Ոչ ոք մեզ չի կարող նման բան ասել, այս ամենը ուղղորդված է. քննության ավարտին հանրային պարսավանքի են ենթարկվելու ուղղորդողները. Ապարանի արյունոտ միջադեպի հետքերով

Ապարանի արյունոտ միջադեպի արդյունքում սպանվածների հարազատները շարունակում են պնդել, որ վիճաբանությունից մեկ օր անց փոխմարզպետի հորեղբոր որդին` Ռոման Փարվանյանը, զանգահարել է միջադեպի բոլոր մասնակիցներին և պարզաբանման համար կանչել գազալցակայան։

Վերը նշյալի շուրջ փորձեցինք պարզաբանումներ ստանալ անձամբ Արագածոտնի փոխմարզպետ ԷԴԳԱՐ ՓԱՐՎԱՆՅԱՆԻՑ, ով նախ նկատեց.

-Նախ ասեմ, որ իմ հարազատ եղբոր մասին չէ խոսքը, եղել է իմ ազգականներից մեկը միջադեպի ականատես, ով գտնվում է իրավապահների տիրույթում, չի փախել, չի խուսափել ասել այն, ինչ տեսել է: Ավելին, կարող եք տեղեկանալ նախաքննական մարմիններից:

-Պարոն Փարվանյան, ակցիայի մասնակիցները պահանջում էին, որպեսզի Ձեր ազգականները հեռանան Ապարանից:

-Էմոցիոնալ հայտարարություններ են, ոչ ոք մեզ չի կարող նման բան ասել, այս ամենը ուղղորդված է, ինչի մասին է խոսքը: Թե ում կողմից եւ ոնց պատասխանը կտաք Քննչական կոմիտեն` քննության ավարտին:

-Փորձե՞լ եք հանդիպել սպանվածների հարազատների հետ:

-Իհարկե, եկեք չմանրամասնեմ, համբերենք թող քննությունը վերջանա, ամեն ինչ կպարզվի, բոլորն էլ իրենց արժանի պատիժը կստանան, իսկ այն մարդիկ, ովքեր իրականում հրահրել են այս ամենը` քննության ավարտին, վստահ եմ, արժանանալու են ոչ միայն քրեական պատասխանատվության, այլ նաեւ հանրային պարսավանքի: Առայժմ այսքանը կարող եմ ասել:

ԻԼՈՆԱ ԱԶԱՐՅԱՆ