ՇՏԱՊ. Մինչեւ քրեական պատասխանատվության հարցի պատշաճ լուծումը, անձի հանձնումը պետք է հետաձգվի. Հայտնի փաստաբանը ադրբեջանցի զինվորի վերաբերյալ

Ադրբեջանցի զինվորը լքել է զորամասը, ապօրինի հատել է Հայաստանի Հանրապետության սահմանը և հրազենով վնասվածք է պատճառել Հայաստանի Հանրապետության քաղաքացուն։ Այդ ընթացքում Ադրբեջանի լիազոր մարմինը տեղեկացրել է Հայաստանի Հանրապետության լիազոր մարմնին, որ իր զինծառայողն ապօրինի լքել է զորամասը և հատել պետական սահմանը։ Ադրբեջանի զինծառայողը ձերբակալվել է Հայաստանի իրավապահ մարմինների կողմից։

Ադրբեջանի զինծառայողը զորամասը լքելիս, ըստ էության, հանցագործություն է կատարել Ադրբեջանի քրեական օրենսդրությամբ։ Միաժամանակ, Հայաստանի Հանրապետության տարածքում ապօրինի հատելով պետական սահմանը և հրազենային վնասվածք պատճառելով Հայաստանի Հանրապետության քաղաքացուն՝ նա Հայաստանի Հանրապետության տարածքում կատարել է ևս մեկ կամ մի քանի հանցագործություն։

Այս դեպքում ո՞ր երկրում պետք է հարուցվի քրեական գործը՝ Ադրբեջանո՞ւմ, թե՞ Հայաստանի Հանրապետությունում «Իրավունքը» խնդրել է մեկնաբանություն հայտնի իրավապաշտպան, միջազգային իրավունքում իր հետքը թողած աղմկոտ գործերով փաստաբան Լեվոն Բաղդասարյանից.

- Մինչև Հայաստանի Հանրապետությունում իրականացվող քրեական վարույթով անհրաժեշտ դատավարական գործողությունների ավարտը և քրեական պատասխանատվության հարցի պատշաճ լուծումը, անձի հանձնումը պետք է հետաձգվի։
Հակառակ մոտեցումը կարող է վտանգել քրեական հետապնդման արդյունավետությունը, տուժողի արդարադատության մատչելիության իրավունքը և Հայաստանի քրեական իրավազորության փաստացի իրականացումը։
Հայաստանի Հանրապետության ինքնիշխանությունը չի ավարտվում պետական սահմանը հատելու պահին։ Այն ենթադրում է նաև այդ սահմանը խախտած և Հայաստանի քաղաքացու նկատմամբ հանցագործություն կատարած անձին ներպետական օրենքի ուժով պատասխանատվության ենթարկելու իրավասության պարտադիր պայման։
Հանցագործության կատարման վայրի պետության իրավազորությունը չի կարող շրջանցվել հանցագործություն կատարած անձի քաղաքացիության կամ զինվորական պատկանելության վկայակոչմամբ։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝