Ժողովուրդը դուրս է գալու փողոց, երբ հունիսի 8-ին էլի պարզվի, որ սխալ ճանապարհով էին գնացել. Պողոսյան

Ընդդիմադիր քաղաքական գործիչ, իրավապաշտպան ԿԱՐԱՊԵՏ ՊՈՂՈՍՅԱՆԻ գնահատմամբ՝ առ այսօր Մայր Աթոռ Սուրբ Էջմիածինն ու Վեհափառ Հայրապետը կարողացել են շատ կուռ ձեւով դիմադրել իշխանության հալածանքներին: Ըստ նրա` արդեն իսկ կարելի է արձանագրել եկեղեցու հաղթանակը օրվա ռեժիմի դեմ:

— Ու գիտեք, թե ինչու հաջողվեց, որովհետեւ ոչ մի, առավել եւս 2018 թվականին Նիկոլ աջակցած քաղաքական ուժի, թույլ չտվեցին ձեռքին բարձրախոս վերցնել եւ փողոց կառավարել։ Եվ կարծում եմ՝ առաջիկայում ժողովուրդը միանշանակ դուրս է գալու փողոց՝ առանց այդ փողոց «կառավարողների»: Կարող է դա լինի հունիսի 8-ին, երբ էլի պարզվի, որ սխալ ճանապարհով էին գնացել։ Եթե մինչեւ հունիսի 8-ը հստակ որեւէ բան չկատարվեց, հունիսի 8-ից հետո՝ շատերը կգնան քրեակատարողական հիմնարկներ պատիժներ կրելու: Փաշինյան Նիկոլը, եթե եւս մեկ անգամ եկավ իշխանության, բանտերում տեղ ու դադար չի լինելու:

— Ի դեպ, քաղբանտարկյալների մասին. ընտրություններին ընդառաջ, շատերի խափանման միջոցները փոխվեցին տնային կալանքով: Փաշինյանը փորձում է նաեւ իր ռեպրեսիաները մեղմելո՞վ վարկանիշը բարձրացնել:

— Վստահ կարող եմ ասել` ոչ։ Նիկոլ Փաշինյանը եւ իրա ռեժիմը կարողացել են հանրության մեջ կեղծ կարծիք ստեղծել, թե տնային կալանքը կալանք չէ։ Մինչդեռ քաղաքական կամ հանրային գործչի, հոգեւորականի համար տնային կալանքն ավելի ծանր պատիժ է, քան քրեակատարողական հիմնարկում կալանք անցկացնելը։ Օրինակ, Միքայել սրբազանը կարողանում էր բանտից նամակներ հղել, կոնկրետ իր խոսքը հասցնել, իսկ տնային կալանքի տակ չի կարողանում: Արդեն երկար ժամանակ է, ինչ իր խոսքը չենք լսել։ Նույնը վերաբերում է մյուս սրբազաններին։ Այսինքն` ոչ թե Նիկոլ Փաշինյանը մեղմել է ռեպրեսիաները, այլ դրան մի փոքր այլ դրսեւորում է տվել, որը, իմ կարծիքով, շատ ավելի դաժան է:

ՀՐԱՆՏ ՍԱՐԱՖՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝