Սա բոլորիս մրցանակն է. Կարեն Ներսիսյանը «Թատրոնի աստղ»-ից վերադառնում է հաղթանակով
ՄշակութայինՀայտնի են «Թատրոնի աստղ» միջազգային ամենամյա թատերական մրցանակաբաշխության այս տարվա դափնեկիրները: Այսպիսով՝ այդ շարքում «Արտասահմանում լավագույն ռուսական թատրոն» տիտղոսին է արժանացել Երեւանի Կ. Ս. Ստանիսլավսկու անվան ռուսական դրամատիկական թատրոնը:
Եվգենի Վախթանգովի անվան պետական ակադեմիական թատրոնի բեմում տեղի ունեցավ մրցանակաբաշխության արդյունքների ամփոփման եւ դափնեկիրների մրցանակների հանձնման հանդիսավոր արարողությունը:
Պարգեւատրման արարողությանը ներկա էր ռուսական դրամատիկական թատրոնի գեղարվեստական ղեկավար ԿԱՐԵՆ ՆԵՐՍԻՍՅԱՆԸ։
«Մեր թատրոնն այս տարի դարձավ 85 տարեկան: Մենք աշխատում ենք շատ, դժվար, տարաբնույթ, բայց մեծամասամբ՝ երջանիկ ենք: Եվ ինձ ուրախացնում է, որ մենք շատ ակտիվ ենք, երիտասարդ ենք, շատ պրեմիերաներ ունենք եւ բազմաթիվ հյուրախաղերի ու փառատոնների ենք մասնակցում», - ընդունելով մրցանակն՝ ասաց Կարեն Ներսիսյանը եւ շնորհակալություն հայտնեց հարազատ թատրոնի ողջ անձնակազմին:
«Սա բոլորիս մրցանակն է», - ընդգծեց «Արտասահմանում լավագույն ռուսական թատրոն»-ի գեղարվեստական ղեկավարը:
Նշենք, որ «Թատրոնի աստղ» միջազգային ամենամյա թատերական մրցանակաբաշխությունը միակն է իր տեսակով ռուսական թատերական արվեստի ոլորտում, որն ունի անկախ հանդիսատեսի մրցանակ կարգավիճակը: Իր գոյության երկար տարիների ընթացքում մրցանակը դարձել է անկողմնակալ գնահատման, արդար հաղթանակի եւ հանրային ճանաչման խորհրդանիշ, քանի որ 14 անվանակարգերում նրա հաղթողները որոշվում են ինտերնետային քվեարկությամբ՝ ամենատարածված ժյուրիի՝ հազարավոր դիտողների կողմից: Ըստ ավանդույթի, դեկտեմբերի առաջին երկուշաբթի օրը հաղթողները հայտարարվում են քվեարկության արդյունքներին հաջորդող արարողության ժամանակ: Արդյունքները ամփոփում են նաեւ թատերական սեզոնը:
ՀՐԱՆՏ ՍԱՐԱՖՅԱՆ