Oceana-ն՝ Հայաստան այցի, Իվետա Մուկուչյանի հետ ընկերության եւ իրեն նոր դերում փորձելու մասին

Երգչուհի Oceana-ն այս տարվա «Yerevan Music Night 2022»-ի հատուկ հյուրն էր: Գերմանացի երգչուհին մանուկ հասակից եղել է արվեստի մեջ՝ սկզբում բալետ, հետո կինո եւ երաժշտություն: Նա երկար տարիների երաժշտական գործունեությունից հետո համաշխարհային հայտնիություն եւ սեր սկսեց վայելել հատկապես «Cry, Cry» եւ «Endless Summer» հիթերի շնորհիվ: Վերջինը 2012 թվականի Ֆուտբոլի Եվրոպայի առաջնության պաշտոնական երգն է:

Աշխարհի բազմաթիվ անկյուններում համերգներով հանդես գալուց հետո Օշեանան այս ամիս առաջին անգամ Հայաստանում էր։ Շառլ Ազնավուրի հրապարակում համերգի ժամանակ էլ BRAVO.am-ին հասցրել է պատմել այցից տպավորությունների, Իվետա Մուկուչյանի հետ ընկերության, զգացմունքային լինելու եւ առաջիկա ծրագրերի մասին:

«Որեւէ երկիր մեկնելիս սպասումներ չեմ ունենում, բայց այս անգամ վստահ էի, որ հիանալի ժամանակ կանցկացնեմ: Հայաստանի մասին շատ-շատ էի լսել, անբացատրելի ոգեւորված եւ ուրախ էի, որ վերջապես հնարավորություն ունեցա այստեղ ելույթ ունենալ։ Զբոսնել եմ գեղեցիկ Երեւանում, կարծում եմ՝ չափազանց գեղեցիկ են նաեւ այստեղի մարդիկ։ Իսկապես այստեղի էներգետիկան տարբերվում է, ու այն ինձ դուր եկավ, դե, իսկ համերգային երեկոն էլ հրաշալի անցավ: Երբ փորձ էի անում, նկատեցի, որ բեմի շուրջ արդեն մարդիկ կային հավաքված, որոնք ինձ ոգեւորում էին։ Հենց այդ պահին հասկացա` լավ երեկո է լինելու, որից իսկապես հաճույք ստացա»,-նշել է երգչուհին:

Հայաստան այցելության լուրն իմանալուն պես առաջինը նամակ էր գրել երգչուհի Իվետա Մուկուչյանին, որի հետ ընկերություն են անում վաղուց։

«Հայաստանի մասին շատ բաներ հենց Իվետայից եմ լսել. մենք լավ ընկերներ ենք: Կարելի է ասել, որ Համբուրգում միասին ենք սկսել մեր երաժշտական կարիերան: Հիմա միմյանց հետեւում ենք սոցիալական հարթակներում։ Ժամանակ առ ժամանակ կիսվում ենք նորություններով, եւ երբ ստացա այստեղ գալու հրավերը, ասացի նրան՝ «Այո՜, վերջապես հնարավորություն կունենամ տեսնելու քո հայրենիքը»։ Ես նաեւ սիրում եմ հայկական երաժշտությունը, բացի այդ, հենց Իվետայի երգերն էլ ինձ դուր են գալիս: Հայաստանն իմ պարտադիր այցելության երկրների ցանկում էր, ու ես վերջապես արեցի դա»,-պատմել է Օշեանան:

Երգչուհին անկեղծացել է՝ էմոցիոնալ մարդ է, սիրում է ապրումներ առաջացնող երգեր. «Իմ երգերը շատ են տարբվում մեկը մյուսից, ամեն մեկն իր ձեւի մեջ եմ սիրում եւ հաճույք եմ ստանում յուրաքանչյուրը կատարելիս: «Endless Summer»-ը սիրում եմ, քանի որ այն շատ էներգետիկ, տրամադրություն բարձրացնող երգ է, վստահորեն «Cry, Cry»-ն էլ է իմ սիրելի երգերի շարքում․ այն առաջին երգն էր, որի շնորհիվ իմ կարիերան առաջխաղացում ապրեց, բացի այդ, այն շատ էմոցիոնալ ստեղծագործություն է։ Ինքս էլ էմոցիոնալ մարդ եմ։ Ինձ հենց էմոցիոնալ երգերով են ճանաչում, բայց գիտե՞ք, շատ երգեր ունեմ, որոնք մարդիկ հնարավոր է՝ չիմանան, դրանցից շատերը Երեւանի համերգի ժամանակ կատարել եմ»:

Օշեանան առաջիկայում նոր սինգլ կներկայացնի: Երգչուհին հաճելի նորություն ունի երկրպագուների համար՝ շուտով հանդես կգա որպես դերասանուհի, ինչը հետաքրքիր փորձ է նաեւ հենց իր համար:

https://bravo.am/news/76803