«Մանկական Եվրատեսիլ»-ում «Օ՜հ մաման» հաղթեց քաղաքականությանը
ՄշակութայինՄինչ Ադրբեջանն ու Թուրքիան լուսավոր ու գունեղ շոուների փոխարեն իրականացնում են «Եղբայրական բռունցք» զորավարժությունները, Հայաստանում կայացավ «Մանկական Եվրատեսիլ» մրցույթը՝ 16 երկրների մասնակցությամբ: Կ. Դեմիրճյանի անվան մարզահամերգային համալիրում քիչ էր մնում ասեինք, որ ամեն ինչ անփորձանք «հորով-մորով» արվեց, բայց արդեն համացանցում է հայտնվել, թե ինչպես օպերատորներից մեկն՝ իր տեխնիկայով, շուռ եկավ բեմից հենց շոուի ժամանակ:
ԾԱԿԵՑԻՆ ՈՉ ՄԻԱՅՆ ԿԱՌԱՎԱՐՈՒԹՅԱՆ ՇԵՆՔԸ
Ինչ խոսք, հանուն արդարության պետք է ասենք, որ համակարգչային գրաֆիկական լուրջ աշխատանք էր արված, որպեսզի «Մանկական Եվրատեսիլին» պատշաճ ներկայացվի յուրաքանչյուր մասնակից: Սակայն, մրցույթը ցույց տվեց, որ հայաստանյան կազմակերպիչներն այդպես էլ որեւէ դաս չեն քաղել Հանրապետության հրապարակի հատուկ պահպանության շենքերի վրա անցքեր բացելու շուրջ բարձրացված աղմուկից: Այն, ինչ դեռ չէին ծակել իրականում, որոշել էին լրացնել գրաֆիկական համակարգչային լուծումներով: Այսպիսով՝ Կասկադից սկսած մինչեւ պատմամշակութային այլ հուշարձաններ յուրաքանչյուր մասնակցի համար պատրաստված հոլովակում ներկայացվում էր այնպես, որ փոքրիկները հոլով ծակում են, որը բացում է եվրատեսիլյան «հրաշքը»: Միայն թե հրաշքը հրեշավոր էր ու երեխաների համար ոչ ուսուցողական:
ՈՒԿՐԱԻՆԱՆ ՀՈԳՆԵՑՐԵԼ Է ԱՆԳԱՄ ԵՎՐՈՊԱՅԻՆ
«Մանկական Եվրատեսիլն» ուներ նաեւ դրական կողմեր: Ֆրանսիան ներկայացնող ԼԻՍՍԱՆԴՐՈՅԻ «Օ՜հ, մաման» հաղթեց քաղաքականությանը: Հիշեցնենք, որ Վլադիմիր Արզումանյանին էլ «Մամա» երգը 2010 թվականին բերեց «Մանկական Եվրատեսիլ»-ում հաղթանակ: Այս տարի շատերն էին կանխատեսում, թե քաղաքականացված «Եվրատեսիլ»-ում հաղթելու է Ուկրաինան: Բայց, արի ու տես, որ Ուկրաինան ներկայացնող Զլատա Ձյունկայի ոչ պակաս քաղաքականացված «Անպարտելի» երգը չթակեց եվրոպացիների սրտերը: Եվ նրանք նախընտրեցին մրցույթը վերադարձնել Ֆրանսիային, որը հաղթել էր նաեւ 2020 թվականին: Մնում է միայն հուսալ, որ այստեղ որեւէ քաղաքական աստառ չկա եւ հաջորդ տարի, ասենք, Էյֆելյան աշտարակը ֆրանսիացիները ստիպված չեն լինի հանձնել թշնամիներին:
Հանրային հեռուստաընկերության գործադիր տնօրեն ՀՈՎՀԱՆՆԵՍ ՄՈՎՍԻՍՅԱՆՆ էլ մրցույթից հետո Լիսսանդրոյին հիշեցրեց, որ 2021-ին Հայաստանի պատվիրակ Մալենան հաղթեց հենց Ֆրանսիայում կայացած մրցույթում. «Ստացվեց այնպես, որ մենք մրցույթը վերադարձնում ենք Ֆրանսիա»:
ԼԱՎ ԴԱՇՆԱԿԻՑԸ ՎԱՏ ՀԱՐԵՎԱՆԻՑ ԼԱՎ Է
Նշենք, որ Հայաստանը ներկայացնող ՆԱՐԵ ՂԱԶԱՐՅԱՆՆ իր «Պարի՛ր» երգով 5-ական միավոր ստացավ Նիդերլանդներից, Ալբանիայից եւ Վրաստանից, 2 միավոր՝ Լեհաստանից, 4 միավոր՝ Մալթայից, 7 միավոր՝ Պորտուգալիայից, 8-ական միավոր՝ Միացյալ Թագավորությունից, Սերբիայից եւ Ուկրաինայից, 10 միավոր՝ Իռլանդիայից: Իսկ ամենաբարձր 12 միավորը Հայաստանին բաշխեցին ՀԱՊԿ դաշնակից Ղազախստանը, ինչպես նաեւ Ֆրանսիան, Մակեդոնիան, Իսպանիան: Միակ երկիրը, որը զրո միավոր տվեց Հայաստանին, Իտալիան էր:
Ինչպես միշտ, Հայաստանն իր միավորներում կրկին սխալ հաշվարկ արեց, ամենաբարձր միավորը տալով հարեւան Վրաստանին, ումից դժվար է հիշել մի «Եվրատեսիլ», որ բարձր միավոր ենք ստացել: Ինչեւէ, արդյունքում միավորվեց նաեւ հեռուստադիտողների քվեարկությունը եւ Հայաստանը հայտնվեց երկրորդ հորիզոնականում՝ 180 միավորում, իսկ երրորդ տեղում տեղավորելով Վրաստանին:
ՍԻՆԱՆՅԱՆՆ ԱՅԴՊԵՍ ԷԼ ՄՆԱՑ ԲԵԽԱԲԱՐ
Եվրատեսիլյան գեղեցիկ ավանդույթ կար ձեւավորված, տարիներ շարունակ ՀՀ սփյուռքի նախարարը նախ ընդունում էր հայաստանյան մասնակցին, ապա նաեւ կոչ անում Սփյուռքին մասնակցել մեր մասնակցի օգտին քվեարկությանը: Հիմա ոչ սփյուռքի նախարարությունը կա, ոչ էլ բարի ավանդույթը: Այնպիսի տպավորություն է, որ ՀՀ սփյուռքի գործերի գլխավոր հանձնակատար ԶԱՐԵՀ ՍԻՆԱՆՅԱՆՆ անգամ տեղյակ չէ, որ «Մանկական Եվրատեսիլ» է տեղի ունեցել՝ այն էլ Երեւանում: Թեպետ այս ամենի մեջ էլ մի դրական բան կա. չի բացառվում, որ Սինանյանի կոչից հետո Հայաստանը հայտնվեր ոչ թե երկրորդ, այլ վերջին 16-րդ տեղում: Բացի այդ, մանկական շոուն ու Սինանյանը հավանաբար անհամատեղելի են: Չէ որ նա նախընտրում է գեյ-շքերթների մասնակցել, ոչ թե մանկական շոուների, ուր մնաց թե կոչով հանդես գար:
2006-Ի ՌՈՒՍ ՀԱՂԹՈՂՆԵՐՆ ԱՅԴՊԵՍ ԷԼ ԵՐԵՎԱՆ ՉԵԿԱՆ
Ի դեպ, հատկանշական էր այն, որ «Մանկական Եվրատեսիլ» հոբելյանական 20-րդ մրցույթին ելույթներով հանդես եկան գրեթե բոլոր տարիների ներկայացուցիչները: Միայն թե, այդպես էլ բեմում չհայտնվեցին «Մանկական Եվրատեսիլ» 2006-ին հաղթած ռուս երգչուհիներ ԱՆԱՍՏԱՍԻԱ եւ ՄԱՐԻԱ ՏՈԼՄԱՉՅՈՎԱՆԵՐԸ: Երգչուհիների տնօրեն ՍԵՐԳԵՅ ՄԱՍԼՈՎԸ հայտարարել էր, որ Երեւանում կայանալիք մրցույթին մասնակցելու հրավեր չեն ստացել։ Ավելին՝ շեշտել էր, որ պատրաստ են քննարկել, եթե նման առաջարկ կլինի: Մինչդեռ մամուլի ասուլիսի ժամանակ Հանրային հեռուստաընկերության գործադիր տնօրեն Հովհաննես Մովսիսյանը վստահեցնում էր, որ մրցույթում հաղթած բոլոր մասնակիցներին են հրավիրել:
Ռուսաստանը չուներ նաեւ այս տարի մրցույթին մասնակից, քանի որ Եվրոպական հեռարձակողների միության անդամ բոլոր ազգային ալիքները լքել են կազմակերպությունն այն բանից հետո, երբ Եվրոպական հեռարձակողների միությունը Մոսկվային արգելել է մասնակցել մեծահասակների երգի եվրատեսիլյան մրցույթին՝ պայմանավորված Ուկրաինայում իրականացվող հատուկ ռազմական գործողությամբ։
ՀՐԱՆՏ ՍԱՐԱՖՅԱՆ