ՀՈՎՀԱՆՆԵՍ ԲԱԲԱԽԱՆՅԱՆԸ` ՏԱՐՎԱ ԼԱՎԱԳՈՒՅՆ ԻՆՏԵՐՆԱՑԻՈՆԱԼ ԴԵՐԱՍԱՆ
ՏեսանյութերՀՀ վաստակավոր արտիստ, ամերիկաբնակ դերասան, երգիչ ՀՈՎՀԱՆՆԵՍ ԲԱԲԱԽԱՆՅԱՆԸ Բեւերլի Հիլզում կայացած «Արվեստ հանուն խաղաղության» մրցանակաբաշխության ժամանակ արժանացել է լավագույն ինտերնացիոնալ դերասան անվանակարգին: Այս առիթով «Իրավունքը» զրուցել է նրա հետ:
— Պարոն Բաբախանյան, Բեւերլի Հիլզում անցկացված մրցանակաբաշխության ժամանակ արժանացել եք տարվա լավագույն ինտերնացիոնալ դերասանի պատվին, կմանրամասնե՞ք:
— Չէի սպասում, որովհետեւ 2018-ին արդեն իսկ արժանացել էի The Best International Actor մրցանակին: Շնորհակալ եմ կազմակերպիչներին գնահատելու համար իմ 40 տարիների բեմական գործունեությունը: Եվ, իհարկե, խորին շնորհակալությունս Ձեզ, այս ամենը լուսաբանելու համար…
— Որո՞նք էին 2018թ.-ի եւ 2022-ի տարբերությունները:
— 2018-ի եւ 2022 մեջ էական տարբերություն չկար: Միայն այս դեպքում քովիդից պաշտպանվելու նպատակով այնպես էր մտածված, որ մասնակիցները կարծես ավելի առանձնացված էին միմյանցից: Յուրաքանչյուրիս տրվում էր ընտրության հնարավորություն` առանձին ներկայանալու, նկարահանվելու, լուսանկարվելու, կարմիր գորգ, հարցազրույց եւ այլն…
— Ինչպե՞ս անցավ մրցանակաբաշխությունը:
— Ամեն ինչ, բնականաբար, կազմակերպված էր ինչպես սովորաբար պահանջվում է… Մրցանակաբաշխությանը մասնակցում էր մոտ 500 մարդ, ծառայողական կազմի հետ միասին: Առաջին օրը՝ նոյեմբերի 11-ին ստացա միավորված Ազգերի կազմակերպության հատուկ մրցանակ, իսկ 12-ին`արժանացա «Լավագույն ինտերնացիոնալ դերասան» անվանակարգին:
— Ովքե՞ր էին ժյուրիի կազմում եւ ընտրություն կատարելիս ինչի՞ն էին նախապատվություն տալիս:
— Ժյուրիի կազմում ընդգրկված էին տարբեր ազգեր` տարբեր երկրների մշակութային գործիչներ: Ժյուրին նախապատվություն էր տալիս ընդհանուր խաղացած դերերի քանակին ու որակին: Անշուշտ, նկատի է առնվում նաեւ վերջին շրջանի խաղացված դերերը: Եվ պետք է ավե լացնեմ, որ այս տարվա ամենահատուկ պահերից մեկն այն էր, որ կարմիր գորգի արարողությանը ներկայացա Հայաստանի դրոշով: Այն ավելի ընդգծեց իմ ազգային պատկանելությունը, չէ որ ես այդտեղ ներկայանում եմ ՀՀ վաստակավոր արտիստ:
ՆՈՒՆԵ ԶԱՔԱՐՅԱՆ