«Ռոսիա» տոնավաճառի հազարավոր վարձակալներ կրկին կանգնած են լուրջ սոցիալական աղետի շեմին

Վարձակալների բողոքի ալիքը ստիպեց տնօրինությանը ժամանակավորապես նահանջել։ Խոստացվեց վերանորոգումը հետաձգել մի քանի ամսով և ավարտից հետո վերադարձնել նրանց իրենց տարածքները։ Սակայն այսօր արդեն ակնհայտ է՝ այդ ամենը եղել է կեղծիք։ Խոստումները տրվել էին միայն նախընտրական շրջանում լարվածությունը մեղմելու և վարձակալների ձայները շահարկելու համար։

 

Այսօր նրանց կրկին վերջնագիր է ներկայացվել՝ մինչև սեպտեմբերի 1-ը ազատել տարածքը։ Իսկ վերանորոգումից հետո նախատեսվում է տարածքը հանձնել բրենդային խանութներին, մինչդեռ տարիներով այստեղ աշխատած մարդկանց առաջարկվում են անիրատեսական պայմաններ՝ վերևի հարկերում, որտեղ բիզնես վարելը գրեթե անհնար է։

 

Փաստացի, «Ռոսիա» տոնավաճառի սեփականատերերը խաբել են հազարավոր մարդկանց, օգտագործել նրանց և այժմ թողնում են սոցիալական ծանր հետևանքների առաջ։ Այո՛, պետք է նաև ասել անհարմար ճշմարտությունը․ այս իրավիճակում վարձակալների մի մասն ունի իր պատասխանատվությունը։ Տարիներ շարունակ բացակայում էր սկզբունքայնությունը, համախմբվածությունն ու պայքարի պատրաստակամությունը։ Շատերը ակտիվանում են միայն այն պահին, երբ իրենց անձնական շահն է վտանգվում, ոչ թե այն ժամանակ, երբ վտանգվում է երկրի ապագան։

 

Բայց միևնույն ժամանակ, սա չի վերացնում հիմնական փաստը՝ այսօր մենք գործ ունենք մարդկանց հետ, ովքեր հայտնվել են ծանր սոցիալական վիճակում։ Եվ այս խնդիրը չի կարող դիտարկվել միայն որպես անհատական սխալների հետևանք, այլ նաև համակարգային անարդարության արդյունք», - գրել է քաղաքական մեկնաբան ԱՆԻ ԿԱՐԱՊԵՏՅԱՆԸ։