«Բեմը հանրահավաքի հարթակ չէ, նա իր օրենքներն ունի».ՎԱՀՐԱՄ ՍԱՀԱԿՅԱՆ

«Իրավունքը» զրուցեց գրող, բանաստեղծ, թատերագիր, դերասան, ՀՀ մշակույթի վաստակավոր գործիչ ՎԱՀՐԱՄ ՍԱՀԱԿՅԱՆԻ հետ:

-Պարոն Սահակյան, Պարոնյանի անվան երաժշտական կոմեդիայի պետական թատրոնում մայիսի 24-ին հանդես եք գալու "2022 միստերիա-հիստերիա" նոր տրագիկոմեդիայով: Այդ օրը նաեւ Ձեր հորª լուսահոգի Արամայիս Սահակյանի ծննդյան օրն է: Օրը դրա՞ համար եք ընտրել:

– Ոչ, ես ընդհանրապես օր ընտրելու հնարավորություն չեմ ունենում, ուղղակի այդ օրը Պարոնյանի անվան թատրոնում ազատ էր, եւ ես էլ շատ ուրախացա, որ հենց այդ օրը հնարավորություն ընձեռվեց խաղալու: Այդ օրը պետք է շատ լավ խաղալ:

- Ովքե՞ր են հերոսները, կմանրամասնե՞ք:

– Այս անգամ հերոսները շատ են, շատ-շատ: Հին հերոսներից մնացել են ընդամենը երկուսը` իմ ներքին ձայնը (որի անունն է Արբանյակ), եւ Աթաբեկ-Բալաբեկը, բայց որն էլ ունի 2021-ին եւ 2022-ին տեղի ունեցող երեք միանգամայն նոր հատվածներ: Նոր հերոսներից է Հմայակ Բռնաբարը, որը տեղի-անտեղի մտնում եւ հարցնում է. "Բա դու խի՞ սահմանին չես" (ու նման զազրելի բաներ)… Կա հերոս Չուլփալասյան Գնդոն, որը գտնվելով "փերֆեքթ թիվի"-ների ազդեցության տակ, հավատում է, որ` «Թուրքիան կործանվել է, Վանը տվել են հայերին, Վանգան կանխատեսել է ընդդիմության պարտությունը, չար ուժերը կախարդել են իրենց փրկիչ քրչապետին, ու նա չի կարողանում աշխատել…» Կա իշխանասեր արվեստագետ-մտավորական Խարդակ Ծայրապետյանը, քաղաքական գործիչ Վրույր Ծայրունցը, եւ էլի մի քանի նման խայտառակ կենդանիներ: Հա, մի երկու հատ էլ լրագրող-մարմնավաճառուհիներ կան` Շառինե Թարսաշինյանը, Գառինե Աղբունցը (սրանք միսի-փիսիներն են), եւ մի հատ էլ հիմար տերտեր կա...

- Ներկայացման փորձերի ընթացքում ստեղծագործական կոնֆլիկտներ լինո՞ւմ են:

– Երբեմն լինում են, բայց առանց դրա ոչինչ չի ստացվի, դերասանն իր բնույթով բարդ բան է:

- Ժողովուրդը դուրս է եկել փողոց եւ վանկարկում է`«Նիկո՛լ, դավաճան», այս թեմայով կլինի՞ նոր տրագիկոմեդիա:

– Այդ թեմայով շատ բան կար նախկին ներկայացումների մեջ, իսկ հիմա մենք փորձում ենք երգիծանքի լեզվով արտահայտել գաղափարներ, որոնց մասին մարդիկ չեն լսի հանրահավաքների ժամանակ, չեն կարդա սոցցանցերում: Բեմը հանրահավաքի հարթակ չէ, նա իր օրենքներն ունի, եւ ես կարծում եմ, որ երգիծական արվեստը պետք է արտահայտի ոչ թե մարդկանց հույզերն ու ցանկությունները, այլ բացահայտի ու մարդկանց առաջ սփռի դառնագույն, քողարկված, անգամ անտեսանելի իրողություններ` անգամ ինչ-որ տեղ ցավ պատճառելով: Արվեստը մարդ ուրախացնելու, գոհացնելու կամ մխիթարելու միջոց չէ: (Սա կարելի ա վերնագիր դնել): Արվեստը պետք է վիրաբույժի նման մարդուն ցավ պատճառի` բուժելու համար: Մանավանդ` մեր օրերում:

- Ի՞նչ կասեք այն մարդկանց մասին, ովքեր մինչեւ հիմա հույսեր են կապում ներկայիս իշխանության խաղաղության պայմանագրի հետ:

– Ես նրանց ցանկանում եմ բարի գիշեր, անուշ քուն եւ էրոտիկ երազներ: Իրենք սիրում են երազախաբ լինել:

- Որտեղի՞ց կարող են ներկայացման համար տոմսեր ձեռք բերել:

– Տոմսերը պետք է ձեռք բերել նախօրոք եւ շտապ` Պարոնյանի անվան թատրոնի տոմսարկղից կամ tomsarkgh.am-ից` հավաքելով "2022 Միստերիա-հիստերիա":

ՆՈՒՆԵ ԶԱՔԱՐՅԱՆ

Այս թեմայով Առավոտյան պատգամավորները կուղղեկցեն Սամվել Վարդանյանին Երեւանի քննչական տեղափոխող մեքենային Ցավալի է, որ գիտնականի կողմից հնչեցված խոսքը փաստերի խեղաթյուրում է պարունակում. Տեր Մովսես Գալուստ Սահակյանն այսօր կդառնար 76 տարեկան Միջազգային ատյաններում Ադրբեջանի դեմ Հայաստանի գանգատներից հրաժարումն անվերականգնելի վնաս կհասցնի ՀՀ-ին ու հայ ժողովրդին Վահրամ Սահակյանը եւ  իր «Հայոց պատմությունը»