Ինչո՞ւ է ընդհատվել «Գայանե» բալետի ներկայացումը․ հանդիսատեսը վրդովված է

Արամ Խաչատրյանի հանրահայտ «Գայանե» բալետի ներկայացումն անսպասելիորեն ընդհատվել է՝ տեխնիկական խնդրի պատճառով։ Այս մասին «Իրավունք»-ին տեղեկացրեց վրդովված հանդիսատեսը։  

Դեպքի առնչությամբ արդեն իսկ հայտարարություն է տարածել Հայաստանի ազգային օպերայի եւ բալետի թատրոնը՝ տեղեկացնելով, որ ներկայացումը կրկին կկայանա նոյեմբերի 6-ին՝ ժամը 19։00-ին։

Թատրոնը նաեւ հայտնել է, որ ներկայացման համար ձեռք բերված տոմսերը վավեր կլինեն վաղվա ներկայացման համար եւս։ Հանդիսատեսները կարող են ներկա գտնվել առանց տոմսերը փոխանակելու։ Իսկ նրանք, ովքեր կցանկանան վերադարձնել տոմսերի գումարը, կարող են դիմել Օպերային թատրոնի տոմսարկղ կամ ներկայացնել վերադարձի դիմում։

«Հայցում ենք Ձեր ներողամտությունը պատճառված անհարմարությունների համար։ Շնորհակալություն ենք հայտնում Ձեր ըմբռնման եւ ներողամտության համար»,– ասված է թատրոնի հայտարարությունում։

Թե կոնկրետ ինչ տեխնիկական խնդրի մասին է խոսքը, թատրոնի տարածած հաղորդագրության մեջ չի մանրամասնվում։