Հայտնի է ասրյանական «արշավանքի» նոր ուղղությունը. ԶԱՐՄԱՆՔ

«Հայոց Արծիվներ. Միասնական Հայաստան» կուսակցության նախագահ ԽԱՉԻԿ ԱՍՐՅԱՆԸ հայտարարել է, որ «Հայոց Արծիվներ» կամավորական ջոկատը պատրաստ է մեկնել Իրան` պաշտպանելու բարեկամ Իրանին, Իրանի բարեկամ ժողովրդին, այդ թվում` Իրանում բնակվող բոլոր հայերին: Այս մասին նա հանդես է եկել հայտարարությամբ, ապա նույնը կրկնել երեկ՝ ՀՀ-ում Իրանի դեսպանատան դիմաց: Եվ այստեղ զարմանալին ոչ միայն այն է, թե օդային պատերազմում ի՞նչ են անելու Ասրյանի «արծիվները», եթե թռչել չգիտեն, այլ, որ համանման հայտարարությամբ վերջինս հանդես էր եկել նաեւ 2022 թ.-ին, բայց այդպես էլ տեղ չհասավ: Հիշեցնենք, որ նա նամակ էր գրել ՌԴ նախագահ Պուտինին եւ իրեն բնորոշ պաթետիզմով դիմել՝ «Հայոց Արծիվներ»-ով Դոնբաս մեկնելու թույլտվություն ստանալու համար: Ասրյանը վստահեցրել էր, թե ՌԴ զինված ուժերի կազմում պատրաստ է կռվել Ուկրաինայի իշխանությունների դեմ: Չորս տարի անց՝ նա դեռ Երեւանում է: Այսքանից հետո՝ թերեւս մնում է միայն արձանագրել, թե ինչպես է նույն վճռականությամբ աշխարհաքաղաքական քարտեզի վրա հերթով նշվում ասրյանական «արշավանքի» նոր ուղղությունը, որն այդպես էլ կմնա՝ որպես հերթական բարձրագոչ հայտարարություն եւ ոչ ավելին:

Մեկ այլ ցնցող հայտարարությամբ է հանդես եկել բլոգեր, հաղորդավար ԼՅՈՒՍԻ ՔՈՉԱՐՅԱՆԸ: Ֆեմինիստական հովերով տարված էքսցենտրիկ սույն անձը, որը մեկ «բռնության ձայնը»-ը շարք էր իրականացնում՝ տպավորություն ստեղծելով, թե հայկական ընտանիքներում բարբարոսական բարքեր են տիրում, մեկ սեքսի ու կուսության մասին մարդկանց պատկերացումների մեջ իր արեւին հեղափոխություն անում եւ այս ամենի համար Արեւմուտքի կողմից արժանանում «Խիզախ կին» միջազգային մրցանակի, հիմա էլ քաղաքական տեսակետներ է սկսել արտահայտել: «Կներեք, իսկ հնարավոր ա՞, օրինակ, նենց անենք, որ Սոնա Ղազարյանին,որպես վարչապետ հնարավոր լինի ընտրել: Էդ անվերջանալի, ձանձրալի «մուժիցկիյ դոժձյ» ցուցակներում տենց «օփշըն» կա՞։ Սիրտս կին վարչապետ ա ուզում։ Էլ տղամարդ ղեկավարներին ու պաշտոնյաներին առհասարակ ամբողջ աշխարհում օրգանապես տանել չի լինում. ահավոր են»,- գրել է նա։ Իսկ մեզ մոտ հարց է ծագում՝ իսկ հնարավո՞ր է, որ իշխանության հետ սերտ հարաբերություններ ունեցող Լյուսին ՔՊ-ական պատգամավոր Սոնա Ղազարյանի անունը տալով՝ հող է նախապատրաստում Աննա Հակոբյանին վարչապետի թեկնածու կարգելու համար:

Ներքաղաքական եւ աշխարհաքաղաքական բուռն զարգացումները քիչ էր, մի հատ էլ հայ հանրությանն ակամայից ցնցել է պրիմադոննան: Համացանցում լայնորեն տարածվում է ԽՍՀՄ ժողովրդական արտիստ ԱԼԼԱ ՊՈՒԳԱՉՈՎԱՅԻ խոսքը, իբրեւ նա Իսրայելից անդրադարձել է «պեռաշկի» ու եգիպտացորեն ուտող Նիկոլ Փաշինյանին ու Ալեն Սիմոնյանին: «Ավելի լավ է ապրել Հայաստանում եւ համեղ կարկանդակներ ու եգիպտացորեն ուտել, քան պատերազմել հարեւանների հետ։ Մենք որոշել ենք տեղափոխվել հանգիստ մի վայր՝ Վանաձորի մոտ։ Ես այստեղ երգել եմ 80-ականներին, ինչպես Զեյնաբ Խանլարովան, հնարավոր է՝ ինձ էլ տան Հայաստանի ժողովրդական արտիստի կոչում», - կատակել է պրիմադոննան՝ Թել Ավիվից «Զվարթնոց» օդանավակայան ժամանելուց հետո։ Ինչ խոսք, շատ ծիծաղելի է, բայց բավական է գնալ այս լուրի սկզբնաղբյուրի հետեւից եւ կարդալ ճշմարտությունը. «Այստեղ հրապարակվում են բացառապես ֆեյքային՝ կեղծ լուրեր»: Այնպես որ, Պուգաչովայից ավելի շուտ «ինոագենտ» դուրս կգա, քան` վանաձորցի: Իսկ Հայաստանից ժողովրդական արտիտի կոչում հաստատ նա չի ակնկալում, որովհետեւ դեռ 1985թ. է դարձել ՀԽՍՀ ժողովրդական արտիստ՝ 1984 թ.-ին «Հրազդան» մարզադաշտում իր մենահամերգից հետո:

ԶԱՐՄԱՑԱԾ Է «ԻՐԱՎՈՒՆՔ»-Ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝