Ավելի հարմար օր դժվա՞ր էր գտնել․ ԶԱՐՄԱՆՔ

Մինչ այս օրերին արցախցիները սպասում էին ոգեկոչման եւ մխիթարության խոսքերի, Արցախի հայաթափման տարելիցին թեմի նախկին առաջնորդ Տ. ՊԱՐԳԵՎ արքեպիսկոպոս ՄԱՐՏԻՐՈՍՅԱՆԸ սոցցանցերում աչքի ընկավ ամերիկյան վիզա ունենալու լուրով: Նա ԱՄՆ-ում EB-1 ներգաղթային վիզա է ստացել։ Այս մասին իր ինստագրամյան էջում հայտնել է ամերիկաբնակ փաստաբան Քրիստինե Պարիկյանը։ Վերջինս լուսանկար է հրապարակել, որում ինքն ու Պարգեւ սրբազանը ձեռքում պահում են ստացված վիզան: Փաստաբանի խոսքով՝ սա բացառիկ դեպքերից է, քանի որ հոգեւորականները սովորաբար ստանում են այլ կատեգորիայի վիզա՝ EB-4 (աշխատանքային չորրորդ նախապատվության կարգավիճակ ունեցող մշտական բնակության (Green Card) վիզա, որը նախատեսված է հատուկ ներգաղթյալների համար)։ Իհարկե, կարելի է ըմբռնումով մոտենալ, որ սրբազանը վատառողջ է, այլապես որեւէ բացատրություն չէր ունենա իր ժողովրդին մենակ թողնելը` զրկված ռազմաքաղաքական ու հոգեւոր առաջնորդներից: Բայց լուսանկարվելու ու այն հրապարակելու համար ավելի հարմար օր դժվա՞ր էր գտնել: Եվ իր բացառիկ վիզայի մասին ամենքիս աչքալուսանք տվող սրբազանը, հետաքրքիր է` ինչո՞ւ է լռում Մայր Աթոռի ու Վեհափառ հայրապետի դեմ իշխանական առկա հալածանքների մասին: 

Ի դեպ, ի տարբերություն Պարգեւ սրբազանի` Անվտանգության խորհրդի նախկին քարտուղար, ծնունդով արցախցի ԱՐՄԵՆ ԳՐԻԳՈՐՅԱՆՆ էլ պարգեւատրվել է «Հայրենիքին մատուցած ծառայությունների համար» մեդալով: Անդրադառնալով վերոնշյալին` ԱԺ ութերորդ գումարման «Պատիվ ունեմ» խմբակցության նախկին պատգամավոր Տիգրան Աբրահամյանը գրել է․«Առաջին հարցը, որ առաջ է գալիս՝ ո՞ր հայրենիքի: Արմենի հայրենիքն իր ղեկավարը, իր քաղաքական թիմը, հենց ինքը հռչակել են Ադրբեջան: Այսինքն՝ ստացվում է, որ Արմեն Գրիգորյանն Ադրբեջանին նշանակալի ծառայություն է մատուցել՝ ինչպես այդ մեդալի բնութագիրն է, դրա համար էլ պարգեւատրել են: Ինչ մեդալ էլ բաժանեք, ինչ պաշտոն էլ տաք, տո մարշալի կոչում էլ շնորհեք՝ մեկ է, Արմեն Գրիգորյանը մնալու է իր արմատներն ու հայրենիքը ուրացած, Արցախի հանձման գործում նշանակալի դեր ունեցած ու մեր ժողովրդի շահերը սակարկման դրած անձ»: Էլ ի՞նչ ասենք, Աբրահամյանը հանգամանալից արդեն ասել է, մեզ մնում է միայն զարմանալ:

Իսկ ահա հաճելիորեն տեղին առաջարկով է հանդես եկել Սահմանադրական եւ վարչական իրավունքների մասնագետ, իրավագետ ՎԱՀԵ ԳՐԻԳՈՐՅԱՆԸ: Նրա գնահատմամբ՝ Հայաստանում կա շատ ճոխացված հաշվարկներով 3 մլն հայ, որի դեպքում 31 պատգամավոր ունենալը լրիվ բավարար է Ազգային ժողովի արդյունավետ աշխատանքներն ապահովելու համար։ «Ամեն 100 հազարին մեկ ներկայացուցիչ, հակառակը` զուտ հարկատուների հաշվին պորտաբուծարան պահել է։ Ընդ որում` Ազգային ժողովի որ գումարումը նայես, իշխանություն-ընդդիմություն միասին վերցրած` մի 20-30 հոգի են աշխատում. մնացածը` նորահարսի դեմքով լուռ նստած են, բայց 5 տարի մեր հաշվին, ոչ թե փեսացուի», - ընդգծել է նա։ Թերեւս այստեղ խոսքը միայն թվաքանակի մասին չէ. երբ պետությունը կարող է տարիներով վճարել ոչ թե կատարված աշխատանքի, այլ պարզապես պաշտոնական ներկայության համար, արդեն օրինաչափ հարց է առաջանում՝ օրենսդիրում եւ գործադիրում ավելորդն աթոռնե՞րն են, թե՞ հենց այդ աթոռներին նստածների մի մասը։

ԶԱՐՄԱՑԱԾ Է «ԻՐԱՎՈՒՆՔ»-Ը

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝