Ըստ ՀԷՑ-ի, հրազդանցիներին աչքո՞վ են տվել

Փետրվարի 26-ին Հրազդան քաղաքում տեղի ունեցած լայնածավալ հոսանքազրկումը շարունակում է մնալ առանց հստակ պատասխանների։ Տեղի ունեցածի հետեւանքով, քաղաքացիների պնդմամբ, տասնյակ կենցաղային սարքեր շարքից դուրս են եկել՝ լույսի անջատում-միացումից առաջացած տատանումների պատճառով։

Քաղաքի բնակիչները պատմում են, որ դեպքի օրը հոսանքը մի քանի անգամ անջատվել եւ կրկին միացվել է, ինչն էլ հանգեցրել է տեխնիկայի վնասմանը։ Ըստ նրանց, խոսքը ոչ թե մեկ-երկու դեպքի, այլ մասսայական խնդրի մասին է:

«Իրավունք»-ի հետ զրույցում տուժած քաղաքացիներից մեկը պատմեց, որ դեպքից երեք օր անց՝ երկուշաբթի օրը, դիմել է «Հայաստանի էլեկտրական ցանցեր» ընկերությանը՝ պատճառված վնասը փոխհատուցելու պահանջով։ Վերջինիս աշխատակիցները հորդորել են գրավոր դիմում ներկայացնել՝ վստահեցնելով, որ մասնագետ կուղարկեն վնասված տեխնիկան զննելու նպատակով։ Սակայն, ինչպես նշում է քաղաքացին, 15 օր սպասելուց հետո որեւէ արձագանք չի եղել։ Կրկնակի դիմելուց հետո ընկերությունից հայտնել են, թե դիմումը տեխնիկական խնդրի պատճառով փաստացի ուղարկվել է միայն երկու օր առաջ։

Տուժած քաղաքացին նաեւ դիմել է թեժ գիծ, սակայն խոստացված մասնագետներն այդպես էլ տեղ չեն հասել։ Մինչ այդ, ընկերությունից պարզաբանել էին, որ տեղի ունեցածի պատճառը այրված տրանսֆորմատորն է։

Միայն մարտի 19-ին քաղաքացին ստացել է գրավոր պատասխան, որտեղ նշված է, թե տեղի է ունեցել 10 կիլովատ հզորության հաղորդալարի կտրվածք, որն, ըստ ընկերության, չէր կարող հանգեցնել տեխնիկայի վնասման: Ուստի՝ ընկերությունը պատասխանատվություն չի կրում սարքավորումների վնասման համար:

Այս ամենի ֆոնին տարակուսանք է առաջացնում այն փաստը, որ առանց տեղում զննում իրականացնելու՝ ընկերությունը եզրակացրել է, թե վնասները հոսանքի տատանումից չեն առաջացել։ Քաղաքացիների հարցադրումը մնում է բաց՝ նույն օրը, նույն ժամին մի քանի ընտանիքների տեխնիկան «պատահաբա՞ր» է շարքից դուրս եկել, թե՞ հրազդանցիներին մասսայական աչքով են տվել: Խնդիրը շարունակում է մնալ օդում կախված, եւ որեւէ մեկը չի լուսավորում, թե, ի վերջո, փետրվարի 26-ի մթից հետո՝ վնասված տեխնիկայի համար ո՞վ է փոխհատուցելու:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝