Սա նյարդերի պայքար է, եվ ժամանակն աշխատում է հօգուտ պետականակենտրոն ուժերի. Ջամալյան
ՆերքաղաքականՌազմական փորձագետ ԴԱՎԻԹ ՋԱՄԱԼՅԱՆԻ գնահատմամբ` այս մեկ տարին աշխատել է ի վնաս նիկոլական խունտայի, եւ իրական պետականակենտրոն ուժերը դժվարին պայքարի են դուրս եկել: Ըստ նրա` ձգձգվող պայքարի արդյունքում հաջողությունը լինելու է, ինչն անխուսափելի է դառնալու:
«90–ԱԿԱՆՆԵՐԻ «ԲԵՍՊՐԻԴԵԼԻ» ՀՈԳԵԶԱՎԱԿՆԵՐԻՆ ԱՅՍՕՐ ՇԱՆՍ Է ԸՆՁԵՌՎԵԼ»
– ԲԴԽ նախագահի ժամանակավոր պաշտոնակատար Գագիկ Ջհանգիրյանի վերաբերյալ երեկ սկանդալային ձայնագրություն հրապարակեց ԲԴԽ լիազորությունները կասեցված նախագահ Ռուբեն Վարդազարյանը: Պարզվում է` Գագիկ Ջհանգիրյանը ո՛չ ավել, ո՛չ պակաս պահանջել է Ռ. Վարդազարյանից հրաժարվել ԲԴԽ նախագահի պաշտոնից, այլապես իր դեմ քրեական գործեր կհարուցվեն: Ինչի՞ մասին է սա փաստում:
– Իշխանության քայլերն ավելի են ապալեգիտիմացնում Նիկոլին` իր խունտայի հետ միասին: Խնդիրն այն է, որ սրանք մագիլներով մխրճվել եւ կառչել են մեր պետականության օրգանիզմին: Հիմա հանրության առողջ հատվածը, պետականամետ ուժերը զբաղված են նրանց ճանկերը կտրել–հանելով: Գագիկ Ջհանգիրյանի հայտնի ձայնագրությունը եւ մի շարք այլ տեղեկություններ ապացուցում են սրանց ազգադավ լինելը, բայց ամեն անգամ դրանք դառնում են եւս մի փոքրիկ քայլ` դեպի մեր վերջնական հաղթանակը: Այս առումով մենք մեզ երբեմն թույլ ենք տալիս լավատես լինել, ժամկետներ ենք սահմանում, տրամադրվում ենք, որ անխուսափելիորեն ինչ-որ կարեւոր իրադարձության նախաշեմին կլինի իշխանափոխություն, սակայն չի ստացվում: Դրա հետեւանքով` ինչ-որ իրադրական հուսահատության ֆոն է ստեղծվում, բայց լավատես լինելով հանդերձ, պետք է լինենք իրատես: Սա տեւական պայքար է, որը հեշտ չի լինելու: Չնայած պայքարի զգալի ճանապարհը բոլորս միասին արդեն անցել ենք: Հույս ունեմ, որ պայքարի ֆորմատի փոփոխության, ինչ-որ նոր գաղափարների ներմուծման արդյունքում ունենալու ենք վերջնական հաջողություն: Այն սարերի հետեւում չէ, մոտ է, բայց, միեւնույն ժամանակ, պատրանքներ էլ չստեծենք, թե շատ կարճ ժամանակում ենք հասնելու ինչ-որ արդյունքի: Պայքարի տեւականությունը պետք է աչքի առաջ ունենալ: Սա նյարդերի պայքար է, եւ ժամանակն աշխատում է հօգուտ պետականակենտրոն ուժերի:
– Արագածոտնի մարզի Նիգավան գյուղում մի խումբ անձանց մասնակցությամբ օրերս տեղի ունեցած միջադեպի հետեւանքով եղան զոհեր ու վիրավորներ: Եվ թեպետ ոստիկանությունը շտապեց տեղեկացնել, որ դեպքը քաղաքական ենթատեքստ չի պարունակում, բայց կամաց-կամաց նոր մանրամասներ են ի հայտ գալիս` ՔՊ-ական շրջանակների մասնակցության վերաբերյալ: Ի՞նչ կասեք այս մասին:
– Սա զարհուրելի դեպք էր: Մենք գլորվում ենք դեպի 90-ականների «բեսպրիդել»: 90-ականների «բեսպրիդելի» հոգեզավակներին այսօր շանս է ընձեռվել կրկնել այդ տարիների ամբողջ մղձավանջը: Եթե ձայնագրությունը երկրի պետականության իրավական դեֆորմացիայի դրսեւորումներից մեկն էր, ապա սա ՔՊ կոչվածի թաղումն էր: Առ այսօր իրենք գտել են մեկ-երկու գործոն, որից կառչելով` շարունակել են մնալ իշխանությունում: Բայց գործընթացներն ի վնաս իրենց են, նման կերպ գործող, հանրային աջակցությունից իսպառ զրկված իշխանությունը երկար չի կարող մնալ: Մեկ շաբաթ, մեկ ամիս ավել մնալը հակառակ էֆեկտն է ունենալու հենց իրենց համար: Շատ ապարանցի ծանոթներ ու ընկերներ ունեմ, լավ գիտեմ իրենց տեսակը, չէի ուզենա քաղաքացիական բախումներ տեսնել: Կասկած չունեմ, որ եթե Նիկոլը ցանկանա, արյան գետեր կհոսեն. մենք արդեն մարտի 1 ենք տեսել, 44 օրյա պատերազմ ենք տեսել... Բայց էլի եմ ասում` սա իրենց քաղաքական մահն էր, իրենք ապալեգիտիմացան ամբողջապես: Հետեւաբար, պայքարելու վճռականություն պետք է ունենանք եւ մինչեւ հաղթանակ գնանք:
«ՄԵՆՔ ԲԵՐՁՈՐՆ ՈՒ ԱՂԱՎՆՈՆ ԿՈՐՑՆԵԼՈՒ ԻՐԱՎՈՒՆՔ ՉՈՒՆԵՆՔ»
– Այդ պայքարի ճանապարհին ԱԺ «Պատիվ ունեմ» խմբակցության ղեկավար Արթուր Վանեցյանը հայտարարեց, որ մանդատը վայր է դնում եւ դե յուրե ու դե ֆակտո դադարում է գոյություն ունենալ ՀՀԿ-ի հետ ձեւավորած «Պատիվ ունեմ» դաշինքը: Ի՞նչ հետեւանք սա կարող է ունենալ «Դիմադրություն» շարժման վրա:
– Կարծում եմ` մի շարքով դուրս են եկել պայքարի եւ նույն տրամաբանությամբ շարունակելու են` գուցե նոր, հետաքրքիր ձեւաչափերով: Չեմ կարծում, թե սա կթուլացնի պայքարը: Ուզում եմ հավատալ, որ այդ որոշումն արդյունավետ կլինի: Ըստ իս, այս որոշումը կայացվել է պայքարին նոր թափ հաղորդելու համար: Վանեցյանի պարագայում վստահ եմ, որ սա պայքարն արդյունավետ դարձնելու համար արված քայլ է, այլ ոչ թե ինչ-ինչ պայմանավորվածությունների արդյունք: Այսպես թե այնպես, ինչ-որ նոր մտքեր, գաղափարներ են պետք մարդկանց փողոց դուրս բերելու համար, եւ սա հենց այդ կոնտեքստում արված քայլ է: Այստեղ այլ խարդավանքներ չեմ ուզում տեսնել:
– Մինչ հայաստանյան ներքաղաքական դաշտում վերադասավորումներ են տեղի ունենում` Արցախում սպասում են, թե ի՞նչ է լինելու հուլիսի 1–ին, արդյո՞ք Բերձորն ու Աղավնոն հայաթափվելու են...
– Սա շատ կարեւոր օրակարգ է, որը մեր պետականակենտրոն ուժերը, փորձագետները առաջ են մղում: Իհարկե, կարծում եմ` հենց հուլիսի 1-ին այս նոր աղետը մեզ չի պատուհասի, բայց սա ամենակարեւոր օրակարգային հարցերից մեկը պետք է լինի մեր հանրության համար: Մենք այլեւս Արցախում կամ Հայաստանում ոչ մի թիզ հող կորցնելու իրավունքը չունենք: Ես Աղավնոյի գյուղապետին անձամբ ճանաչում եմ, նա նվիրյալ անձնավորություն է: Ուղղակի, նմանների վրա է հիմնվում պետականությունը: Միայն իր կամքը տեսնելով` հասկանում եմ, որ այս մարդուն կոտրել հնարավոր չէ: Ունենք կարեւոր ռեսուրս` հողից կառչած հայ բնակրչությունը: Ադրբեջանը բազմիցս խախտել է նոյեմբերի 9-ի այդ նույն համաձայնությունը, ըստ որի, պետք է Բերձորը դատարկվի նոր ճանապարհի բացվելուց հետո: Եվ եթե այստեղ պետականակենտրոն ուժեր լինեն իշխանության, այդ հարցը օրակարգ չի էլ բարձրանա: Բայց եթե, Աստված չանի, սրանք մնան իշխանության, ֆորսմաժորային իրավիճակ ստեղծվի, ապա այդ դեպքում` Արցախի Հանրապետության սուբյեկտայնության հարցը պետք է առաջ մղվի: Այսինքն` Արցախն իր հատու խոսքը պետք է ասի: Շեշտում եմ` մենք այլեւս հող զիջելու չունենք` ո՛չ Արցախում, ո՛չ ՀՀ սահմաններում: Հասկանում եմ, որ շատ բարդ է լինելու, բայց զգում եմ նաեւ ենթատեքստում պայքարելու վճռականությունը: Այս առումով մենք ունենք դաշնակիցներ: Բերձորը հանձնելու հեռանկարը բնավ ձեռնտու չէ մեր դաշնակից Ռուսաստանին: Հետեւապես, եթե այս ազգակործան խունտայից ազատվենք, կարող ենք գրագետ դիվանագիտությամբ ելքեր գտնել, որովհետեւ Բերձորը, Աղավնոն կորցնելու իրավունք չունենք:
ՀՐԱՆՏ ՍԱՐԱՖՅԱՆ