱՅՔԱՐԵԼ ԱՇԽԱՐՀԻ ՉԵՄՊԻՈՆԱԿԱՆ ԳՈՏՈՒ ՀԱՄԱՐ». ԱՆՎԱՆԻ ՄԱՐԶԻԿ, ԲՌՆՑՔԱՄԱՐՏԻ ԱՇԽԱՐՀԻ, ԵՎՐՈՊԱՅԻ ՉԵՄՊԻՈՆ ՅՈՒՐԻ ՍԱՔՈՒՆՑ

Վերջերս Թաիլանդում կայացած պրոֆեսիոնալ բռնցքամարտի երեկոյի ընթացքում տպավորիչ հաղթանակ է տոնել հայազգի անվանի մարզիկ, Բռնցքամարտի WBL, WBF, WBO վարկածներով Աշխարհի չեմպիոն, WBF վարկածով Եվրոպայի չեմպիոն, Գինեսի գրքի բազմակի ռեկորդակիր, միջազգային կարգի սպորտի վարպետ, ծնունդով Չարենցավանից ՅՈՒՐԻ ՍԱՔՈՒՆՑԸ։Iravunk. com -ի մարզական լրագրողը կապ է հաստատել ու զրուցել Յուրիի հետ։

- Շնորհավորում ենք, Յուրի, տպավորիչ հաղթանակի առթիվ։ Ինչպիսի՞ն էր մրցակիցդ, հասցրել էիր ուսումնասիրել նախքան մենամարտը։

- Շատ շնորհակալ եմ։ Հանդես եկա 69 կգ քաշային կարգում։ Մրցակիցս ազգությամբ ռուս մարզիկ էր Մարկ Ուրմանովը, բավականին ուժեղ և փորձառու։ Մենամարտի հենց առաջին ռաունդում, վաղաժամ կարողացա հաղթել նրան երկու անգամ նոկդաունի, մեկ անգամ էլ նոկաուտի ենթարկելով։ Մրցակիցս պրոֆեսիոնալ ռինգում ունի 26 հաղթանակ և 3 պարտություն։ Նա WBO, WBU վարկածներով Աշխարհի գոտու հաղթող էր։ Իսկ ես արդեն պրոֆեսիոնալ ռինգում ունեմ 21 հաղթանակ, առանց որևէ պարտության։ Իհարկե, հասցրել էի ուսումնասիրել մրցակցիս, մարզիչներիս հետ տեխնիկա էինք մշակել, թե ինչպես պիտի հաղթեմ նման բարձրակարգ, պրոֆեսիոնալ մարզիկին։

- Ինչ զգացողություններ առաջացան հաղթանակից հետո, ում ես նվիրում հաղթանակդ։

- Շատ լավ հաճելի զգացողություններ ունեցա այդ պահին։ Սա այս տարվա իմ առաջին հաղթանակն էր, որը հուսով եմ կլինի շարունակական։ Հաղթանակս նվիրում եմ իմ հայ ազգին ու խաղաղություն մաղթում մեր երկրին։Լինենք միշտ միասնական, առաջ շարժվենք իրար օգնելով, առանց որևէ չարության ու նախանձի, փոքր ազգ ենք, հասնենք մեկս մյուսին։ Մեծ հավատ ունենանք Աստծո հանդեպ։

- Յուրի, իսկ ինչ տվեց քեզ այս հաղթանակը։

- Սա ռեյտինգային մենամարտ էր։ Այս հաղթանակը ինձ հնարավորություն տվեց հաջորդ մենամարտում պայքարել WBO վարկածով Աշխարհի չեպիոնական գոտու համար, որը կկայանա Գերմանիայում։ Փառք ու շնորհակալություն ամենակարող Աստծուն իր զորության, առաջնորդության և օրհնության համար։ Նրա կամքով ու շնորհիվ հաղթահարեցինք այս ճանապարհի բոլոր փորձությունները։ Շատ շնորհակալ եմ իմ թիմին, մարզիչներիս Հենրիկին, Արշակին, Հայկին, ընտանիքիս և բոլորից, ովքեր հավատով ու աղոթքով կանգնեցին իմ կողքին այս դժվարին ճանապարհին։ Սա պարզապես մենամարտ չէր։ Սա վկայությունն էր Աստծո զորության մասին և հերթական քայլը դեպի ավելի մեծ նպատակներ։ Նշեմ, որ այս զգացողությունը դժվար է բառերով փոխանցել։ Ինձ համար շատ մեծ պատասխանատվություն է ներկայացնել իմ երկրի, ազգի պատիվը։ Ամեն հարվածը կրում է մեր բոլորի հավատն ու հույսը։

- Քո հաջողության գրավականը որն ես համարում։

- Հավատը Աստծո նկատմամբ։

- Յուրի, արդյոք պատրաստվում ես նաև հերթական ռեկորդ սահմանել։

- Այո, մտադրություն ունենք եղբորս Արթուրի հետ միասին ինքնաթիռ քաշել։

- Շնորհակալություն, Յուրի, մեզ ժամանակ տրամադրելու, հաճելի զրույցի համար։

- Զգացված եմ մշտապես ուշադրության համար, անխափան գործունեություն Ձեր թերթին։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝