Ավելորդ աշխատավարձ չվճարելու համա՞ր են աշխատանքից ազատում ՀՀ վաստակավոր արտիստին
Մշակութային«Իրավունքը» զրուցել է ՀՀ վաստակավոր արտիստ, դերասանուհի ԼՈՒՍԻՆԵ ԿԻՐԱԿՈՍՅԱՆԻ հետ:
— Դեկտեմբերի 4-ին` Ձեր ծննդյան օրը, Առնո Բաբաջանյանի անվան համերգասրահում տեղի է ունենալու «Լուսինե Կիրակոսյանը եւ ընկերները» համերգային ծրագիրը, որի ընթացքում, երգ-երաժշտությունից բացի, կլինի նաեւ պոեզիա, երգիծանք, հումոր: Շա՞տ եք կարոտել բեմը:
— Այո, մի ամբողջ կյանք եմ նվիրաբերել բեմին: Եվ երկար դադարից հետո ուզում եմ նորից լինել բեմում: Ինքս երբեք համերգներ չեմ կազմակերպել, լինելով Սովետական Միության ասմունքի դափնեկիր` միշտ մասնակցել եմ ուրիշների կազմակերպած համերգային ծրագրերին: Ժողովուրդն ինձ շատ է սիրում, եւ ես զգում եմ այդ սերը: Միշտ մոտենում են, ջերմորեն բարեւում, համբուրում, զրուցում, նկարվում են հետս: Կարող է լինեն մարդիկ, որ ինձ չեն սիրում: Այդպիսի մարդ չկա, որ բոլորը սիրեն իրեն: Բայց հիմնականում ես վայելում եմ սեր ու հարգանք ժողովրդի կողմից: Եվ դրանից էլ ոգեւորված` որոշեցի ծննդյանս օրը համերգային ծրագրով հանդես գալ: Քանի որ համերգային ծրագիր կազմակերպելու փորձ չունեի, որոշեցի անցկացնել Առնո Բաբաջանյանի փոքր դահլիճում: Սկզբից ուզում էի մենահամերգով ներկայանալ, բայց հետո մտածեցի` ընկերներիցս մի քանի հոգու էլ հրավիրեմ մասնակցելու այդ ծրագրին: Նրանց զանգեցի, խնդրեցի, եւ անշահախնդիր համաձայնեցին ինձ հետ բեմում լինելու այդ օրը: Ծննդյանս օրը բեմից կհնչեն հումոր, ասմունք, հատվածներ իմ գրված բանստեղծություններից, երգ ու երաժշտություն:
— Թատրոնի հետ կապված՝ ի՞նչ նորություններ ունեք:
— Հրաչյա Ղափլանյանի անվան դրամատիկական թատրոնից ինձ մի ամիս առաջ զանգահարեցին եւ ասացին, որ գնամ թուղթ ստորագրելու: Կասկած առաջացավ մեջս: Հարցրի` ի՞նչ թուղթ: Ասացին, որ դեր չես խաղում, պետք է հունվարի 1-ից արդեն ազատենք աշխատանքից: Ես ինձ շատ վատ զգացի, որովհետեւ այդ թատրոնում աշխատել եմ դեռեւս Թատերական ինստիտուտի երկրորդ կուրսից: Ղափլանյանն ինձ բնակարան տվեց եւ ինձնից խոսք վերցրեց /որովհետեւ կուրսիս ղեկավարը Վարդան Աճեմյանն էր/, որ ես տուն ստանալուց հետո չգնամ Սունդուկյանի անվան ակադեմիական թատրոն, այլ մնամ Դրամատիկական թատրոնում: Նա ասաց` ես հավատում եմ քո խոսքին, որովհետեւ դու քո խոսքի տերն ես: Ու ես մնացի թատրոնում: Սակայն վերջին տարիներին թատրոնում ինձ դերեր չեն տալիս: Ես չեմ հասկանում` ի՞նչն է պատճառը: Եթե ինձ դեր չեն տալիս, ինչո՞ւ են դրա հիման վրա ինձ ուզում ազատել աշխատանքից: Ես այսօր ապրում եմ միայնակ: Թատրոնին նվիրել եմ կյանքս, երիտասարդությունս, առողջությունս: Եթե տարիքայինն է պատճառը, ես այնքան էլ մեծ չեմ: Թատրոնում ինձնից մեծեր էլ կան, իմ հասակակիցներն էլ կան: Ես կարող եմ յուրաքանչյուր 18-20 տարեկանի հետ մրցել իմ պատրաստականությամբ, ուժով, էներգիայով եւ կատարմամբ:
— Ձեր՝ աշխատանքից ազատելու որոշումն ո՞վ է կայացրել:
— Մեր թատրոնը պատկանում է քաղաքապետարանին, ասում են` այնտեղից են նման որոշում կայացրել: Ասել են` իզուր տեղը ինչո՞ւ պետք է 90 հազար դրամ աշխատավարձ տանք... Ես այսօր ծեծում եմ տարբեր դռներ, բայց իմ առջեւ բոլոր դռները փակ են: Ձեր հետ հարցազրույցից առաջ էլ գնացել եմ քաղաքապետարան: Արդեն երկրորդ անգամն եմ գնում, ինձ չեն ընդունում: Գնում եմ ԿԳՄՍ նախարարություն, ասում են` թատրոնը քաղաքապետարանին է պատկանում: Մենք գործ չունենք խառնվելու: Նման վերաբերմունքով նրանք այսօր խաղում են մարդկային կյանքի հետ: Մի ամբողջ կյանք եմ ես նվիրել թատրոնին: Ես էլ կարող էի գնալ Ամերիկայում ապրել ու աշխատել: Հիմա էլ կարող եմ գնալ, բայց ես ուրիշ տեղ չեմ կարող ապրել: Ես շատ եմ սիրում իմ հողն ու ջուրը: Ես ուրիշ տեղ չեմ կարողանում նույնիսկ շնչել, ուր մնաց թե ապրել: Երիտասարդ տարիներին ինձ ասում էին` թող թատրոնը, արի ամուսնանանք: Ես կարող էի շատ երջանիկ ընտանիք կազմել, բայց ես այդ ամեն ինչը մի կողմ դրեցի եւ նվիրվեցի թատրոնին: Իմ կյանքի իմաստը եղել են թատրոնը, կինոն, սերիալները, բեմի երգիծանքն ու հումորները: Մի՞թե կարելի է այսքան նվիրումից հետո վերցնել մարդուն խփել ու գցել մի կողմ: Ես նույնիսկ նամակ եմ գրել վարչապետի մամուլի գրասենյակին, բայց ասացին, որ ընդունելություն չունեն: Այսօր կյանքի ու մահու հարց է: Եթե հասել է ծայրահեղության, ես էլ ծայրահեղության կգնամ: Այն հանգիստ մարդկանցից չեմ, որ նստեմ, լռեմ ու ասեմ` դե խփեք գլխիս: Ո՛չ անբարոյական եմ, ո՛չ քծնվող, ո՛չ էլ ծախու մարդ եմ: Հիմա երեւի քծնվողների՞ դար է: Ես չեմ կարող քծնվել: Ոնց եղել եմ մաքուր, ճիշտը միշտ ասող, այդպես էլ կմնամ: Հերի՛ք եղավ տրորեն իմ «ես»-ը: Ինչքան լռել եմ, տարել, ներել ու համբերել, բայց եթե հասել է նրան, որ անդունդից պետք է գլորվեմ, ես գլորվելուց հետս մեղավոր մարդկանց ինձ հետ կվերցնեմ:
— ՀՀ վաստակավոր արտիստ եք, մի՞թե այդպես են այսօր վերաբերվում Ձեր տարիների վաստակին:
— Մշակույթն այսօր վերջին պլանում է: Հայ ազգը, Հայաստանն իրար միս ուտելո՞վ են տարիների առաջընթաց ապրել: Իհարկե՝ մշակույթով: Մի՞թե կարելի է արվեստի ու մշակույթի մշակին, որը մնացել է միայնակ եւ իր ողջ կյանքն է նվիրաբերել բեմին, այսպես վերաբերվել: Հո ես տառասխալ չեմ, որ սխալ են գրել ինձ, ջնջեն ու նորը գրեն: Ես մարդ եմ: Դուք ինչո՞ւ եք խորտակում իմ մարդկային կյանքը, սպանում իմ հոգին: Ղեկավարներն ասում են` ամեն ինչ ժողովրդի համար ենք անում: Այդ ժողովրդի մի մասնիկն էլ ես եմ, ո՞ւր են, ինչո՞ւ են ինձ հետ այդպես վարվում: Ուր գնում եմ, ոչ մի տեղ իմ առջեւ դուռ չեն բացում: Ասում են` ընդունելություն չկա: Բա ընդունելությունը հրապարակի մեջտեղում պետք է լինի՞: Պաշտոն եք ձեռք բերել, ես այսօր ձեր դուռն եմ ծեծում, որ ձեր հետ խոսեմ, կիսվեմ իմ հոգսերով, որ սատար կանգնեք ինձ: Մեռա Աստված կանչելով, բայց խեղճ Աստվածն ի՞նչ անի, ո՞ր մեկիս հասնի այս այլանդակ աշխարհում… Զարմանում եմ եւ չգիտեմ, որին հավատամ: Ով է ուզում ինձնից ազատվել` թատրո՞նը, թե՞ քաղաքապետարանը...
ՆՈՒՆԵ ԶԱՔԱՐՅԱՆ