Երիտասարդությունը պայքարելու է արցախյան կրթօջախների ադրբեջանականացման դեմ
ՏեսանյութերԻ հակադրումն ադրբեջանական քարոզչամեքենայի տարածած մերկապարանոց հայտարարությունների եւ վերջին օրերին Google որոնողական կայքում Արցախի բոլոր պետական կառույցների ադրբեջաներեն անվանափոխության` «Վերնատուն» երիտասարդական վերլուծական կենտրոնի նախաձեռնությամբ՝ Ստեփանակերտի «Գրիգոր Նարեկացի» համալսարանի դիմաց բարձրացվեց ՀՀ եւ ԱՀ դրոշները՝ որպես երկու հանրապետությունների անքակտելի միասնության խորհրդանիշ;
Ինչպես նշեց Արցախի «Վերնատուն» երիտասարդական վերլուծական կենտրոնի հիմնադիր ԱՐՇԱԿ ԱԲՐԱՀԱՄՅԱՆՆ, այս ակցիան կրելու է շարունակական բնույթ, որպեսզի արցախյան բոլոր կրթօջախները վարվեն նույնկերպ:
«Արցախի երիտասարդությունը հստակ ուղերձ է հղում Ադրբեջանին եւ միջազգային հանրությանը, որ մենք պայքարելու ենք Արցախի հայկական մնալու համար՝ որքան էլ ադրբեջանական քարոզչամեքենան իր նավթադոլարներով կաշառի միջազգային կորպորոցիաներին, որպեսզի քարոզ տանեն իրենց ձեռնտու ուղղությամբ, որքան էլ քաղաքական դաշտում վարեն խավիարային դիվանագիտություն: Կոչ եմ անում Արցախի երիտասարդությանը՝ միանալ այս պայքարին՝ հանուն մեր պետականության: Վերջիվերջո, 30 տարի առաջ մեր ավագ սերունդը եղել է մեր տարիքին, երբ պայքարել է հանուն Արցախի, ինչի արդյունքում սկիզբ է առել արցախյան ազատագրական շարժումը, եւ այն հաջողությամբ պսակվելով՝ ձեռք ենք բերել անկախություն», – շեշտեց Աբրահամյանը:
ՀՐԱՆՏ ՍԱՐԱՖՅԱՆ