Արցախի փրկության ճանապարհներն այդքան էլ շատ չեն. Մետաքսե Հակոբյան

Արցախի ԱԺ «Արդարություն» խմբակցություն պատգամավոր Կարեն Հովհաննիսյանը դուրս է եկել խմբակցությունից եւ համանուն կուսակցությունից` հայտարարելով, որ քաղաքական պայքարը շարունակելու է որպես անկախ պատգամավոր: Այս մասին հայտարարություն է տարածել նաեւ Արցախի «Արդարություն» կուսակցության գործադիր խորհուրդը, որում մասնավորապես ասված է, որ հարգում են Կարեն Հովհաննիսյանի որոշումը: Սակայն անհրաժեշտ են համարում նշել, որ կուսակցության համամասնական ընտրակարգով ընտրված պատգամավոր Կարեն Հովհաննիսյանի` քաղաքականությունից դուրս գալու, բայց որպես անկախ պատգամավոր իր գործունեությունը ԱՀ ԱԺ-ում շարունակելու վերաբերյալ խմբակցության ղեկավար Դավիթ Գալստյանին տրված բանավոր բացատրությունն անտրամաբանական է: Ուստի` կուսակցության գործադիր խորհուրդը հորդորում է պատգամավոր Կարեն Հովհաննիսյանին վայր դնել կուսակցության համամասնական ընտրացուցակով տրված մանդատը եւ հնարավորություն տալ կուսակցության համամասնական ընտրացուցակի այլ անդամի շարունակելու քաղաքական պայքարը Արցախի Հանրապետության Ազգային ժողովում: Այս մասին «Իրավունքը» զրուցեց Արցախի ԱԺ «Արդարություն» խմբակցության պատգամավոր ՄԵՏԱՔՍԵ ՀԱԿՈԲՅԱՆԻ հետ:

— Տիկին Հակոբյան, իրականում ի՞նչ է կատարվում Արցախի «Արդարություն» խմբակցությունում եւ, ըստ Ձեզ, ինչո՞վ է պայմանավորված Կարեն Հովհաննիսյանի նման որոշումը:

— Ես միայն մի բան կարող եմ փաստել, որ մի քանի ամիս է, ինչ չեմ տեսել պարոն Հովհաննիսյանին Արցախում: Ինչքանով տեղեկացված եմ` նա Արցախում չի եղել: Նա չի եղել նաեւ Ազգային ժողովի վերջին նիստի ժամանակ: Այսինքն` որեւէ շփում, զրույց էլ այդ ընթացքում չի եղել, առավել եւս` որեւէ համաձայնություն կամ անհամաձայնություն: Այդ պատճառով զերծ կմնամ մեկնաբանություններից, որովհետեւ նույնիսկ եթե կա որեւէ բան, ապա պատճառը դեռեւս որեւէ մեկս չգիտենք:

— Այդուհանդերձ, կարո՞ղ է այս ամենը պայմանավորված լինել ինչ-որ քաղաքական տեսակետների հակադրությամբ:

— Էլի եմ կրկնում` համենայնդեպս, ողջ ամառը, սեպտեմբեր ամսին եւ հոկտեմբերի այս մի քանի օրը ես կոնկրետ չեմ տեսել պարոն Հովհաննիսյանին Արցախում: Հիմա գիտեմ, որ նա մի քանի օր է, ինչ Արցախում է, բայց չի հանդիպել ո՛չ կուսակցության գործադիր մարմնի հետ, ո՛չ էլ` խմբակցության: Այնպես որ, իհարկե քննարկումներ եղել են, բայց որեւէ անհամաձայնություն մինչ այս չի եղել:

— Ըստ Կարեն Հովհաննիսյանի` անկախ պատգամավոր դառնալու որոշում կայացրել է որոշակի հանգամանքների հանրագումարի արդյունքում, ինչը պայմանավորված է երկրի առջեւ ծառացած խնդիրներին լուծում տալու մարտավարության տարբերությունների, ինչպես նաեւ որոշակի գործողությունների հետ վճռական անհամաձայնությամբ…

— Քննարկումների ժամանակ միշտ էլ տեսակետներ հայտնում ենք: Այդ առումով մեր խմբակցությունն էլ, կուսակցությունն էլ շատ ազատ է, մեզ մոտ չկա մեկ մարդու կարծիք: Բոլորս ենք հայտնում մեր կարծիքը, կարող են նաեւ հակադրվել, բայց, ի վերջո, գտնում ենք բոլորին հարմար տարբերակը, որովհետեւ ունենք ընդամենը մեկ տեսլական` այն է Արցախի փրկությունը: Եվ Արցախի փրկության համար, բոլորս ենք հասկանում, որ ճանապարհներն այդքան էլ շատ չեն: Միակ փրկությունը նախեւառաջ միասնականությունն է, եւ մեր կուսակցության անդամների մեջ էլ, խմբակցությունում էլ միշտ այդ գործելաոճն է եղել եւ մթնոլորտը: Դրա համար միշտ էլ կարողացել ենք ներկայանալի լինել` մեկ միասնականությամբ:

ՀՐԱՆՏ ՍԱՐԱՖՅԱՆ

Այս թեմայով Փաշինյանը 2018-ին սպանել է հայաստանի պետականությունը. Աննա Մկրտչյան Նիկոլին հեռացնելուց հետո՝ մեր ազգը դառնալու է աշխարհի ասիչը. Կարեն Սողոմոնյան «Ժողովրդավարության բաստիոնում» տեղի ունեցածը հավերժ գրանցվելու է, որպես խայտառակությունն. Ալլա Հակոբյան Ակնհայտ է, որ Արեւմուտքը հոգնել է այս ամենից. Մհեր Հակոբյան Ալիեւ-Փաշինյան մակարդակով կապիտուլյացիայի շարունակության ենք ականատես լինում. Խաչատրյան