Միակ ցանկությունս է, որ խաղաղություն լինի մեր երկրում

Այսօր, դեկտեմբերի 3-ը, Գյումրեցի անվանի մտավորական,  բանահավաք, գրող, մանկավարժ, բանաստեղծ  երաժիշտ, հումորի մեծ  վարպետ, բազմաթիվ գրքերի հեղինակ ԳԱԳԻԿ ՎԱՐԴԱՆՅԱՆԻ ծննդյան օրն է, հոբելյանական 60,իսկ աշխատանքային գործունեության 45-ամյակներն է լրանում։ Նա ծնվել է 1962 թվականին, Հայաստանի մշակույթի, արհեստների, արվեստների, սպորտի դարբնոց համարվող Գյումրի քաղաքում։ Տարիներ շարունակ, ղեկավարել է Հովունի գյուղի, Գյումրիի «Ընտանիք» կենտրոնի, «Արագած» մարզամշակութային պալատի թիվ 35,թիվ 29 և թիվ 41 միջնակարգ դպրոցների երգչախմբերը։ Այդ ընթացքում, արժանացել է «Ամադեուս ֊93»,«Շիրակ ֊94»և այլ մրցույթ - փառատոների բազում մրցանակների, պարգևատրվելով արծաթե գավաթով, դիպլոմներով և հուշանվերներով։ Գագիկ Հովհաննեսի Վարդանյանը, պարգևատրվել է նաև Սևյանի անվան երգի ֊պարի համույթի 50֊ամյակին նվիրված հուշամեդալով։ Տարիների ընթացքում լույս են տեսել Գագիկ Վարդանյանի «Կենտրոնական պաշտպանը», «Ալիկ Գյունաշյան», «Գթության մայրը», «Շիրակի առողջապահության պատմությունը», «Կես դար արտադրությունում», «Տուն շինող Վարդան», «Հումորի հայրաքաղաք Գյումրի», «Հիսուն տարի բեմում», «Գյումրի», «75 գարուն հաղթանակից հետո» և «Շիրակ աշխարհ» գրքերի արդեն 20 հատորները, «Գյումրի. քաղաքը և մարդիկ» գրքի համահեղինակներից մեկն է։ Նրա նախաձեռնությամբ, տպագրվել է «Անցյալը չի լռում...» գրքերի երեք հատորները, «Գարունը սիրուց է ծնվել», «Հայրենյաց կանչեր», «Սիրով ու նվիրումով, ինչպես նաև «Հայրենիքի անմնացորդ նվիրյալները» համահեղինակային ժողովածուները։ 2015 թվականին նկարահանվել է «Գյումրի» փաստագրական - երաժշտական ֆիլմում։ «Իրավունքի» հետ բացառիկ զրույցում, օրվա հոբելյարը, պարոն ԳԱԳԻԿ ՎԱՐԴԱՆՅԱՆԸ նշեց.

«Միակ ցանկությունս է, որ խաղաղություն լինի մեր երկրում։ Թող ամեն մի զինվոր բարով ծառայի ու վերադառնա հայրենի տուն, իր ծնողներին։ Նշեմ, որ օրերս, ծննդյանս հոբելյանին ընդառաջ, լույս տեսավ իմ հեղինակային «Շիրակ աշխարհ» գրքի հոբելյանական 20-րդ հատորը ։Գիրքը հասցեագրվում է նրանց, ովքեր հետաքրքրվում են Շիրակ աշխարհի անցյալով և ներկայով։ Այն օգտակար կարող է լինել նաև Շիրակի ազգագրության հարցերով զբաղվողներին և գրադարանների մատենագիտության բաժնի աշխատակիցներին։ Գրքում կան հուշեր մեծ հայ, ՀԿԿ կենտկոմի երկրորդ քարտուղար, լրագրող, պատմաբան Հովհաննես Բաղդասարյանից, մեծատաղանդ դերասան, ԽՍՀՄ ժողովրդական արտիստ Ֆրունզիկ Մկրտչյանից, կա նաև Գյումրիի Հենրիկ Իգիթյանի անվան Գեղագիտական ազգային կենտրոնի Գյումրիի մասնաճյուղի հիմնադիր տնօրեն, նկարիչների և ժուռնալիստների միության անդամ, վաստակաշատ արվեստագետ Սուսաննա Մկրտչյանի մասին։ Գրքում կա նաև մարզական բաժին, այստեղ ներառել ենք մարզական թղթակից Հովհաննես Սարգսյանի, ինչպես նաև մեր Շիրակ աշխարհի անվանի մարզիկների Սամվել Գասպարյանի, Գևորգ Ղահրամանյանի, Ժորա Համազարյանի, Ռաֆիկ Հարությունյանի, Գարիկ Կարապետյանի, Արթուր Մալխասյանի, Հենրիկ Ճղրիկյանի, Լյովա Գևորգյանի, Մանվել Խնձրցյանի, Ժորժ Եղիկյանի, Ժորա Թումանյանի և Հակոբ Օրդանյանի մասին։ Սա արդեն իմ 45֊րդ գիրքն է։ Շնորհավորում ենք օրվա  հոբելյարին, մաղթելով առողջություն, բեղուն գործունեություն, նորանոր գրքերի լույսընծայում։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ