Օրերս Թբիլիսիում տեղի է ունեցել Վրաստանի, Թուրքիայի եւ Ադրբեջանի արտաքին գործերի նախարարներ Միխայիլ Ջանելիձեի, Մեւլութ Չավուշօղլու եւ Էլմար Մամեդյարովի եռակողմ հանդիպումը: Այն, որ այս հանդիպման ընթացքում Թուրքիան փորձելու էր իր համար բավականին ծանր իրավիճակում ստուգել, թե որքանով է կենսունակ Թբիլիսի-Բաքու առանցքը, ի սկզբանե էլ ենթադրելի էր: Այլ հարց է, թե փաստացի ի՞նչ ազդեցություն կարող է թողնել վերոհիշյալ հանդիպումը Հայաստանի վրա: Հաշվի առնելով նաեւ, որ վերջերս վրացագետները մտահոգություններ են հայտնում, թե Թուրքիան եւ Ադրբեջանը Վրաստանում ակտիվացրել են հակահայկական քարոզչությունը:
Մեկնաբանելով իրավիճակը՝ ԱԺ արտաքին հարաբերությունների հանձնաժողովի նախագահ ԱՐՏԱԿ ԶԱՔԱՐՅԱՆԸ նկատեց.-Վրաստանի Հանրապետության հետ մեր ջերմ բարեկամական հարաբերություններն ունեն շատ սպեցիֆիկ բնույթ եւ արտահայտված են երկկողմ եւ բազմակողմ ձեւաչափերով: Հայաստանը երբեք այնպիսի գործողություններ չի իրականացնում, որոնք ուղղակիորեն սպառնալիք են Վրաստանի համար, եւ հակառակը` Վրաստանի Հանրապետությունը երբեք չի անի այնպիսի գործողություն, որը որեւէ ձեւով սպառնալիք հանդիսանա մեզ համար: Բայց, իհարկե, դա չի բացառում, որ մեր պետություններից յուրաքանչյուրն ունենան իրենց երկկողմ օրակարգերը: Այս առումով՝ Վրաստանի նաեւ տնտեսական ուղղվածությամբ համագործակցությունը Թուրքիայի հետ նորություն չէ: Ամեն դեպքում՝ մենք հարգանքով ենք վերաբերում մեր հարեւան պետության արտաքին քաղաքականության ուղղություններին, բայց միեւնույն ժամանակ հուսով ենք, որ այն հետագայում չի գործի Հայաստանի շահերի դեմ:
Ինչպես արդեն նշեցի, պետք է հասկանալ, որ պետություններից յուրաքանչյուրն ունեն իրենց օրակարգը: Ճիշտ է՝ որոշ տեղեր դրանք չեն հատվում, բայց դա չի նշանակում, որ մենք ընդհանուր շահերը եւ համագործակցության եզրերը կորցնում ենք Վրաստանի հետ: Վրաստանի հետ մենք շարունակաբար ամրապնդել ենք, ամրապնդում ենք եւ ամրապնդելու ենք մեր բարեկամական հարաբերությունները եւ համագործակցությունը:
Ինչ վերաբերում է Վրաստանում հակահայկական քարոզչությանը, պատգամավորը հավելեց.
- Ադրբեջանն ու Թուրքիան ոչ միայն Վրաստանում, այլեւ շատ պետություններում են իրականացնում հակահայկական լոբբինգ: Բայց դա, իհարկե, չի նշանակում, որ կարող է ինչ-որ կերպ խաթարել երկու երկրների բարեկամական հարաբերությունները:
«ՎՐԱՍՏԱՆԸ ԶՍՊՈՂ ԴԵՐ
ԿԱՐՈՂ Է ՈՒՆԵՆԱԼ ՀԱԿԱՀԱՅ ԴՐՍԵՎՈՐՈՒՄՆԵՐՈՒՄ»
Ջավախքցի, ՀՀԿ խմբակցության պատգամավոր ՇԻՐԱԿ ԹՈՐՈՍՅԱՆՆ էլ կարծում է, որ Վրաստանը կարող է զսպող դերակատարում ունենալ հակահայ դրսեւորումներում.
- Այդ ձեւաչափը նորություն չէ, դա հաստատվեց Միխայիլ Սահակաշվիլու կառավարման տարիներին: Այն տեղավորվում էր Սահակաշվիլու պրոթուրքական քաղաքականության շրջանակներում եւ իր բնույթով տարածաշրջանում թուրք-վրաց-ադրբեջանական լծակ էր, որը կարելի էր ենթադրել, որ ինչ-որ տեղ կարելի էր ուղղել նաեւ Հայաստանի դեմ: Սակայն Վրաստանի մերօրյա իշխանությունները վստահաբար պնդում են, որ Թուրքիայի եւ Ադրբեջանի հետ համագործակցությունը որեւէ երրորդ երկրի դեմ ուղղված չէ. համենայնդեպս, իրենց մասով հաստատ վստահեցնում են: Եվ ներկա պահին կարող ենք ակնկալել, որ այդ համագործակցության մեջ Վրաստանը կարող է զսպող դերակատարում ունենալ, եթե փորձեն համագործակցությունն ընդդեմ Հայաստանի ուղղորդել: Բացի այդ՝ Վրաստանի գործող իշխանությունները կարծես թե որոշակի սրբագրումներ են ուզում անել իրենց արտաքին քաղաքականության մեջ, եւ այս ձեւաչափի շրջանակներում եւս Վրաստանն իսկապես զսպող դեր կարող է ունենալ հակահայ դրսեւորումներում:
Անդրադառնալով Հայաստանի եւ Վրաստանի հարաբերություններին` ջավախքցի պատգամավորը նկատեց.
- Հայաստանի եւ Վրաստանի հարաբերությունները դրսեւորվելու շատ ավելի կարեւոր հարթություններ ունեն: Իհարկե՝ շատ ցանկալի է, որ միջազգային հարթակներում եւս համագործակցաբար հանդես գան, բայց կան նաեւ ուրույն շահեր, որոնք կարծես թե ստիպում են պետություններին այլ վարքագիծ դրսեւորել: Բայց կարծում եմ, որ մենք հիմա այնպիսի իրավիճակում ենք, որ պետք է կարեւորենք այդ դրսեւորումները գլոբալ հարաբերությունների համատեքստում:
Օրերս Թբիլիսիում տեղի է ունեցել Վրաստանի, Թուրքիայի եւ Ադրբեջանի արտաքին գործերի նախարարներ Միխայիլ Ջանելիձեի, Մեւլութ Չավուշօղլու եւ Էլմար Մամեդյարովի եռակողմ հանդիպումը: Այն, որ այս հանդիպման ընթացքում Թուրքիան փորձելու էր իր համար բավականին ծանր իրավիճակում ստուգել, թե որքանով է կենսունակ Թբիլիսի-Բաքու առանցքը, ի սկզբանե էլ ենթադրելի էր: Այլ հարց է, թե փաստացի ի՞նչ ազդեցություն կարող է թողնել վերոհիշյալ հանդիպումը Հայաստանի վրա: Հաշվի առնելով նաեւ, որ վերջերս վրացագետները մտահոգություններ են հայտնում, թե Թուրքիան եւ Ադրբեջանը Վրաստանում ակտիվացրել են հակահայկական քարոզչությունը:
1
4533 դիտում
2
3206 դիտում
3
2813 դիտում
4
2218 դիտում
5
1985 դիտում
1
21875 դիտում
2
10534 դիտում
3
9112 դիտում
4
7186 դիտում
5
5020 դիտում
1
36121 դիտում
2
34142 դիտում
4
19057 դիտում
5
17527 դիտում
