ԳՅՈՒՄՐԻՆ ՆՇԵՑ ՔԱՂԱՔԻ ՕՐԸ ԱՌԱՆՑ ԲԱՐՁՐԱՍՏԻՃԱՆ ՀՅՈՒՐԵՐԻ

Հոկտեմբերի 17-ին, Հայաստանի արհեստների, արվեստների, մշակույթի, սպորտի դարբնոց Գյումրին նշեց քաղաքի օրը, համայնքային թանգարաններում /Հովհաննես Շիրազի, Ավետիք Իսահակյանի Ֆրունզիկ Մկրտչյանի/ կազմակերպված միջոցառումներով, թաղամասերում տոնական համերգային ծրագրերով, արհեստի ու արվեստի փառատոնով, ջրային մարզաձևերի մանկապատանեկան մարզադպրոցի վերաբացմամբ, կոչումների շնորհմամբ, Գյումրիի ոսկե մեդալի հանձնմամբ և «Տաշիր» բարեգործական ընկերության հետ հուշագրի ստորագրմամբ։

Iravunk. com -ի Շիրակի մարզի թղթակիցը ներկա է գտնվել։ Հովհաննես Շիրազի հուշատուն ֊թանգարանի բակում լավաշ հաց էին թխում, հյուրերը տեղում համտեսեցին թոնրից նոր դուրս ելած տաք լավաշը։ Ամենուր տիրում էր տոնական բարձր տրամադրություն։ Հանրապետության տարբեր բնակավայրերից մարդիկ եկել էին նշելու Գյումրիի օրը։ Մեծ թվով զբոսաշրջիկներ էին նաև ներկա։

Տոնակատարությունը ավարտվեց Վարդանանց հրապարակում տոնական համերգով, որը կազմակերպվել էր Սամվել Կարապետյանի «Տաշիր» բարեգործական հիմնադրամի միջոցներով։

Հատկանշական է, որ Գյումրիի տոնին ՀՀ Կառավարության անդամներից, ՔՊ֊ականներից ոչ մեկը չէր եկել մասնակցելու, նրանից ոմանք քննադատել են, թե ինչու պիտի բարերարի միջոցներով նշվի քաղաքի օրը։

Նշենք, որ համերգի ժամանակ ելույթներ ունեցան Անետ Աղաբեկյանը, Արշավիր Մարտիրոսյանը, «Հայաթ ֊պրոջեթ» խումբը։ Եղան նաև քննադատություններ, հատկապես Անետ Աղաբեկյանի երգելու շուրջ, թե սազական չէ Գյումրիին։

Ի դեպ, Գյումրիի «Վառեմ ֊մարեմի» ֊ի պատմական շենքը Սամվել Կարապետյանի հիմնադրամը ցանկանում է վերանորոգել ու այն անավարտ է մնացել, քանի որ այսօրվա իշխանությունները չեն թույլատրում։

ՀՈՎՀԱՆՆԵՍ ՍԱՐԳՍՅԱՆ

Հավանեցի՞ր հոդվածը, կիսվիր ընկերներիդ հետ

Հետևեք մեզ Telegram-ում Բաժանորդագրվեք Iravunk-ի ալիքին Iravunk հավելված Ներբեռնեք և եղեք միշտ տեղեկացված