Մոսկվայի քաղաքապետը «քովիդային համաներում» է հայտարարել
ՄիջազգայինՀունիսի 1-ից Մոսկվայի իշխանությունները կդադարեն գանձել սահմանված, բայց չվճարված տուգանքները՝ կորոնավիրուսային սահմանափակումները խախտելու համար։ ՌԴ մայրաքաղաքի քաղաքապետ Սերգեյ Սոբյանինն իր բլոգում հայտնել է «քովիդային համաներման» մասին։
Քաղաքապետի խոսքով՝ իշխանությունները չպետք է գանձեն նախկինում չվճարված տուգանքները: Դա պայմանավորված է նրանով, որ բնակիչների իրական եկամուտների մակարդակը նվազում է, պարզաբանել է նա։
Սոբյանինն ասել է, որ Մոսկվայի կառավարությունը նաև սուբսիդիաներ է վճարելու ձեռնարկություններին և քաղաքացիներին՝ նախկինում վճարված տուգանքները փոխհատուցելու համար: Համաներումը չի ներառի COVID-19-ի ընթացքում մեկուսացման ռեժիմը չպահպանելու պատճառով նշանակված տուգանքները, մանրամասնել է քաղաքապետը։
«Ընդհանուր առմամբ մենք կդադարեցնենք հավաքագրել կամ վերադարձնենք մոտ 13,6 միլիարդ ռուբլի, ինչը ներկայիս պայմաններում կդառնա բիզնեսի և մոսկվացիների աջակցության շոշափելի միջոց», - ամփոփել է Սոբյանինը: