Միջազգային թատրոնի մասնագետները Երևանում են․ մեկնարկել է HFPAM-ը

Երևանում հոկտեմբերի 3-ին մեկնարկել է HFPAM (HIGH FEST Performing Arts Market) կատարողական արվեստների միջազգային տարածաշրջանային շուկան, որն անցկացվում է «Հայ ֆեստ» կատարողական արվեստների միջազգային 24-րդ փառատոնի շրջանակում և կշարունակվի մինչև հոկտեմբերի 5-ը։ Այն տարածաշրջանում անցկացվում է առաջին անգամ։

HFPAM-ը համախմբում է տեղական և միջազգային մշակութային կազմակերպությունների, փառատոների, արվեստագետների և մշակութային մենեջերների ներկայացուցիչների՝ ստեղծելով հարթակ միջազգային համագործակցությունների, մասնագիտական կապերի և նոր համատեղ նախաձեռնությունների զարգացման համար։

Այս տարի HFPAM-ի շրջանակում Երևանում հյուրընկալվել է շուրջ 30 միջազգային փորձագետ և ոլորտի մասնագետ՝ 16 երկրից։ Նրանց թվում են ներկայացուցիչներ Լեհաստանից, ԱՄՆ-ից, Ֆրանսիայից, Չինաստանից, Ռուսաստանից, Վրաստանից, Թուրքիայից, Մեծ Բրիտանիայից, Կիպրոսից և այլ երկրներից։ Հյուրերի թվում են միջազգային փառատոների ղեկավարներ, թատրոնների և մշակութային կազմակերպությունների ներկայացուցիչներ, պրոդյուսերներ և կատարողական արվեստների ոլորտի այլ մասնագետներ։

Շուկայի ծրագրում անցկացվում են պանելային քննարկումներ և փիչինգ ձևաչափով մասնագիտական հանդիպումներ, որոնք ուղղված են միջազգային համագործակցությունների զարգացմանը, մասնագիտական կապերի ընդլայնմանը և նոր համատեղ նախաձեռնությունների ձևավորմանը։ HFPAM-ի հիմնական նպատակն է ստեղծել և ամրապնդել միջազգային համագործակցությունները, ինչպես նաև Հայաստանը դիրքավորել որպես տարածաշրջանային մշակութային հանգույց, որտեղ կարող են ձևավորվել արդյունավետ կապեր Հայաստանի և միջազգային փառատոների, մշակութային կազմակերպությունների, ստեղծարար հարթակների ու մասնագիտական ցանցերի միջև։

Ծրագրի արդյունքում ակնկալվում է ձևավորել նոր միջազգային մշակութային համագործակցություններ և գործընկերային կապեր, բարձրացնել Հայաստանի մշակութային կազմակերպությունների, անկախ թատերական խմբերի և արվեստագետների միջազգային ճանաչելիությունը, ինչպես նաև հիմքեր ստեղծել հետագա համատեղ ծրագրերի, փառատոնային հրավերների և երկկողմ համագործակցությունների համար։

Նախատեսվում է նաև ընդլայնել մասնագիտական միջազգային ցանցերը, խթանել փորձի փոխանակումը և ամրապնդել Հայաստանի դիրքը որպես տարածաշրջանային կատարողական արվեստների և մշակութային համագործակցության հարթակ։ Ծրագիրը կնպաստի նաև երիտասարդ և անկախ ստեղծագործողների ներգրավվածությանը միջազգային մշակութային գործընթացներում՝ նպաստելով մշակութային և ստեղծարար ոլորտների զարգացմանը։

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝