Քաղաքապետարանն էլ ինքն ա՞

Թեպետ Տիգրան Ավինյանի բախտը ժամանակին ժպտաց եւ չստանալով ժողովրդի մեծամասնության քվեն` դարձավ Երեւանի 9 տոկոսանոց քաղաքապետ, բայց, արի ու տես, որ մամուլի քարտուղարի հարցում ոչ մի կերպ բախտը չի բերում։ Արդեն երրորդ խոսնակին է փոխում, բայց դրանից ոչ մի օգուտ՝ առնվազն խայտառակ փիառի տեսանկյունից։

Բոլորովին վերջերս Ավինյանի մամուլի քարտուղար նշանակված ՔՊ-ական նախկին պատգամավոր Ջուլիետա Ազարյանը տպավորություն է, թե ոչ մի կերպ չի կարողանում ձերբազատվել այն մտքից, որ ինքն այլեւս պատգամավոր չէ եւ պետք է զբաղվի ոչ թե սեփական, այլ Ավինյան Տիգրանի փիառով։

Եթե Նիկոլ Փաշինյանն ասում էր, որ «կառավարությունը ես եմ», կառավարության աշխատակազմի ղեկավար, մշակույթի նախկին նախարար Լիլիթ Մակունցը պնդում էր, որ մշակույթն իր մեջ է, ապա հիմա հայտնվել է երրորդ տարբերակը՝ քաղաքապետարանն էլ, կարծես, հենց ինքը՝ Ջուլիետա Ազարյանն է։

Ուղղակի, անհնար է չնկատել, որ Ազարյանը տեղին-անտեղին էքսցենտրիկ մեկնաբանություններով է հանդես գալիս հերիք չէ, մի հատ էլ պարտադիր հանգամանք է համարում՝ իր լուսանկարը մեկնաբանության հետ հրամցնելը սոցցանցում։ Օրինակ, գրառումը կարող է սկսվել «Երեւանի քաղաքապետարանը որեւէ հրահանգ չի՛ ստացել․․․» տողով, իսկ կից լուսանկարում Ջուլիետան է մտահոգ դեմքով եւ ոչ թե քաղաքապետարանի ֆասադը կամ Ավինյանի սֆաթը։

Եվ, ընդհանրապես, Ջուլիետա Ազարյանը հանդիպումներ է ունենում, քաղաքական հայտարարություններ անում, անգամ այն, որ Տիգրան Ավինյանը հանդես պետք է գա մամուլի ասուլիսով, կրկին հայտարարությունը զարդարում իր լուսանկարով։ Այս ամենից կարելի է մի քանի եզրակացություն անել․ կա՛մ Ազարյանն ինքնասիրահարված է եւ իր տեղում չէ, կա՛մ հատուկ է նշանակվել, որ ստվերի Ավինյանին, իսկ թե ով է վերջինիս պարտադրել՝ որպես մամուլի քարտուղար նշանակել մեկին, ով չունի ո՛չ համապատասխան կրթություն, ո՛չ էլ իր գործառույթների հետ որեւէ աղերս ունեցող աշխատանքային փորձ, դա էլ թող Երեւանի քաղաքապետին մտահոգի։ Մարդն ասում էր չէ՞՝ «Ասեք, կանենք», երեւի, ասել են, նշանակել է․․․

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝