Չպետք է հասնեինք այն իրավիճակին, որ Հայաստանը նույնիսկ իրեն վերաբերող հարցերում գործոն չլիներ. Աբրահամյան

Վաղ առավոտից տեղի ունեցան բողոքի խաղաղ ակցիաներ, ավտոերթեր, փակվեցին փողոցներ, եղան հարյուրավոր բերման ենթարկվածներ: Էրեբունու ուղղությամբ ճանապարհ փակողների շարքում էր նաեւ ԱԺ «Պատիվ ունեմ» խմբակցության պատգամավոր ՏԻԳՐԱՆ ԱԲՐԱՀԱՄՅԱՆԸ, ում հետ «Իրավունքը» զրուցեց ստեղծված իրավիճակի մասին:

«ՈՍՏԻԿԱՆՈՒԹՅԱՆ ՇԱՐՔԵՐՈՒՄ ԿԱՆ ԱՆՁԻՆՔ, ՈՎՔԵՐ ՍԱԴՐՈՒՄ ԵՆ»

– Նկատեցինք, որ մի կերպ էր զսպվում բախումը ոստիկանության ու ցուցարարների միջեւ: Ձեր գնահատմամբ` որքանո՞վ էին իրավաչափ ոստիկանության գործողությունները: 

– Ոստիկանության գործողությունները որեւէ ձեւով իրավաչափ չեն կարող համարվել: Ակնհայտորեն ոստիկանության շարքերում կան անձինք, ովքեր սադրում են եւ ամեն ինչ անում, որպեսզի խաղաղ անհնազանդության ակցիաները վերածվեն բախումների: Մասնավորապես` նման իրավիճակ ստեղծվեց, երբ երթն ուղեկցող ոստիկաններից մեկը, ով ընդհանուր համակարգում էր, այսպես կոչված, ուղեկցման գործընթացը, հայտարարեց, որ առաջ բերեն զորքը: Ընդ որում` սա այն դեպքում, երբ մենք ողջ ճանապարհը գնացել ենք` կատարելով ոստիկանության օրինական պահանջները, իսկ կարճ դադարները որտեղ եղել են, համաձայնեցրել ենք նրանց հետ: Բայց այդքանից հետո` ըստ էության, այն մարդիկ, ովքեր հրահանգներ են իջեցնում ոստիկանությանը, համարեցին, որ չպետք է խաղաղ երթ լինի, այլ պետք է լինեն բախումներ, եւ սադրանքների դիմեցին:

– Պարոն Աբրահամյան, բավական շատ բերման ենթարկվածներ եղան: Ի՞նչ կասեք այս մասին:

– Շատերին տարել են` ուղղակի փողոցում կանգնած լինելու համար: Այսինքն` ի սկզբանե ոստիկանության կողմից նպատակ է եղել բերման ենթարկել մարդկանց ու խաղաղ երթը վերածել քաշքշոցի կամ ծեծուջարդի: Իհարկե, մենք ճիշտ պահին կանգ ենք առել, ոստիկանությանը հորդորել ենք մնալ օրենքի շրջանակներում եւ շարունակել ենք մեր պայքարը, որը պետք է տանենք ու հասցնենք իր հանգրվանային կետին:

– Այդուհանդերձ, ըստ Ձեզ, ճանապարհներ փակելով, երթեր ու ակցիաներ անելով` հնարավո՞ր է հասնել Նիկոլ Փաշինյանի հրաժարականին:

– Սա ճանապարհներից ու գործիքակազմից մեկն է, որը մենք այսօր կիրառում ենք: Պետք է աստիճանաբար թափ հավաքեն այս ակցիաները: Եթե այն համեմատում ենք 10-15 օր առաջվա միջոցառումների հետ, ուղղակի, անհամեմատելի է, որովհետեւ հանրության արձագանքը միանշանակ է: Գնալով ավելի մեծ թվով մարդիկ են մեզ միանում, եւ շարժումը շատ ավելի համաժողովրդական կարգավիճակ է ստանում: 

«ԵՐԲ ԽՈՍՈՒՄ Է ՆԻԿՈԼ ՓԱՇԻՆՅԱՆԸ, ՈՐԵՎԷ ՄԵԿԻ ՀԱՄԱՐ ԱՐԺԵՔ ՉՈՒՆԻ»

– Զուգահեռ իրականության մեջ տեղի ունեցավ ՀԱՊԿ հոբելյանական գագաթաժողովը, եւ անդամ երկրների առաջնորդների կրեմլյան հանդիպման ժամանակ Նիկոլ Փաշինյանը բարձրաձայնեց ՀԱՊԿ անդամ երկրների կողմից Հայաստանի համար ոչ բարեկամ երկրին զենքի վաճառքի խնդիրը` շեշտելով, թե այդ զենքն արդյունքում օգտագործվել է Հայաստանի եւ հայ ժողովրդի դեմ: Ավելին` նա կշտամբեց ՀԱՊԿ անդամ երկրներին` նշելով, որ իրենց արձագանքը 2020 թվականի 44-օրյա պատերազմի ընթացքում եւ պատերազմից հետո այդքան էլ չոգեւորեց Հայաստանի Հանրապետությանը եւ հայ ժողովրդին: Սակայն, այս ամենը նույն դահլիճում որեւէ արձագանք ՀԱՊԿ անդամ երկրների ղեկավարների կողմից չունեցավ: Ինչո՞ւ:

– Հայտարարություն հնչեցնողը պետք է այնպիսի հայտարարություններ անի, որոնք ընկալելի կլինեն եւ արժեք կունենան: Ցավալիորեն պետք է արձանագրել, որ Նիկոլ Փաշինյանը մեր երկիրը վերածել է այնպիսի կղզյակի, որի ո՛չ դիրքորոշումը, ո՛չ կարծիքը, ո՛չ տեսակետները որեւէ կերպ հաշվի չեն առնվում: Շատ երկար կարելի է խոսել ՀԱՊԿ-ում առկա խնդիրների մասին, կարելի է երկար խոսել այն մեխանիզմների մասին, որոնք ճկունություն եւ արդյունավետություն կբերեն համակարգին, բայց այն պարագայում, երբ դրա մասին խոսում է Նիկոլ Փաշինյանը, որեւէ մեկի համար արժեք չունի: Այս մասին, իսկապես, ցավով եմ խոսում, որովհետեւ մենք չպետք է հասնեինք այն իրավիճակին, որ Հայաստանը նույնիսկ իրեն վերաբերող հարցերում գործոն չլիներ:

– Ամեն դեպքում, Նիկոլ Փաշինյանին հաջողվեց առանձնազրույց ունենալ ՌԴ նախագահ Վլադիմիր Պուտինի հետ: Սա կարո՞ղ է ազդակ լինել իր իշխանության դեռեւս երկարաձգման համար: 

– Նիկոլ Փաշինյան-Վլադիմիր Պուտին հանդիպումը որեւէ կերպ չեմ կապում Հայաստանի ներքաղաքական իրավիճակի հետ: Կա դաշնակցային, ռազմավարական հարաբերություններ Հայաստանի եւ Ռուսաստանի միջեւ, ու անկախ այն հանգամանքից, թե ովքեր են ղեկավարում երկիրը, հարաբերությունների այդպիսի մակարդակը ենթադրում է նմանատիպ ձեւաչափի շրջանակներում նաեւ երկկողմ բնույթի հանդիպումներ: 

ՀՐԱՆՏ ՍԱՐԱՖՅԱՆ

Այս թեմայով Փաշինյանը 2018-ին սպանել է հայաստանի պետականությունը. Աննա Մկրտչյան Ալիեւ-Փաշինյան մակարդակով կապիտուլյացիայի շարունակության ենք ականատես լինում. Խաչատրյան Իրավաբանություն չկա, տուժող չկա, վնաս չկա, ոչինչ չկա, բայց մարդն ազատազրկված է. Տիգրան Աթանեսյան Փաշինյանը վրեժ է լուծում հայ ժողովրդից եւ հայկական պետականությունից. Գագիկ Մինասյան Առավոտյան պատգամավորները կուղղեկցեն Սամվել Վարդանյանին Երեւանի քննչական տեղափոխող մեքենային