Այս համախտանիշով տառապող մարդը չի ունենում մեղավորության զգացում.Հոգեբույժը բացահայտում է, թե որ պաթոլոգիայի մասին է խոսքը

Հայտնի հոգեբույժ Կարեն Ասլանյանը անդրադարձել է տարածված համախտանիշի, որը ունի խորը արմատներ.

Աստենո-դեպրեսիվ համախտանիշը վիճակ է, որը բժիշկը կարող է նախնական ախտորոշել պացիենտի հետ առաջին հանդիպման ժամանակ, երբ համադրվում են ինչպես աստենիան (թուլությունը), այնպես էլ դեպրեսիան: Այս համախտանիշը չի դասակարգվում DSM-5-ում և ՀՎԴ-11-ում (ICD-11), որովհետև ինքնուրույն խանգարում չէ․ այն ընդամենը համախտանիշ է, որն ուղեկցում է այլ խանգարումների և հիվանդությունների: Աստենո-դեպրեսիվ համախտանիշը նման է մոլորակի արբանյակի, և, կարծես արբանյակ լինելով, այն ազդում է մոլորակի՝ այն հիմնական հիվանդության վրա, որին ուղեկցում է:
Ինչպես է արտահայտվում աստենո-դեպրեսիվ համախտանիշը
Մարդը մշտական հոգնածության և ճնշվածության զգացում է ունենում: Բուն անվանումն արդեն հուշում է ախտաբանական վիճակի երկու տեսակի մասին.
1. «Աստենո»՝ հունարեն a sthenos-ից, այսինքն՝ «անուժ/առանց ուժի»: Աստենիկ ախտանիշներն են՝ մշտական հոգնածություն, գրգռվածություն, քնի խանգարում:
2. «Դեպրեսիվ»՝ «դասական» դեպրեսիայի ախտանիշներն են՝ ճնշված տրամադրություն, հոգեկանի շարժողական և մտածողական դանդաղում:
Աստենո-դեպրեսիվ համախտանիշի կլինիկական պատկերը ներառում է.
 Ճնշված տրամադրություն, սակայն առանց թախծի և անօգնականության/հուսահատության զգացման.
 Վատ տրամադրության գագաթնակետը առավոտյան ժամերին.
 «Քուն-արթնություն» ցիկլի խանգարում, հաճախակի զարթնումներ.
 Թուլություն, ֆիզիկական անուժություն.
 Լացկանություն.
 Էներգիայի բացակայություն.
 Սովորական կենցաղային գործողությունների համար ուժերի պակաս:
Ուշադրություն. Աստենո-դեպրեսիվ համախտանիշ ունեցող մարդը սովորաբար չի ունենում ցածրարժեքության կամ մեղավորության զգացում:
Ովքեր են հակված աստենո-դեպրեսիվ համախտանիշին
Այն մարդիկ, ովքեր չեն կարողանում լիարժեք հանգստանալ ինտենսիվ մտավոր ու ֆիզիկական ծանրաբեռնվածության կամ գիշերային ժամերին աշխատելու պատճառով:
Ինչպես են բուժում աստենո-դեպրեսիվ համախտանիշը
Աստենո-դեպրեսիվ համախտանիշի բուժման համար մասնագետները կիրառում են համալիր մոտեցում՝ նշանակելովոչ միայն դեղորայք, այլև հոգեթերապիա: Բժշկի խնդիրն է պացիենտի մոտ ձևավորել դրական աշխարհընկալում և առողջ ապրելակերպ: Ոչ դեղորայքային բուժումն ակտիվացնում է օրգանիզմի վերականգնողական ֆունկցիաները, նորմալացնում աշխատանքի և հանգստի ռեժիմը:
Դեղորայք բժիշկը կարող է նշանակել դեպրեսիայի և աստենիայի դեմ ավելի ակտիվ պայքարելու համար: Դեպրեսիան բուժելուն օգնում են հակադեպրեսանտները, առաջին հերթին՝ սերոտոնինի հետհավաքման ընտրողական ընկճողները (SSRI). սերոտոնինը կարգավորում է տրամադրությունը, քնի և արթնության ցիկլերը: Աստենիկ արտահայտությունների շտկման համար բժիշկը կարող է նշանակել տագնապամարիչ պատրաստուկներ. դրանք պացիենտին հանգստություն են հաղորդում:
Ինչպես հայտնաբերել աստենո-դեպրեսիվ համախտանիշը
Ինքնախտորոշմամբ զբաղվել պետք չէ․ ճիշտ ախտորոշումը կսահմանի միայն մասնագետը: Այնուամենայնիվ, դուք կարող եք գնահատել ձեր վիճակը դեպրեսիայի ախտորոշման հարցաթերթիկի միջոցով: Եթե հարցաթերթիկը ցույց է տալիս դեպրեսիա, և այդ վիճակը տևում է երկու շաբաթից ոչ պակաս, անպայման դիմեք բժշկի:
Եղեք առողջ:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝