Թե՛ Գուժ Մանուկյանի եւ թե՛ Լուսիկ Կիրակոսյանի հետ թատրոնը իր կապը չի դադարեցնելու. ԱՐՏԱՇԵՍ ՄԽԻԹԱՐՅԱՆ
ՄշակութայինԴեկտեմբերի 1-ին, իր դիմումի համաձայն, աշխատանքից ազատվել է Երեւանի Հրաչյա Ղափլանյանի անվան դրամատիկական թատրոնի տնօրեն Արմեն Խանդիկյանը: Թատրոնի տնօրենի ԺՊ է նշանակվել ՀՀ վաստակավոր արտիստ Արտաշես Մխիթարյանը, որը մինչ այդ զբաղեցնում էր թատրոնի փոխտնօրենի պաշտոնը: Այս մասին «Իրավունքը» զրուցեց ԱՐՏԱՇԵՍ ՄԽԻԹԱՐՅԱՆԻ հետ:
— Ե՞րբ կլինի տնօրենի ընտրություն, եւ Դուք մասնակցելո՞ւ եք տնօրենի պաշտոնի համար մրցույթին:
— 6 ամսից: Այո, իհարկե, մասնակցելու եմ:
— Մեծ աղմուկ բարձրացավ Ձեր թատրոնի մի շարք դերասանների՝ աշխատանքից ազատման հետ կապված: Վերանայելո՞ւ եք այս հարցը: Դուք ինչպե՞ս եք վերաբերվում դրան:
— Թե՛ Գուժ Մանուկյանի եւ թե՛ Լուսիկ Կիրակոսյանի հետ թատրոնն իր կապը չի դադարեցնելու, իրենց նախաձեռնությամբ եւ թատրոնի աջակցությամբ կարող են ներգրավվել ներկայացումների մեջ, եւ այդ դեպքում կդիտարկվի վերականգնման հարցը:
— Ինչ-որ ծրագրային վերափոխումներ սպասվո՞ւմ են դրամատիկական թատրոնում` Ձեր ղեկավարությամբ:
— Փոփոխություններ թատրոնում միշտ էլ լինում են` թե՛ ստեղծագործական եւ թե՛ ֆինանսատնտեսական առումներով: Առանց փոփոխությունների թատրոնը չէր կարող զարգացում ապահովել, իսկ թատրոնն ամեն տարի ապահովել է առաջընթաց` մասնավորապես ֆինանսատնտեսական առումով, որն ուղիղ համեմատական է ստեղծագործական աշխատանքին:
— Ինչպե՞ս են թատրոնում վերաբերվում պարոն Խանդիկյանի՝ աշխատանքից ազատման հետ կապված:
— Արմեն Խանդիկյանը Դրամատիկական թատրոնի գեղարվեստական ղեկավարն է 35 տարի եւ շարունակելու է ղեկավարել:
— Տեսեք, «Մհեր Մկրտչյան» թատրոնում լուրեր կան, որ կրճատվելու է գեղարվեստական ղեկավարի պաշտոնը, Ձեզ մոտ ճիշտ հակառակը եղավ: Կա՞ միասնական որոշում՝ թատրոնների հետ կապված: Քաղաքապետարանից որեւէ կերպ արձագանքե՞լ են պարոն Խանդիկյանի՝ տնօրենի պաշտոնից ազատման դիմումին:
— Արմեն Խանդիկյանն աշխատանքից չի ազատվել, նա միայն տարիքային ցենզից ելնելով` ինքնակամ, իր դիմումի համաձայն, դադարեցրել է համատեղության կարգով տնօրենի պարտականությունը` մնալով միայն գեղարվեստական ղեկավար:
ՆՈՒՆԵ ԶԱՔԱՐՅԱՆ