Ինչու են ձախողվել սրսկումները Երեւանում

Օրեր առաջ «Իրավունք»-ն անդրադարձել էր քաղաքում, մասնավորապես՝ Կենտրոնում եւ Արաբկիր վարչական շրջաններում մլակների աննախադեպ մեծաքանակությանը: Թե ինչ է կատարվում, եւ ինչի հետեւանքով է մլակապատ դարձել Երեւանը, ինչու են վարորդները անդադար բողոքում մեքենաների վրայի ծառի «շիրաներից», փորձեցինք պարզել քաղաքապետարանի «Կանաչապատում եւ շրջակա միջավայրի պահպանություն» համայնքային ոչ առեւտրային կազմակերպության տնօրեն ԱՐՄԵՆ ԲԵԳՈՅԱՆԻՑ:

— Պարոն Բեգոյան, քաղաքացիներն ահազանգում են, վարորդները բողոքում քաղաքում տիրող անհասկանալի եւ անոմալ մլակների քանակից ու ծառային «շիրաներից»: Ի՞նչ է կատարվում մայրաքաղաքում:

— Սա մլակի խնդիրն է, որը ծառերի վրա գցել չենք կարող, քանի որ ծառերի վրա լինում են որդ ու բլոճներ: Մլակները, առհասարակ, կարծում ենք, որ խոնավ եղանակի պատճառով է, քանի որ ամենօրյա ռեժիմով մեզ մոտ անձրեւներ են լինում: Երկրորդ պատճառը, որ մլակները կենտրոնացվել են Երեւանում, Թեղի ծառատեսակի խնդիրն է, որոնց փոխարինում ենք, սակայն ոմանք դա մանիպուլացնում են եւ այլն: Այդ ծառերը հիվանդ են, եւ դրանցից որդ ու բլոճ, ինչպես նաեւ ժողովրդական լեզվով ասենք՝ «շիրան» թափվում է:

Ինչպես բազմիցս ասել եմ, այդ ծառերի դեմ պայքարն անարդյունավետ է, որովհետեւ նրանք ծեր են եւ կենսունակության ավարտի մոտ են, իմունիտետ չունեն եւ չեն տրվում բուժման: Որպեսզի այդ շիրան կտրվի, պետք է ծառերի քիմիական պայքարի միջոցները, այն է` սրսկումները,  օգտագործենք թույլատրելիից ավել, ինչը շատ ավելի վնասակար կլինի ազգաբնակչության համար, քան մլակների կամ որդերի առումով: Հետեւաբար, երբեք թույնի դոզաները թույլատրելի սահմանից չենք անցել: Իսկ թույլատրելի սահմանում անօգուտ է ստացվում, քանի որ ծառը կենսունակության ավարտին է մոտեցել: Կարծում եմ՝ նաեւ մլակները, որոնք կետրոնացել են Երեւանի որոշակի հատվածում, պատճառը նաեւ այդ ծառատեսակներն են: Այս իսկ պատճառով չորս տարի է ասում եմ, որ նրանք ենթակա են հատման եւ փոխարինման:

Եվ երրորդ պատճառը. Երեւան քաղաքում մենք մարտի 20-ից սկսել ենք սրսկման աշխատանքները: Բոլոր վարչական շրջանները 2 անգամ սրսկվել են, կենտրոնը՝ 3 անգամ, սակայն հաշվի առնելով անձրեւների քանակը, անարդյունավետ է ստացվել, քանի որ ամեն սրսկելուց անմիջապես հետո անձրեւներ են տեղացել, եւ դեղը մաքրել տարել է անձրեւը: Ինչպես գիտեք, սրսկումից հետո պետք է անձրեւ չլինի գոնե մի քանի օր, որպեսզի այդ թույներն ազդեն: Սակայն մենք նման կլիմա չենք ունեցել, հետեւաբար, սրսկումը արդյունք չի տվել: Երեւանցիներին կասեմ, եթե գոնե մեկ շաբաթ տեղումներ չսպասվեն, մենք ինտենսիվ թույլատրելի նորմաներով սրսկումներ կկատարենք, եւ կարծում եմ՝ արդյունքը կերեւա:

—Անձրեւներ եղել են նաեւ նախորդ տարիներին, ի դեպ, անցյալ տարի ավելի մեծ քանակությամբ, սակայն քաղաքը մլակախեղդ չէր եղել...

— Այո, իրավացի եք: Անցյալ տարի շատ ինտենսիվ անձրեւների շաբաթ ենք ունեցել, բայց դրանից հետո ունեցել ենք չոր ժամանակահատված: Այս տարի ամեն օր ենք անձրեւներ ունենում: Ես քաջատեղյակ եմ, քանի որ սրսկումից հետո ինձ զեկուցել են, որ 3-4 ժամ հետո անձրեւների պատճառով սրսկումները եղել են անարդյունավետ: Այո, ավելի ինտենսիվ եղել են, բայց ամենօրյա ռեժիմով չեն եղել:

Կարծում եմ, եթե գոնե մի 10 օր անտեղում եղանակ լինի, այդ խնդիրը լուծում կստանա, որովհետեւ ի տարբերություն անցած տարվա՝ պետք է նշեմ, որ Երեւանի քաղաքապետարանը ձեռք է բերել երկրորդ՝ ավելի հզոր սրսկման գործիք: Եվ եթե նախորդ տարիներին մեկ գործիքով էինք անում, այս տարի երկու հզոր գործիքով ենք անելու:
Մեն չենք սրսկում մլակների համար, մենք սրսկում ենք ծառերի վնասատուների դեմ, բայց նաեւ այդ սրսկումները, որպես քիմիա, ոչնչացնում են նաեւ մլակներին:

ՆԱՆԱ ՍԱՐԳՍՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝