Ապօրինի գույքի բռնագանձման մասին օրենքով` արդեն իսկ ակնկալվում է բռնագանձել 43 մլրդ դրամ
ՆերքաղաքականԽորհրդարանում երեկ առաջին ընթերցմամբ ընդունվեց «Ապօրինի ծագում ունեցող գույքի բռնագանձման մասին» օրենքում փոփոխություններ կատարելու մասին նախագիծը:
Ըստ ՀՀ գլխավոր դատախազի տեղակալ ՍՐԲՈՒՀԻ ԳԱԼԵՅԱՆԻ` փոփոխությունները կնպաստեն մեր պետությունում ներդրված կարեւորագույն ինստիտուտի գործունեության արդյունավետության բարձրացմանը: Նախագծով առաջարկվում է ընդլայնել «պաշտոնատար անձ» հասկացությունը եւ հանրային պաշտոն զբաղեցրած անձանցից բացի, այդ հասկացության շրջանակում կներառվեն նաեւ հայտարարագիր ներկայացնելու պարտականություն ունեցող այլ անձինք եւս: Նաեւ առաջարկվում է վարույթ իրականացնող մարմնի համար նախատեսել լիազորություն, որպեսզի վերջինս հնարավորություն ունենա սեփական նախաձեռնությամբ որոշ անձանց նկատմամբ սկսել ուսումնասիրության վարույթ: Խոսքը պաշտոնատար այն անձանց մասին է, որոնք օրենքով պարտավոր են ներկայացնել հայտարարագիր: Եվ հաշվի առնելով այն հանգամանքը, որ նախատեսվող լիազորությունները կարող են պահանջել լրացուցիչ ռեսուրսների ներգրավվում, ինչպես նաեւ ժամանակատար դարձնել ուսումնասիրությունների իրականացումը` առաջարկվում է վարույթների ուսումնասիրության ժամկետ նախատեսել երեք տարի` երկու տարվա փոխարեն:
Ի դեպ, եթե փորձագետը փաստի, որ հնարավոր չէ պարզել գույքի շուկայական արժեքը, ապա վարույթ իրականացնող մարմնին հնարավորություն կընձեռվի այդ գույքի շուկայական արժեքի չափով գումարի փոխարեն` պահանջել ձեռքբերման արժեքով գումար: Իսկ եթե գույքը գտնվում է Հայաստանի սահմաններից դուրս, ապա վարույթ իրականացնող մարմինը հնարավորություն կունենա պատասխանատուից պահանջել այդ գույքի ձեռքբերման պայմանագրային արժեքը:
Նշենք, որ Ս. Գալեյանը տեղեկացրեց, որ դատարան ուղարկված 9 հայցադիմումից 8-ն արդեն ընդունվել է վարույթ: Դրանց մասով ակնկալվում է բռնագանձել 43 մլրդ դրամի չափով գումար:
ՀՐԱՆՏ ՍԱՐԱՖՅԱՆ