Կարկառուն ՔՊ-ականներից ովքեր չեն լինի կուսակցության նոր վարչության կազմում
ՆերքաղաքականՍեպտեմբերի 18-ին տեղի կունենա իշխող «Քաղաքացիական պայմանագիր» կուսակցության համաժողովն ու նոր վարչության ընտրությունը:
ՔՊ-ն ներկայացրել է վարչության անդամի 47 թեկնածուի անուն-ազգանուն: Հատկանշական է այն, որ այս անգամ ցուցակում չկան Նիկոլ Փաշինյանի որեւէ բարեկամ: Ո՛չ եղբորորդի Սիփան Փաշինյանն է առաջադրվել, ո՛չ էլ աներձագ, ՔՊ-ական պատգամավոր Հրաչյա Հակոբյանը: Ցուցակում չկա նաեւ Նիկոլ Փաշինյանի ամենավստահելիներից համարվող ՔՊ-ական պատգամավոր Վահագն Հովակիմյանի անունը: Թեպետ Հովակիմյանի պարագայում սա մի կողմից կարող է նշանակել, որ փորձում է Փաշինյանն իր շրջապատին «փրկել» ՔՊ-ի հետ ասոցացվելուց, բայց մյուս կողմից էլ հաստատում են լուրերը, որ հենց նա կարող է դառնալ ԿԸՀ նոր նախագահը` փոխարինելով Տիգրան Մուկուչյանին:
Ցուցակում չկան Արտաքին գործերի նախարար Արարատ Միրզոյանի եւ «Քաղաքացիական պայմանագիր» կուսակցության հիմնադիր անդամ Արման Բոշյանի անունները: Տեղ չի գտել ցուցակում նաեւ առողջապահության նախարար Անահիտ Ավանեսյանը: ՔՊ-ական կարկառուն տիկնանցից բացակայում է նաեւ Շիրակի մարզպետ Նազելի Բաղդասարյանի անունը, թեպետ մամուլում կային պնդումներ, որ հենց նա կարող է ընտրվել վարչության կազմում: Սակայն իշխանական կուլիսներում կան խոսակցություններ այն մասին, որ վարչության ցուցակում կանանցից մեկը կլինի ՔՊ-ական պատգամավոր Արուսյակ Ջուլհակյանը, ում «դուխի» վրա վստահ են կուսակցության ներսում: Իսկ «տնից մեկը կլինի» սկզբունքով այս անգամ ՔՊ-ական պատգամավոր Նարեկ Բաբայանն իր տեղը զիջել է տիկնոջը` էլի ՔՊ-ական պատգամավոր Լենա Նազարյանին:
Որքան էլ տարբեր շշուկներ էին պտտվում, ՔՊ-ականների եւ Սասուն Միքայելյանի միջեւ առկա անդունդի մասին, պարզվեց նա եւս պայքարում է ՔՊ վարչության անդամ դառնալու համար:
Ինչեւէ, վարչության կազմի ընտրության, այսպես ասած, նախընտրական ցուցակի հրապարակմամբ, բոլորովին էլ ՔՊ-ի շարքերում ինտրիգները չեն պակասել: Մի կողմից դաժան պայքար է գնում վարչության կազմում տեղ գրավելու համար, իսկ մյուս կողմից շատերը փորձում են հասկանալ, թե նոր վարչության առաքելությունը լինելու է վերջում արած-չարածի համար ամբողջ պատասխանատվության տակ մնալը, ընդ որում` առանց Նիկոլ Փաշինյանի, թե՞ դեռ «Քաղաքացիական պայմանագիր» կուսակցության աստեղային ժամը չի ավարտվել: Որոշ ՔՊ-ականների կանխատեսմամբ` կուսակցության համաժողովի ժամանակ շատ բան պարզ կլինի, այդ թվում` նաեւ Նիկոլ Փաշինյանի ապագա ծրագրերը: Իսկ իշխանական ավելի սթափ զանգվածը համոզված է, որ եթե Փաշինյան Նիկոլն ինչ-որ փուլում որոշի լքել խորտակվող նավը ու հեռանալ, հաստատ չի խնայելու ՔՊ-ականներից որեւէ մեկին կամ մտածի նրանց ապագայի մասին:
ՀՐԱՆՏ ՍԱՐԱՖՅԱՆ