ԻՄ ՀԱՆԴԵՊ ԱՐԱԾԻ ՊԱՏԱՍԽԱՆԸ ՏԱԼԻՍ Է ԺՈՂՈՎՈՒՐԴԸ. ՌՈՄԱՆ ԱՄՐՈՅԱՆ
Արխիվ 16-20Հայրենի ոստիկաններն սկսել են կորցնել իրականության զգացումը այն աստիճան, որ սկսել են ցուցադրաբար անհամաչափ ուժ կիրառել անգամ աշխարհի չեմպիոնի՝ ՌՈՄԱՆ ԱՄՐՈՅԱՆԻ նկատմամբ: Մարդու, ում շնորհիվ Հայաստանի դրոշը բազմիցս բարձրացվել է վեր, ով քանիցս ծնկի է բերել թուրքերին: Ու այդ հաղթանակների հաշվին աշխարհը Հայաստանին ճանաչել է շատ ավելի, քան նրա նկատմամբ ուժ գործադրողների եւ հրաման տվող քայլոների ողջ կազմի:
Ինչպես է որակում կատարվածը Եվրոպայի առաջնությունների կրկնակի չեմպիոն, աշխարհի առաջնությունների եռակի մեդալակիր, Պեկինի Ամառային օլիմպիական խաղերի բրոնզե մեդալակիր Ռոման Ամրոյանը, «Իրավունքը» փորձեց պարզել նրանից, ով բառեր չէր գտնում ներկայացնելու կատարվածը.
- Վրդովված եմ, վիրավորված, չգիտեմ` ինչ բառերով նկարագրեմ զգացածս: Ես ինձ համար հանգիստ կանգնած եմ եղել: Կա տեսանյութ, երբ ոստիկանները գալիս ու սկսում են թեւերս ոլորել, իրենց սիրած օպերացիան իրականացնել` «ասֆալտին փռել»: Առանց փոքր-ինչ հարգելու անցած ճանապարհս` ինձ հետ վարվում են... չգիտեմ ինչ ասեմ... Ո՛չ խուլիգան եմ, ո՛չ փողոցային «ռազբորկեքի» սիրահար, սա անելու բան չէր, որ արեցին: Հարցնում եմ` ինչի՞ համար եք թեւերս քաշում, ասֆալտին պառկեցնում, ոստիկանն ասում է. «Լավ եմ անում, ի՞նչ ես խոսում»: Ի՞նչ ասեմ, ի՞նչ գնահատական տամ: Իմ հանդեպ արածի պատասխանը տալիս է ժողովուրդը, ինձ դա այս պահին շատ է սփոփում, շնորհակալ եմ իմ համակիրներին, իմ հայ ժողովրդին:
- Ռոման, սպասելի՞ էր Ձեզ համար, որ մի օր Ձեր երկրում նման վերաբերմունքի կարժանանաք, այն էլ՝ «Նոր Հայաստանում»:
- Գիտեք, հայաստանյան ներկայիս իշխանությունները չեն գանահատում մարդու անցած ուղին, ճանապարհը: Մի հարգանք կար` դա էլ արժեզրկեցին: Ի՞նչ եմ արել, որ ինձ հետ նման կերպ վարվեցին: Ես իմ անձնական կարծիքն եմ արտահայտել, գնացել կանգնել եմ մեր Օլիմպիական կոմիտեի նախագահի կողքին: Ա՛յ, հենց էսպես են ժողովրդին կիսում, չի կարելի, ես դատապարտում եմ կատարվածը: Եթե աշխարհահռչակ մարզիկի հետ են այդպես վարվում, պատկերացնում եմ, թե շարքային քաղաքացուն ինչ կանեն: Ոստիկան կոչվածները այնքան հպարտ էին թեւերս ոլորում, կարծես պադյեզդի խուժան լինեի: Չգիտեմ էլ ինչ ասեմ, ես ուղղակի ուզում եմ իմ շնորհակալությունը հայտնել իմ համակիրներին, մեր ժողովրդին, ովքեր իրենք են իմ փոխարեն գնահատական տալիս ոստիկանների վարքագծին: Ես կանգնել եմ մի մարդու կողքին, ով արած ունի սպորտի համար, ընդամենը:
- Պարոն Ամոյան, ոստիկանները գիտեի՞ն, թե դուք ով եք:
- Այո, իհարկե: Ես ասում եմ բան եմ ասում` լսեք: Ասում է. «Դու ով ես, որ բան ասես, արա»:
Ես ահավոր վատ եմ ինձ զգում, ցավ եմ զգում, որ իմ երկրում այսպես են ինձ գնահատում: Ոստիկանները պետք է հրապարակավ ներողություն խնդրեն, սա՞ է բարեփոխված ոստիկանությունը, սա՞ է Նոր Հայաստանը` խոսքեր չեմ գտնում: Ես վատ եմ զգում, որ ոստիկանների այսօրվա պահվածքը հասել է մինչեւ Միջազգային ֆեդերացիա: Միջազգային ֆեդերացիայում էլ արդեն տեղեկացան, թե ՀՀ-ում ինչպես են ոստիկան կոչվածները աշխարհահռչակ մարդուն ասֆալտին փռում, ու ինչի համար` միայն նրա, որ իր համար հանգիստ կանգնած էր:
Զրույցը` ԻԼՈՆԱ ԱԶԱՐՅԱՆԻ