«ՀԵՐՈՍԱԲԱՐ ԶՈՀՎԵԼ Է ՄԱՐՏԱԿԵՐՏԻ ՇՐՋԱՆԻ ՋՐԱԲԵՐԴ ԳՅՈՒՂՈՒՄ». ԱՆՄԱՀ ՀԵՐՈՍ ԷԴԻԿ ՂԱԶԱՐՅԱՆ

Այսօր, մայիսի 8-ը, Արցախյան առաջին պատերազմի մասնակից, ծնունդով Շիրակի մարզի Հայրենյաց գյուղից, անմահ հերոս ԷԴԻԿ ՎՐԵԺԻ ՂԱԶԱՐՅԱՆԻ հիշատակի օրն է, ուղիղ 32 տարի է անցել։ Այսօր մարդաշատ էր Արթիկ համայնքի Հայրենյաց գյուղի հերոսների հուշահամալիրը։

Iravunk. com - ի Շիրակի մարզի թղթակիցը ներկա է գտնվել։ Անմահ հերոսներ ԷԴԻԿ ՂԱԶԱՐՅԱՆԻ և ԿԱՐԵՆ ՄՆԱՑԱԿԱՆՅԱՆԻ շիրիմներին այցելեցին, ծաղիկներ խոնարհեցին ու խնկարկեցին վարչական ղեկավար Գևորգ Մարտիրոսյանը, Շիրակի նախկին մարզպետ Ռոմիկ Մանուկյանը, Արթիկի ՀՅԴ «Թաթուլ Կրպեյանի» անվան կոմիտեի անդամները, նախագահ Ռազմիկ Պապիկյանի գլխավորությամբ, ինչպես նաև Արթիկի Երկրապահ Կամավորական ջոկատի անդամները, նախագահ Արթուր Զաքարյանի գլխավորությամբ, հերոսների հարազատներ, համագյուղացիներ։ Անմահ հերոսի մայրը, 91-ամյա ԱՐՓԻԿ տատը, Iravunk. com -ի Շիրակի մարզի թղթակցի հետ զրույցում, խորը ցավը սրտում նշեց.

«Էդիկս ծնվել է 1972 թվականի հուլիսի 11-ին, Հայրենյաց գյուղում։ Ծննդավայրի 8-ամյա դպրոցը սովորելուց հետո, ուսումը շարունակել է Հոռոմի միջնակարգ դպրոցում։ Ավարտելուց հետո, սովորել և ավարտել է նաև Արթիկի ուսումնարանը, ստացել դերձակի մասնագիտացում։ Ծառայել է բանակում։ 1994֊ի ապրիլին, հայրենի գյուղի կամավորների հետ միասին, որդիս կամավորագրվեց ու մեկնեց ԼՂՀ պատերազմի մասնակցելու։

Ցավոք, հենց մայիսի 8֊ին, Շուշիի ազատագրման օրը, զոհվել է հերոսաբար, Մարտակերտի շրջանի Ջրաբերդ գյուղում, հանուն սրբազան հայրենիքի, լինելով տակավին 22 տարեկան։ Որդիս հետմահու արժանացել է «Ոսկե մեդալի», «Հայրենիքի պաշտպանության համար», «Արիության համար» մեդալների, ԼՂՀ նախագահի կողմից։ Էդիկիս երազանքն էր Ղարաբաղը ազատագրված տեսնելը, որ ինձ ցույց տա» ։ Արարողության ժամանակ, Էդիկի ընկերները պատմում էին իրենց հիշողությունները, հիշում միայն լավն ու բարին, ընդգծում, որ շատ բարի ու կամեցող էր Էդիկը, բոլորին օգնության հասնող։ Էդիկի հրամանատարը ՎԱՐԴԱՆ ԿՈՍՏԱՆՅԱՆԸ, մեզ հետ զրույցում պատմեց. «Նույնիսկ պատերազմի ծանր ու դժվարին օրերին Էդիկը զինվորական տաք հագուստ է կարել /քանի որ դերձակ էր /, որպեսզի բաժանի ընկերներին։ Միջոցառման ավարտին հերոսի մայրը ԱՐՓԻԿ ՂԱԶԱՐՅԱՆԸ, իր շնորհակալական խոսքը հայտնեց բոլոր ներկաներին ու ասաց. « Թող էլ երբեք պատերազմ չլինի ու ոչ մի մայր չտեսնի այն դաժան ցավը, ինչը ես եմ տեսել, զգացել, խաղաղություն մեր երկրին»։

ՀԱՎԵՐԺ ՓԱՌՔ ՈՒ ԽՈՆԱՐՀՈՒՄ ՄԵՐ ԲՈԼՈՐ ԱՆՄԱՀ ՀԵՐՈՍՆԵՐԻՆ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝