ՀԱԿՈԲ ՂԱԶԱՆՉՅԱՆԸ`ԼԱՎԱԳՈՒՅՆ ԲԵՄԱԴՐԻՉ, ՌԵԺԻՍՈՐ ԵՎ «ԻՐԱՎՈՒՆՔԻ» ԲԱՐԵԿԱՄ
Տեսանյութեր«Իրավունք» թերթի և կայքի ընթերցողների կողմից 2021թ. ակտիվ գործունեության շնորհիվ լավագույն բեմադրիչ, ռեժիսոր և «Իրավունքի» բարեկամ է ճանաչվել ՀԹԳՄ նախագահ ՀԱԿՈԲ ՂԱԶԱՆՉՅԱՆԸ: Այս առիթով զրուցեցինք նրա հետ:
-Պարոն Ղազանչյան, եթե ամփոփենք 2021թվականը Պարոնյանի անվան երաժշտական կոմեդիայի թատրոնում …
- 2021թվականին Պարոնյանի անվան երաժշտական կոմեդիայի թատրոնը բեղմնավոր աշխատեց: Մենք վեց նոր ներկայացումներ ունեցանք: Բացեցինք նոր թատերասրահ, որը կրեց Երվանդ Ղազանչյանի անունը: Ինչո՞ւ Երվանդ Ղազանչյանի անունը, որովհետև դա թատերասրահ դարձավ իր օրոք: Եվ անցյալ տարի մայիս ամսին Ռաձինսկու «Ներոն և Սենեկա» ստեղծագործության բեմադրությամբ մենք բացեցինք դահլիճը: Երկրորդ՝ պրեմիերան այդ դահլիճում «Մոլորվածներն»էր/ըստ Նիլ Սայմոնի «Յոնքերսում Մոլորվածները» պիեսի/ և բոլորովին վերջերս ունեցավ արդեն երրորդ պրեմիերան` «Արքան հրապարակում»/ըստ Ա. Բլոկի/: Հիմա երկու երիտասարդ բեմադրիչներ այդ դահլիճի համար անում են ներկայացումներ: Հուսով եմ, որ մինչև մայիս այդ ներկայացումներն արդեն կկայանան, պրեմիերան տեղի կունենա: Թատրոնը բավական ծանրաբեռնված աշխատեց ինչն անում է նաև այս տարվա սկզբից…Այս պահին զուգահեռ վեց նոր ներկայացման փորձեր ենք անում: Նաև վերականգնում ենք մի քանի ներկայացումներ, որոնք որոշ ժամանակ չէինք խաղում, որովհետև առաջատար դերասաններից երեքը արտասահման մեկնեցին: Մի դեպքում մշտական բնակության, մյուս դեպքում` աշխատելու, նկարահանվելու համար: Այնպես որ աշխատանքները շատ են և խումբը ծանրաբեռնված է աշխատում: Նաև մի ուրախալի իրադարձություն եղավ: Վերջապես այս տարի կառավարության որոշմամբ մեր լուսաձայնային տեխնիկան ամբողջությամբ կվերազինվի ժամանակակից տեխնիկայով: Երկար տարիներ այդ հարցը բաց էր մնում: Նույնիսկ Լինսի հիմնադրամով երբ որ ժամանակին վերանորոգվեցին թատրոնները Պարոնյան թատրոնը դուրս մնաց այդ ծրագրից: Հետո թատրոներ կան, որտեղ երկու երեք անգամ են այդ տեխնիկան փոխել, իսկ Պարոնյան թատրոնը միշտ խորթ զավակի պես մնում էր անտեսված: Վերջապես մեր երազանքն իրականացավ և 1950-1960-ական թվականների իր դարը վաղուց ապրած ձայնալուսային տեխնիկան պետք է փոխարինվի նորագույնով:
-QR-կոդերի մասին ի՞նչ կասեք:
-Իմ կարծիքը շատ հակասական է: Մի կողմից ես գտնում եմ, որ դա անհրաժեշտ է, որպեսզի ինչ որ ձևով մենք վարակի ընթացքը դադարեցնենք: Միայն չեմ հասկանում, թե ինչու նույնը չի արվում տրանսպորտում, սուպերմարկետներում: Մանավանդ ես կարծում եմ, որ վարակի հիմնական տարածման աղբյուրը սուպերմարկետներն են: Այնուամենայնիվ, ամբողջ աշխարհն է դրան դիմում: Եվրոպայում երկրներ կան, որ ավելի խստացված ռեժիմի են անցել: Եվ կարծում եմ, որ սա ժամանակավոր բնույթ կկրի: Ամեն դեպքում ես ինքս պատվաստվել եմ և գտնում եմ, որ դա անհրաժեշտություն է…
-ՀԹԳՄ այս տարի ի՞նչ նոր ծրագրեր ունի:
-Այս պահին մեր գլխավոր ներուժը ուղղված է թատրոնի միջազգային օրվա տոնակատարությանը և «Արտավազդ» մրցանակաբաշխությանը՝ որը ինչպես ամեն տարի կկայանա մարտի 27-ին:
ՆՈՒՆԵ ԶԱՔԱՐՅԱՆ