«Խաչատրյանն էկզոտիկ էր, հայ հանդիսատեսը՝ ջերմ». նիդերլանդացի ջութակահարուհու առաջին համերգը Երեւանում

Երեւանյան միջազգային 14-րդ փառատոնի շրջանակում աշնանային Երեւանը դասական երաժշտության հնչյունների ներքո է, եւ հանդիսատեսը երեկ «Արամ Խաչատրյան» համերգասրահում հնարավորություն ունեցավ վայելելու նիդերլանդացի ջութակահարուհի Ռոզանը Ֆիլիպենսի կատարումը:

Հայաստանում Նիդերլանդների Թագավորության դեսպան Նիկո Սխերմերսը BRAVO.am-ի հետ զրույցում կարեւորեց Հայաստանի համար այս դժվար օրերին մշակութային նման իրադարձությունների կազմակերպումը, որոնք պետք է շարունակական լինեն. «Մենք հետագայում էլ կաջակցենք մշակութային ծրագրերին, քանի որ միմյանց հետ կենդանի շփումն ամենահզորներից մեկն է եւ նպաստում է երկրների միջեւ լավ հարաբերությունների ամրապնդմանը»։

Ռոզանը Ֆիլիպենսը կատարեց Յան Սիբելիուսի Ջութակի կոնցերտը: Առաջին անգամ Հայաստան ժամանած եւ հայ հանդիսատեսի առաջ ելույթ ունեցող ջութակահարու համար սա նոր հույզեր եւ տպավորություններ էր։ Ռոզանի հետ զրուցեցինք համերգից հետո։ Թեեւ փոքր-ինչ սպառված էր, բայց ասում է՝ երաժշտի համար ամենալավ զգացողություններն են։

Երեւանյան փառատոնի շրջանակում ելույթ ունենալու առաջարկը Ռոզանը ստացել է ճանաչված հայ թավջութակահար Ալեքսանդր Չաուշյանից, երբ Կիպրոսում նրա հետ նվագել է երաժշտական այլ փառատոնի ընթացքում։

«Լսել էի Հայաստանի մասին. իմ ծնողները Երեւանում իրենց առաջին ռոմանտիկ ճամփորդությունն են անցկացրել։ Նաեւ ազգականներիցս մեկն է ազգությամբ հայ։ Ես առաջին անգամ եմ այս գեղեցիկ երկրում։ Ճիշտ է՝ շատ ժամանակ չեմ ունեցել տեսնելու Երեւանը, այս գիշեր էլ վերադառնալու եմ, սակայն հույս ունեմ նորից վերադառնալ Հայաստան եւ այն բացահայտել։ Շատ հավանեցի հայ հանդիսատեսին, նրանք շատ ջերմ էին»,- պատմում է Ռոզանը։

Հայաստանի ազգային ֆիլհարմոնիկ նվագախմբի հետ աշխատանքից նիդերլանդացի ջութակահարուհին նույնպես տպավորված է։ Ասում է՝ մթնոլորտը ջերմ էր եւ էմոցիոնալ. «Շատ եմ հավանել նվագախմբի հետ աշխատանքը, հաճելի մարդիկ էին։ Սիբելիուսի գործերն ամեն մարդ չէ, որ կարողանում է ընկալել։ Ես պարուրված էի հույզերով եւ ինձ համար շատ հաճելի եւ դուրեկան էր աշխատանքը»։ Հայ կոմպոզիտորների ստեղծագործություններին Ռոզանը դեռ չի հասցրել ծանոթանալ։ Միայն Խաչատրյան է նվագել, էկզոտիկ փորձառություն է եղել. «Շատ հետաքրքիր էր Խաչատրյան նվագելը։ Հայ մյուս կոմպոզիտորներին դեռ պետք է բացահայտեմ եւ ավելի շատ ջանք կգործադրեմ դրա համար»։

Նշում է՝ տարեցտարի կատարելագործում է ջութակահարի իր հմտությունները, երաժշտության հետ կապն էլ ավելի է ամրանում։ Այդ ճանապարհին հույս ունի դեռ շատ բացահայտումներ անել, որից անմասն չի մնա հայկական երաժշտությունը։

https://bravo.am/news/76835

Այս թեմայով Ծնողներին՝ համբերություն, փոքրիկներին՝ բարի երթ. Անի Ներկարարյանը որդուն ուղեկցեց առաջին դասարան Դեռ պատմությունը ցույց կտա, թե ովքեր են իրական սրիկաները. Երջանիկ Ղազարյան Միակ բանը, որն այս իշխանության մոտ չի ստացվել մինչ այսօր, միանգամից Արցախը բռնակցելն է Ադրբեջանին. Ալավերդյան Ընդամենը «քաղաքական շոու» եւ «դեմոկրատիա» են խաղում. Մանասերյան Թող ինձ ներեն այդ պատգամավորների ծնողները, բայց նրանք անդաստիարակ են. Ալավերդյան