ՈՉՆՉԱՑՐԵԼ Է ԹՇՆԱՄՈՒ ՄԵԾԱՔԱՆԱԿ ԶԻՆՏԵԽՆԻԿԱ ԵՎ ՄԱՐԴՈՒԺ, ԶՈՀՎԵԼ ՀԵՐՈՍԱԲԱՐ». ԱՆՄԱՀ ՀԵՐՈՍ ԳԵՎՈՐԳ ՀՈՒՆՈՅԱՆ

«2020 թվականի Արցախյան 44-օրյա դաժան պատերազմում ցավոք կորցրեցինք հազարավոր լուսավոր երիտասարդների, նրանցից մեկն էլ ԳԵՎՈՐԳ ՄՆԱՑԱԿԱՆԻ ՀՈՒՆՈՅԱՆՆ էր։ Այսօր հոկտեմբերի 9-ը նրա հիշատակի օրն է, ուղիղ 6 տարի է անցել։ Շիրակի մարզի Ախուրյան խոշորացված համայնքի Ազատան գյուղի հերոսների պանթեոն այցելեցին հարազատներ, ընկերներ, համագյուղացիներ, ծաղիկներ խոնարհեցին և խնկարկեցին։

Iravunk. com -ի Շիրակի մարզի թղթակիցը ներկա է գտնվել։ Անմահ հերոս Գևորգ Հունոյանի եղբայրը ՎԱՐԴԳԵՍԸ, Iravunk. com -ի Շիրակի մարզի թղթակցի հետ զրույցում, խորը ցավը սրտում պատմեց.

«Եղբայրս ծնվել է 2001 թվականի փետրվարի 10-ին, Ազատան գյուղում։ Նա միշտ մեզ ասում էր, որ անպայման Արցախում է ծառայելու ու հենց այդպես էլ եղավ։ 2019֊ի հուլիսի 9-ին ծառայության անցավ Արա լեռան զորամասում, բայց պատերազմի առաջին իսկ օրվանից սկսած եղել է ամենաթեժ կետերում. Հորադիսում, Հադրութում, Վարանդայում։Եղբայրս առանց վարանելու կատարել է իր առջև դրված բացառապես բոլոր մարտական առաջադրանքները և իր գրադ տեսակի հրետանիով կարողացել է ոչնչացնել մեծաքանակ զրահատեխնիկա և հսկայական կորուստներ /մարդուժ/պատճառել նենգ թշնամուն։ Նրան նույնիսկ հետ չի պահել իր հրետանու անսարք վիճակը։ Ժամանակին ճիշտ կողմնորոշվելով, կարողացել է շատ արագ վերանորոգել և կրկին անցնել մարտական գործողությունների կատարմանը։ Ամեն օր զանգում էր ու բոլորից հարցնում։ Ասում էր, հո մեր մոտից մարդ չի եկել, թող ոչ ոք չգա, ես կկռվեմ բոլորի տեղը։ Եվ այո,Գևորգը կռվեց մեր բոլորի փոխարեն, չխնայելով ոչ մի բան։

Հայրենասիրությունն իր հոգու մեջ էր, նա ոչ մի անգամ չէր խոսում այդ մասին, սակայն իր կռվով ապացուցեց։ Միևնույն է, որքան էլ ժամանակ անցնի, երբեք չենք կարող համակերպվել այս դաժան իրողության հետ»։

Անմահ հերոս Գևորգ Հունոյանը հետմահու արժանացել է «Արիության» մեդալի։

ՈՉ ՈՔ ՉԻ ՄՈՌԱՑՎԵԼ, ՈՉԻՆՉ ՉԻ ՄՈՌԱՑՎԵԼ։ ՀԱՎԵՐԺ ՓԱՌՔ ՄԵՐ ԲՈԼՈՐ ԱՆՄԱՀ ՀԵՐՈՍՆԵՐԻՆ...

Պատրաստեց ՀՈՎՀԱՆՆԵՍ ՍԱՐԳՍՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝