ՕԳՈՍՏՈՍԻ 30-ԻՆ ՌՈԲԵՐՏ ՍԱՀԱԿՅԱՆՑԸ ԿԴԱՌՆԱՐ 70 ՏԱՐԵԿԱՆ
Մշակութային«Բանն այն է, որ իշխանությունը ոչ մի նշանակություն չունի իմ գործում: Նախեւառաջ, ես տղամարդ եմ: Իսկ տղամարդը միշտ, երբ գալիս էր մի նոր վայր, կառուցում էր իր տունը եւ գոյատեւում: Եթե կայսրը շիզոֆրենիկ էր, տղամարդու գործը ավելի բարդ էր, եթե նորմալ` ապա ավելի հեշտ: Սակայն նա միշտ կերակրում էր իր ընտանիքը եւ տնկում իր ծառը: Իսկ մեզ մոտ ընդունված է նստել եւ սպասել Ժողովրդական արտիստի կամ այլ կոչումներ, անհավանական անվանաթոշակներ` որպես երախտագիտության նշան: Ես դեռ կարող եմ ընդունել այն փաստարկը, որ կառավարությունը խանգարում է աշխատել: Բայց որ իշխանությունը չի օգնում, դա դեռ պատճառ չի, որ աղքատության եւ անգործության մատնվել»:
ՌՈԲԵՐՏ ՍԱՀԱԿՅԱՆՑ
Օգոստոսի 30-ին անիմացիոն ֆիլմերի ռեժիսոր, սցենարիստ, մուլտիպլիկատոր ՌՈԲԵՐՏ ՍԱՀԱԿՅԱՆՑԸ կդառնար 70 տարեկան: Իսկ թե ինչպիսին էր նա, որպես տան հայր եւ ինչը չէր հանդուրժում կյանքում, պատմում է նրա որդին` ռեժիսոր, մուլտիպլիկատոր ԴԱՎԻԹ ՍԱՀԱԿՅԱՆՑԸ:
– Ինչպիսի՞ն եք հիշում նրան:
- Ինձ շատ դժվար է խոսել հայրիկիս մասին, որովհետեւ նրա գնալուց հետո, ամեն Աստծո օր ես անընդհատ մտածում եմ նրա մասին: Անընդհատ մտքիս է հայրս: Նա չէր սիրում կեղծիքը եւ միշտ պայքարում էր դրա դեմ: Հենց այդ կեղծիքի դեմ պայքարը բնութագրում է նրան:
– Բացի կեղծիքից ի՞նչը չէր հանդուրժում կյանքում:
- Տգիտությունն ու սուտը: Այդ երեւույթները իրեն միշտ հունից հանում էին:
– Ովքե՞ր չէին կարող լինել նրա ընկերները:
-Տգետ եւ սուտասան մարդիկ: Կեղծ մարդը չէր կարող լինել նրա ընկերը: Նա երբեք չէր թողնում այդպիսի մարդկանց, որ իր շուրջը հավաքվեն:
– Ընտանիքում խի՞ստ հայրիկ էր:
Այո, շատ պահանջկոտ եւ շատ խիստ էր: Եվ միեւնույն ժամանակ ինչ-որ ազատություն էր տալիս: Մանավանդ ստեղծագործական կյանքում: Նա ե՛ւ օգնում էր, ե՛ւ աջակցում, ե՛ւ խրախուսում մեզ, որ ավելին անենք: Պահանջում էր ավելին եւ ստիպում էր մեզ անել միշտ ավելին: Կանգ չառնել եւ գնալ միայն առաջ: Չբավարարվել երբեք արվածով:
-Կպատմե՞ք նրա հետ կապված որեւէ հետաքրքիր դեպք:
– Դեպքերը շատ-շատ են: Ֆեյսբուքյան ստատուսը, որը երեկ գրեցի, կարծում եմ, դա ամենավառ դեպքերից մեկն էր` կապված նրա հետ: 1992 թվականին նա վերադարձավ Հայաստան: Վերադառնալով` մեծ գումար ուներ իր մոտ, քանի որ ավարտել էր BBC-ի պատվերով ֆիլմը: Երբ իրեն առաջարկեցին, թե Ռոբ, այդքան գումար ունես, տներ գնիր:
Նա պատասխանեց` ես մարոդյոր չեմ:
Նունե Զաքարյան