Սյունիքի միջանցքով եւ Տավուշի տարածքով չեն բավարարվելու, ինչն Ալիեւը չի էլ թաքցնում. Նազարյան
ՆերքաղաքականԸստ ԱԺ «Հայաստան» խմբակցության պատգամավոր ԳԵՂԱՄ ՆԱԶԱՐՅԱՆԻ` 2020 թվականի նոյեմբերի 9–ից հետո այդպես էլ հետեւություններ չեն արվել:
– Քանի դեռ այս պարտության դեմքը նստած է աթոռին, մեզ մոտ անդադար լինելու է նոյեմբերի 9–ը... Օրեր առաջ զոհվեց Հրաչը, նրա նահատակվելուց ընդամենը 16 օր առաջ Երեւանի կենտրոնում ոստիկանները` սեւ, թե կարմիր բերետավոր, կապ չունի, դաժան ծեծի, խոշտանգման էին ենթարկել մեր հայրենիքի պաշտպան հերոս Հայկազի հորը` Զավենին: Ընդ որում` այն բանից հետո, երբ Զավենն ասել էր. «Նայեք` ում նկարն է իմ կրծքին, իմ տղան գիտե՞ք, հայրենիքը պաշտպանելով, քանի թուրք է սպանել»: Իսկ ոստիկաններն ասել էին. «Այ, հենց դրա համար էլ դու քո հալը կտեսնես»: Այս մասին Զավենը ՔԿ-ում էլ է հայտարարել: Այսքանից հետո, եթե Երեւանի կենտրոնում ոստիկանը ծեծում է մի մարդու, որը հերոսի հայր է, ադրբեջանցին հանգիստ կկրակի մեր սահմանը պաշտպանող Հրաչի վրա: Վաղը էլի է կրակելու: Կրակելու է այնքան ժամանակ, քանի դեռ մտածում է, որ վախի մթնոլորտը Հայաստանում է, եւ իրենց կամքն է պարտադրելու: Ծանր բան եմ ասում, բայց փաստ է: Նրանք ունեն դաշնակիցներ` հանձին Նիկոլ Փաշինյանի, որը ադրբեջանցիների նման անընդհատ վախի մթնոլորտ է տարածում: Ասում է` եթե չկատարենք Ադրբեջանի, Թուրքիայի պահանջները, Հայաստանն էլ կկորցնենք: Իհարկե, նա ստում է: Բայց վերջերս մի բան էլ ավելացրեց` ասելով, թե սա երաշխիք չէ, որ խաղաղությունը կհաստատվի: Ու գիտե՞ք ինչու, որովհետեւ նա գիտի, որ իր տերերը` նրանք, ովքեր իրեն ստիպում են անել նման հայտարարություններ, ունեն այլ պահանջներ եւս: Իրենք, այսպես կոչված, Սյունիքի միջանցքով չեն բավարարվելու, Տավուշի տարածքով չեն բավարարվելու, ինչն Ալիեւը չի էլ թաքցնում: Ասում է` ադրբեջանցիները պետք է վերադառնան Երեւան, Վարդենիս, Ամասիա, Իջեւան, Կապան, Արարատ, Մասիս: Այդ ադրբեջանցիների անվտանգությունը հսկելու համար առաջ է գալու թուրք «խաղաղապահների» ներկայությունը Երեւանի կենտրոնում:
ՀՐԱՆՏ ՍԱՐԱՖՅԱՆ