Սպասվում է հանձնման թույլտվության մասին որոշում. Նոր զարգացումներ Խորխոռունու սպանության գործով

Հանդիպում 22 Մայիս, 2026 20:22

Ի՞նչ զարգացումներ կան 1998թ․ դեկտեմբերի 10-ին՝ Երևանում՝ իր բնակարանի շքամուտքում պաշտպանության նախկին փոխնախարար Վահրամ Խորխոռունու սպանության գործով մեղադրյալ Հրայր Նարիմանյանի գործով, ով վերջերս ձերբակալվել է ՌԴ-ում։ Ի՞նչ ցուցմունք է տվել ՌԴ-ում Նարիմանյանը, հաշվի առնելով գործի հնչեղությունը մտավախություն ունի՞ փաստաբան պաշտպանյալի կյանքի նկատմամբ հարցը «Իրավունքը» հետաքրքրվել է Նարիմանյանի շահերի ներկայացուցիչ ՌԱՖԱՅԵԼ ՄԱՐՏԻՐՈՍՅԱՆԻՑ.

- Առանձնապես տեղաշարժ չկա։ ՌԴ Հրայր Նարիմանյանը դատարանում հայտարարել է, որ հանձնման հարցում ոչ թե դեմ չէ, այլ խնդրել է արագացնել հանձնումը։ Ես նշել էի, որ հանձնման իրավական պայմանները տրված են օրենսդրությամբ ՌԴ գլխավոր դատախազությանը։ Նրա փաստաբանը արդեն երկրորդ անգամ դիմել է ՌԴ գլխավոր դատախազին արագացված ընթացակարգով հանձնման մասին որոշում կայացնելու համար։ Ըստ տեղեկությունների ամեն օր սպասվում է հանձնման թույլտվության մասին որոշման կայացմանը։ Սակայն մտահոգում է մի առանցքային խնդիր, որ ՌԴ կարող է Հրայր Նարիմանյանի հանձնումը մերժել; Ես դա պայմանավորում եմ ՌԴ-ՀՀ քաղաքական բարդ հարաբերություններով։ Չնայած նրան, որ հանձնման գործընթացը շատ հաճախ կապված չէ քաղաքական հարաբերություններով, այդուհանդերձ, քանի որ Հրայր Նարիմանյանը մեղադրվում է ՊՆ տեղակալի սպանության մեջ, ով նշանակալի դերակատարում է ունեցել հայրենիքի պաշտպանության գործում, ապա այդ հանգամանքը կարող է նպաստել հանձնման որոշմանը, անշուշտ մեզ համար բացասական իմաստով։ Բացասական այն տրամաբանությամբ, որ Հրայր Նարիմանյանը ոչ թե խուսափում է քրեական վարույթ ներկայանալուց, այլ նա վերջին հաշվով մեծ ցանկություն ունի արդարադատության միջոոցով բեռնաթափվել։ Մեզ նաև անհանգստացնում է Սասուն Առուշանյանի դատավարությունը այն տրամաբանությունից ելնելով, որ քրեական վարույթում դրված են այնպիսի ապացույցներ, որոնք ձեռք են բերվել խոշտանգման, բառիս բուն իմաստով ֆիզիկական և հոգեբանական ներգործության անթույլատրելի մեթոդներով։Իսկ այդ ապացույցները արտահայտվում են ցուցմունքների տեսքով, որոնք տրվել է Հ․ Նարիմանյանի կողմից, ինչպես նշեցի բռնության արդյունքում, ընդ որում ՝ պարբերաբար ժամանակացույցով։ Մեզ անհանգստացնում է այն, որ դատարանը կարող է անօրինական ապացույցների միջոցով մեղավոր ճանաչել Սասուն Առուշանյանին և այդ դատական ակտը հետագայում օգտագործվել Հ․Նարիմանյանի դեմ։Իսկ ինչ վերաբերում է մեր դատախազությանը, ապա ինչպես նախկինում նշել էի, դատախազությանը հայտնի դառնալով Հ․Նարիմանյանի ցանկությունը՝վարույթին ներկայանալու մասին, օպերատիվ կարգով արձագանքել և դիմել է գրությամբ ՌԴ դատախազությանը։ Կարծում եմ, որ Հ․ Նարիմանյանի երկարատև կալանքի տակ գտնվելու հանգամանքը կարող է բացասաբար անդրադառնալ արդար դատաքննության իրավունքին, որպիսի մասին ՄԻԵԴ բազմիցս անդրադարձել է արագացված ընթացակարգով հանձնման ընթացքի վերաբերյալ։

Այս թեմայով