Պարոն գլխավոր դատախազ, ձեր ժամանակն է. «Իրավունքի» տեղեկությունը հաստատվեց
Ներքաղաքական«Իրավունքն» անդրադարձել էր, որ ՀՀ գլխավոր դատախազ Արթուր Դավթյանի նկատմամբ 44-օրյա պատերազմին առնչվող քրեական գործի հետ կապված մեծ ճնշում է գործադրվում, որի նպատակով տուժողի հաղորդման հիման վրա վերաբացվել է գլխավոր դատախազի հարազատներին վերաբերող քրեական գործը: Այս տեղեկությունը շտապել էին հերքել դատախազությունից` նշելով, որ այն իրականությանը չի համապատասխանում:
«Նախ` նման քրեական գործ չկա, բացի այդ` ՀՀ գլխավոր դատախազի նկատմամբ որեւէ ճնշում չկա եւ չի կարող լինել», - ընդգծել էր Գլխավոր դատախազի խորհրդական Գոռ Աբրահամյանը։ Մինչդեռ իրականությունը բոլորովին այլ է, ինչի վերաբերյալ ուշագրավ փակագծեր է բացել քաղաքագետ-միջազգայնագետ, իրավաբան ԼԻԼԻԹ ՄԱՆԱՍԵՐՅԱՆԸ: Նա պատերազմում զոհվածների ծնողներին զգուշացնում է, որ Նիկոլ Փաշինյանին հարցաքննության կանչելն «ամենամեծ բլեֆն է ու սրիկայություն էր, որ այս իշխանությունը կարող էր անել»:
– Սա միայն մի միջոց էր ձեզ լռեցնելու համար: Ի դեպ, Արթուր Դավթյանն էլ, քանի հնարավորություն ունի, իր լծակները թող օգտագործի եւ եղբոր տղայի` ՀՀ ՔԿ Երեւան քաղաքի քննչական վարչության Արաբկիր վարչական շրջանի քննչական բաժնում քննվող քրեական գործը կարճի։ Քրեական գործի համարն էլ գիտեմ, որ հետո վերամբարձ չհայտարարեն, թե նման քրեական գործ չկա։ Պարոն Գլխավոր դատախազ, Ձե՛ր ժամանակն է, վայելե՛ք, թե չէ, ի՞նչ իմանաս, մի օր էլ միգուցե Աղվան Հովսեփյանի պես պատասխանատվության առաջ կանգնեք` կաշառքի, անօրինական ձեռնարկատիրության, նվազագույնը` անօրինական քրեական գործեր հարուցելու, կամ անօրինական ձեւով քրեական գործեր կարճելու համար:
ՀՐԱՆՏ ՍԱՐԱՖՅԱՆ