Նոր աստղային չելենջ․ ո՞վ կընդունի այն Հայաստանում

ՌԴ ժողովրդական արտիստ Օլեգ Գազմանովը 75-ամյակը նշել ոչ միայն բեմում, այլեւ հատակին։ Հուլիսի 22-ին երգիչը տեսախցիկի առաջ 75 հրում է կատարել՝ ցույց տալով, որ տարիքը իր համար վատ մարզավիճակում լինելու արդարացում չէ։ Բայց այս պատմության ամենահետաքրքիր մասը սկսվել է դրանից հետո. Գազմանովը իր հետեւորդներին առաջարկել է կրկնել իր արդյունքը։

Պարզվում է՝ Գազմանովը տարիներ շարունակ մարզվելով՝ իր համար հատուկ կանոն է սահմանել՝ յուրաքանչյուր տարեդարձին մեկ հրում էլ ավելացնել։ 50 տարեկանում՝ 50, 60-ում՝ 60, 74-ում՝ 74։ Այս տարի հերթը հասավ 75-ին։ Երգիչը նաեւ ասել է, որ մտադիր է շարունակել այս ավանդույթը եւ 100 տարեկանում կատարել 100 հրում։ Սակայն, այս անգամ գազմանովյան անձնական սովորությունը վերածվել է սոցիալական ցանցերում նետված մարտահրավերի։

ԱՌԱՋԻՆԸ ԼԱԶԱՐԵՎՆ ԷՐ

Գազմանովի կոչին առաջիններից արձագանքեցին ռուսական շոուբիզնեսի հայտնի դեմքերը։ Սերգեյ Լազարեւը չփորձեց կրկնել 75-ը. նա պահպանեց չելենջի տրամաբանությունը եւ կատարեց իր տարիքին համապատասխան՝ 43 հրում։

Այդ տրամաբանությամբ չելենջին միանալու փորձ է արել նաեւ երգչուհի Սլավան։ Նրա տեսանյութը, սակայն, ավելի շատ զվարճալի դրվագ է դարձել, քան մարզական ցուցանիշ. 46 հրում խոստացած երգչուհին բավական արագ հասկացավ, որ այդ թիվը միայն թղթի վրա է հեշտ։

ԻՍԿ ԼԵՐԱ ԿՈՒԴՐՅԱՎՑԵՎԱՆ ՓՈԽԵՑ ԿԱՆՈՆՆԵՐԸ

Ամենազվարճալի արձագանքներից մեկը հեռուստահաղորդավարուհի Լերա Կուդրյավցեւայինն էր։ Նա որոշեց չմտնել հրումների մրցավազքի մեջ եւ առաջարկեց իր տարբերակը՝ տարիքի թվով կարտոֆիլ ֆրի ուտել։

Այսպիսով, չելենջը սկսեց ապրել իր սեփական կյանքով։ Մեկի համար այն մարզական փորձություն է, մյուսի համար՝ հումորի առիթ։

Ի՞ՆՉ ԿԼԻՆԻ ՀԱՅԱՍՏԱՆՈՒՄ

Այստեղ պատմությունը դեռ նոր կարող է սկսվել։ Հայաստանում այս պահին չարժե որեւէ հայտնիի անուն ներկայացնել որպես չելենջի մասնակից, քանի դեռ նա հրապարակային կերպով չի արել այդ քայլը։ Փոխարենը հարցն ավելի հետաքրքիր է՝ ո՞վ կլինի առաջինը։

Հայկական շոուբիզնեսում, քաղաքական դաշտում կան մարդիկ, որոնց համար 30-40 հրումը լուրջ խնդիր չի լինի։ Կան նաեւ նրանք, ովքեր, հավանաբար, ավելի նախընտրելի կհամարեն Կուդրյավցեւայի տարբերակը։

Իսկ մեզ մնում է հիշեցնել կանոնը՝ Գազմանովի մարտահրավերը շատ պարզ է. այստեղ հատուկ մարզասարք, բարդություն կամ երկար նախապատրաստություն չկա։ Պետք է միայն որոշել՝ քանի տարեկան ես եւ արդյոք պատրաստ ես այդ թիվը «պառկեցնել հատակին»։

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝