«ԵԹԵ ԼԻՆԵՆ ՈՐՈՇ ԳՐՈՂՆԵՐ, ՈՐ «ԿՆԵՂՎԵՆ», ԽՈՐՀՈՒՐԴ ԿՏԱՄ ԸՄԲՌՆՈՒՄՈՎ ՄՈՏԵՆԱԼ»
ՄշակութայինԿԳՄՍ նախարարության երաշխավորությամբ` շուտով կհրատարակվի Դավիթ Սամվելյանի եւ Նաիրա Աբրահամյանի հեղինակած «Ժամանակակից գրականության քրեստոմատիայի» 6 գրքերը՝ նախատեսված 7-12-րդ դասարանների համար: Թե ժամանակակից գրողներից ովքեր են հայտնվել դասագրքերի էջերում, ովքեր՝ դուրս մնացել, «Իրավունքը» պարզեց «Ժամանակակից գրականության քրեստոմատիայի» համահեղինակ, արձակագիր ԴԱՎԻԹ ՍԱՄՎԵԼՅԱՆԻՑ:
-Ի՞նչ չափանիշներով են ընտրվել 7-12 դասարանների համար նախատեսված հայ ժամանակակից գրականության քրեստոմատիաների հեղինակներին:
— Գլխավոր ու առաջնայինը ոչ թե հեղինակի անունը կամ հայտնիությունն է եղել, այլ այն, որ ստեղծագործությունները համապատասխանեն տվյալ տարիքի դպրոցականների հետաքրքրություններին ու լեզվամտածողությանը: Հաշվի չի առնվել, թե հեղինակն ինչ միության ու կազմակերպության անդամ է, որտեղ է հրատարակվում, մամուլում ինչ հաճախականությամբ է երեւում եւ այլն: Բոլոր հեղինակները հրատարակչության կողմից ստացել են պաշտոնական նամակ (նրանք, ովքեր մեր կողքին չեն, նամակն ուղարկվել է ժառանգներին): Եղել են հեղինակներ, որոնք չեն արձագանքել: Նամակում մանարամասն ներկայացված են եղել ստեղծագործությունները ներառելու չափանիշները, այն է` դրանք պետք է իրենց բովանդակությամբ, զգայական դրսեւորումներով, կրթադաստիարակչական խորքայնությամբ դառնան ընթերցողի հոգին ու միտքը զարգացնող լավագույն ու սիրելի ընկեր: Այսինքն` միտված ընտրել ենք այնպիսի գործեր, որոնք պետք է դառնան գրականության դասագրքում ներառված ստեղծագործությունները լրացնողն ու շարունակողը: Յուրաքանչյուր դասարանի համար առանձին գիրք է, որի ծավալը, ի դեպ, սահմանափակ է, այսինքն՝ չէինք կարող եւ չպետք է կազմեինք գիրք, որը 400-500 էջ ունենար: Անգամ դասագրքերը երկու մասի են բաժանված, որպեսզի հարմար ու թեթեւ լինեն աշակերտների համար:
— Այն փաստը, որ որոշ ժամանակակից գրողներ դուրս են մնացել քրեստոմատիաների ցանկից, մտավախություն չունե՞ք, որ խոսակցությունների տեղիք կտա:
— Եթե լինեն որոշ գրողներ (հաստատ կլինեն), որ «կնեղվեն», թե իրենց ստեղծագործությունը ավելի արժանի է եղել, բայց չի ընդգրկվել, խորհուրդ կտամ ըմբռնումով մոտենան բողոքելուց առաջ եւ կիսեն իրենց գրչակից ընկերների ուրախությունը (թեպետ ուրախանալու կամ տխրելու առիթ չէ սա, այլ փորձ` ժամանակակից գրականությունը մոտեցնել դպրոցին): Ներառված հեղինակների անունները ամբողջապես հայտնի կդառնան, երբ արդեն սեպտեմբերին գրքերը հրատարակված կլինեն, բայց նշեմ, որ հեղինակների մի մասը լայն ճանաչում ունի, մի մասին միգուցե շատերը չիմանան: Գրականությունը սուբյեկտիվ բան է, այնպես որ, անկախ ընթերցողը որեւէ գրողի կամ ստեղծագործություն հավանել-չհավանելու իր մոտեցումը որպես աքսիոմ կամ հավատո հանգանակ թող չփողփողեցնի: Ես չգիտեմ՝ ով է «տխրել» կամ «ուրախացել», որ ընդգրկված չէ: Եթե ամեն ինչ լավ լինի, միգուցե այս ծրագիրը շարունակություն ունենա:
ՆՈՒՆԵ ԶԱՔԱՐՅԱՆ